الماتىنىڭ باس سانيتار دارىگەرى جانداربەك بەكشين كوروناۆيرۋستىڭ ءتورتىنشى تولقىنى باستالعانىن مالىمدەپتى.

ونىڭ ايتۋىنشا، اي وتكەن سايىن كورونايرۋس ينفەكتسياسىمەن اۋىرعانداردىڭ سانى ءوسىپ كەلە جاتىر. ىندەتتىڭ ءۇشىنشى تولقىنى الماتىدا ناۋرىز ايىنان باستالىپ، ماۋسىمنىڭ باسىنا دەيىن تىركەلگەن ەكەن. ىندەتتىڭ ءۇشىنشى تولقىنى COVID-19-دىڭ جاڭا مۋتاتسيالانعان ءتۇرى انىقتالعان سوڭ باستالعان. ول – بريتاندىق الفا-شتامى ەدى.

«ىندەتتىڭ ءۇشىنشى تولقىنى باسىلماي جاتىپ، قازىر ءتورتىنشى تولقىننىڭ باستالىپ كەتكەنىن كورىپ وتىرمىز. ول COVID-19-دىڭ جاڭا مۋتاتسيالانعان ءتۇرى – ءۇندى شتامى (دەلتا-شتام) انىقتالۋىنا بايلانىستى بولىپ وتىر. ۆيرۋس جۇقتىرعانداردىڭ كۇرت كوبەيىپ كەتۋىنە بايلانىستى ءبىز 17-18 ماۋسىمدا زەرتتەۋ جۇرگىزگەن ەدىك. ناتيجەسىندە الماتىدان ىندەتتىڭ بريتاندىق شتامىن، ەكى وڭتۇستىكافريكالىق شتام مەن ءبىر نيۋ-يورك شتامىنىڭ انىقتالعانىن بىلدىك. وسىدان كەيىن تۇپ-تۋرا ءۇش كۇننەن سوڭ ءۇندى شتامى انىقتالدى.

قازىر ءبىز جاعداي كۇردەلىن بارا جاتقانىن كورىپ، باقىلاپ وتىرمىز. انىقتالعان 85 شتامنىڭ 67-ءسى ءۇندى شتامى. قوزدىرعىشتار الماسىپ جاتىر. بريتاندىق شتام مەن ءۇندى شتامى ارالاسىپ كەتتى. بۇلار مۋتاتسيالانعان شتامدار. ولاردىڭ جۇعۋ قاۋىپى دە جوعارى. وسىعان بايلانىستى ءبىز جاڭادان شەكتەۋ شارالارىن قابىلدادىق»، - دەپتى بەكشين.

بەكشيننىڭ ايتۋىنشا، جىل باسىنان بەرى الماتى قالاسىندا ىندەت جۇقتىرعان 56 138 ادام تىركەلگەن. ونىڭ ىشىندە ماۋسىم ايىندا تىركەلگەندەرى – 4 573 جاعداي. وتكەن جىلمەن الىستىرعاندا، بيىلعى جىلدىڭ العاشقى جارتى جىلدىعىندا ىندەت جۇقتىرعاندارى سانى 10 ەسەگە ارتقان. سوڭعى ەكى اپتادا قالادا ۆيرۋس جۇقتىرۋ كورسەتكىشى 2,1 ەسە ءوستى. ياعني 1142 جاعدايدان 2377 جاعدايعا دەيىن.

Abai.kz