بالقاش ارالدىڭ تاعدىرىن قايتالاۋى مۇمكىن. بۇل تۋرالى 24.kz حابارلادى. 

بالقاش كولى كاسپي مەن ارالدان كەيىنگى ءىرى سۋ ايلاعى سانالادى. 18 مىڭ شارشى شاقىرىم اۋماققا جايىلعان كولدىڭ جەتىسۋدىڭ اۋا رايى مەن ەكولوگياسى ءۇشىن ورنى وراسان. سوندىقتان دا بالقاش كولىنىڭ بولاشاعى ادامداردى بۇگىننەن الاڭداتىپ وتىر. ويتكەنى، وڭىردەگى سۋ رەسۋرستارىنىڭ ازايۋى اتالعان كول ءۇشىن وتە قاۋىپتى. كول دەڭگەيىنىڭ وزگەرۋى ءبىرىنشى رەت ەمەس، وتكەن عاسىردىڭ 70-80 جىلدارى دا قۇبىلىستار بايقالعان.

سايات الىمقۇلوۆ، گەوگرافيا جانە سۋ قاۋىپسىزدىگى ينستيتۋتى باسقارما توراعاسىنىڭ ورىنباسارى:

– بىزدە 70-80 پايىز سۋارمالى ەگىنشىلىكتە پايدالانامىز ايماقتا، ەگەر وسى سالادا تيىمدىلىكتى وسىرەتىن بولساق ءدال وسى پايدالانىپ وتىرعان القاپتاردى قىسقارتپاي اق ءبىز سول سۋلاردى 30-40 پروتسەنتكە ۇنەمدەۋگە مۇمكىندىگىمىز بار. باستى ماقسات ارينە بالقاش كولىنىڭ ونىمەن بىرگە ىلە وزەنىنىڭ اتىراۋىن، تابيعي جۇيەنى، ونىڭ ەكولوگيالىق فۋنكتسياسىن ساقتاۋ.

ەكولوگيا مينيسترلىگى وتاندىق عىلىمي مەكەمەلەرمەن بىرلەسە وتىرىپ، بالقاش كولىنىڭ دەڭگەيىن كوتەرۋ، تۇراقتاندىرۋ باعدارلاماسىن جاساۋدا. باستى ماقسات ىلە وزەنىن ءتيىمدى پايدالانۋ، وزەننىڭ باستاۋىنا يەلىك ەتەتىن قىتاي ەلىمەن بىرلەسكەن كەلىسىمشارت جاساۋ تۋرالى ايتىلدى. وعان قوسا كولدىڭ دەڭگەيى تەرەڭ زەرتتەۋدى تالاپ ەتەدى.

سەرىك قوجانيازوۆ – قر ەكولوگيا، گەولوگيا جانە تابيعي رەسۋرستار ءمينيسترىنىڭ ورىنباسارى:

– ءبىزدىڭ كولدىڭ دەڭگەيىن قالىپتا ۇستاۋ ءۇشىن قىتاي ەلى ۇلكەن ماڭىزعا يە. سوندىقتان كورشى ەلمەن ترانسشەكارالىق ايماق ماسەلەسى تالقىلانىپ، ۇلكەن ناتيجەگە جەتتىك. قىتاي ۇكىمەتى بالقاش كولىنىڭ ەكولوگياعا اسەرى جوعارى ەكەنىن مويىندادى. ولار دا شەكاراعا جاقىن اۋماقتا ەكولوگيالىق اپات بولعانىن قالامايدى.

ترانسشەكارالىق ايماقتاعى سۋدى ءبولىسۋ ماسەلەسى التى جىلدان بەرى ايتىلىپ كەلەدى. ويتكەنى، ىلە وزەنى ارقىلى كەلەتىن سۋ دەڭگەيىن تۇراقتاندىرۋ بالقاش كولىن ساقتاپ قالۋدىڭ ءبىر جولى. سوندىقتان كەلىسىمشارت ءبىرىنشى قارەكەت بولماق.

Abai.kz