دۇيسەنبى, 25 قازان 2021
1366 7 پىكىر 17 قىركۇيەك, 2021 ساعات 09:36

تالىپتەر ءوز ىشىندە بيلىككە تالاسا باستادى

اۋعانستان بيلىگىن باسىپ العان "تاليبان" قوزعالىسىندا جانجال تۋىنداعان. تالىپتەر ۇكىمەتى جەتەكشىسىنىڭ ورىنباسارى، قوزعالىستى قۇرۋشىلاردىڭ ءبىرى ابدۋل عاني بارادار جوعالىپ كەتتى. بۇل جونىندە BBC تالىپتەر اراسىنداعى جوعارى لاۋازىمدى شەنەۋنىكتەرگە سىلتەمە جاساپ حابارلايدى.

دەرەككوزدىڭ ايتۋىنشا، بارادار بوسقىندار ىسىنە جاۋاپ بەرەتىن حاليل راحمان حاككانيمەن كەلىسپەي قالعان. ەكەۋىنىڭ اراسىنداعى كەلىسپەۋشىلىك داۋعا ۇلاسقان. بارادار جاڭادان جاساقتالعان ۇكىمەتتىڭ قۇرىلىمىنا كوڭىلى تولماعان.

نەگىزگى داۋدىڭ باسى "تاليبانعا" جەڭىستى اپەرگەن كىم دەگەن سۇراق توڭىرەگىندە بولعان. بارادار اقش اسكەرىن شىعارۋ جونىندەگى دوحا كەلىسىمى جەڭىس اكەلدى دەگەن. ول ديپلوماتيا جەڭدى دەگەن. ال "حاككاني جەلىسى" توبىنىڭ جەتەكشىسى حاككاني تالىپتەرگە جەڭىس اپەرگەن قارۋلى اسكەر دەپ اتاعان.

جانجالدان كەيىن بارادار كابۋلدان كەتىپ، قانداعارعا بارعان.

وسىنىڭ الدىندا بىرقاتار باسىلىمداردا بارادار جانجالدان كەيىن اۋىر جاراقات الىپ، قايتىس بولدى دەگەن اقپارات جاريالانعان. بىراق 13 قىركۇيەكتە "تاليبان" اۋديوجازبا تاراتتى. وندا باراداردىڭ داۋىسى دەلىنگەن ادام ءوزىنىڭ ولگەنىن تەرىسكە شىعارادى.

الايدا ءالى رەسمي اقپارات جوق. دەگەنمەن كوپتەگەن اۋعاندىقتار تالىپتەرگە سەنبەيدى. ماسەلەن 2015 جىلى تالىپتەر ليدەرى مولدا وماردىڭ ءولىمىن ەكى جىل بويى جاسىرىپ كەلدى. ەكى جىل بويى ونىڭ اتىنان رەسمي مالىمدەمەلەر تاراتىلىپ تۇرعان.

Abai.kz

7 پىكىر