ۇزاق جىلداردان كەيىن قازاقستانعا جاڭا +997 تەلەفون كودى بەلگىلەندى. بۇل تۋرالى تسيفرلىق دامۋ، يننوۆاتسيالار جانە اەروعارىش ونەركاسىبى ءمينيسترى باعدات مۋسين مالىمدەدى. 

"بۇۇ جانىنداعى حالىقارالىق ەلەكتر بايلانىس وداعى قازاقستانعا جاڭا +997 دەف كودىن بەلگىلەدى. ەندى ءبىزدىڭ ەلدەن باسقا مەملەكەتكە قوڭىراۋ شالعاندا، شەتەلدىكتەردىڭ تەلەفونىندا قازاقستان دەگەن جازۋ شىعادى. سونداي-اق، حالىقارالىق دەڭگەيدەگى تسيفرلى سەرۆيستەردى قولدانعاندا دا، بارلىق جەردە قازاقستان دەگەن سيگنال شىعادى. 

ءبىز قازاقستانعا عانا تيەسىلى حالىقارالىق كودقا قول جەتكىزۋ ءۇشىن بىلتىردان بەرى تەلەكوممۋنيكاتسيا سالاسىنداعى كومپانيالارمەن بىرگە جان-جاقتى جۇمىس جۇرگىزىپ كەلەمىز. وسى كەلىسسوزدەر ناتيجەسىندە ءبىزدىڭ ەلگە دەربەس +997 كودى بەكىتىلدى. قازىر ءتيىستى قۇجاتتار راسىمدەلىپ، جاڭا كودقا كوشۋ بويىنشا ءىس-شارالار اتقارىلىپ جاتىر", - دەپ تۇيىندەدى مينيستر.

قازاقستان رەسەيمەن +7 كودىن قاتار قولدانىپ كەلەدى. كود كسرو تارايتىن ۋاقىتتا بەرىلگەن ەدى. ال بىزبەن كورشىلەس مەملەكەتتەر وزدەرىنىڭ حالىقارالىق بايلانىستا جەكە كودتارىن الىپ ۇلگەرگەن. مىسالى قىرعىزستان +996, وزبەكستان +998, تۇركىمەنستان + 993 كودتارىن العان. ەندى ولاردىڭ قاتارىنا +997 كودىمەن قازاقستان قوسىلادى.

مينيسترلىك جوسپارىنا سايكەس قازاقستان 2023 جىلدىڭ قاڭتارىنان باستاپ جاڭا ۇلتتىق كودقا كوشەدى. سونىمەن قاتار، تاعايىندالعان ساتتەن باستاپ جاڭا جانە ەسكى كودتاردى ەكى جىل قاتار قولدانۋعا بولادى. تولىق اۋىسۋ 2025 جىلدان باستالادى.

بۇعان دەيىن قازاقستان مەن رەسەيدىڭ كودى +7 بولعاندىقتان، قازاقستاندىقتار ءتۇرلى ونلاين پلاتفورمالاردا ەرىكسىز رەسەيدى تاڭداپ، سول ارقىلى جۇمىس جاساۋعا ءماجبۇر بولعان ەدى.

Abai.kz