وزبەكستاندا سامارقاند پەن ءاندىجان مەملەكەتتىك ۋنيۆەرسيتەتتەرىنىڭ ستۋدەنتتەرىنە الەۋمەتتىك جەلىلەردە پرەزيدەنتتى ماقتاعان پوست جازىپ، سىناۋشىلارعا قارسى تەرىس پىكىرلەر قالدىرۋدى تاپسىرعان. بۇل تۋرالى centralasian.orgكە سىلتەمە جاساپ Abai.kz حابارلايدى. 

بۇل تۋرالى ازاتتىقتىڭ وزبەك قىزمەتى اتالعان وقۋ ورىندارىنىڭ ستۋدەنتتەرىنە سىلتەمە جاساپ، حابارلادى.

سامارقاند مەملەكەتتىك ۋنيۆەرسيتەتى فيلولوگيا فاكۋلتەتىندە وقيتىن ستۋدەنتتەردىڭ ايتۋىنشا، وقۋ ورنىنىڭ باسشىلىعى Facebook جانە Youtube'تاعى پرەزيدەنت ساياساتىن سىناعان پوستتارعا قارسى تەرىس پىكىرلەر جازۋعا ماجبۇرلەپ جاتىر.

"كۋراتورىمىز Facebook'تاعى پرەزيدەنتتى سىناعان پىكىرلەرگە قارسى تەرىس كوممەنتاريلەر جازۋعا ماجبۇرلەپ جاتىر. مەن باس تارتىپ، ەكى كۇننەن بەرى ەشنارسە جازعان ەمەسپىن. بۇگىن جازۋعا ماجبۇرلەدى", - دەيدى اتى-ءجونىن ايتقىسى كەلمەگەن ستۋدەنتتەردىڭ ءبىرى.

ول الەۋمەتتىك جەلىلەردە قانداي پوستتارعا پىكىر قالدىرۋ كەرەكتىگىن دەكاننىڭ ورىنباسارى تاپسىرىپ وتىرعانىن ايتادى.

"ولار بىزدەن تروللدور ارمياسىن قۇرماقشى. اركىم ءوزىنىڭ جەكە ويىن ءبىلدىرىپ جاتىر. نەگە ءبىز ولارعا قارسى پىكىر جازۋىمىز كەرەك. ادامدار ەلدە نە بوپ جاتقانىن وزدەرى دە كورىپ جاتىر. دەكان ورىنباسارى ميرجالول بوبوتاەۆ باس تارتقان ستۋدەنتتەر وقۋدان شىعارىلادى دەپ قورقىتىپ جاتىر", - دەيدى ول.

ستۋدەنتتەردىڭ بۇل ايتقاندارى بويىنشا اتالعان وقۋ ورنىنان پىكىر الۋعا مۇمكىن بولمادى. ءاندىجان مەملەكەتتىك ۋنيۆەرسيتەتىنىڭ ستۋدەنتتەرى مەن وقىتۋشىلارى دا وسى جاعدايدى ايتىپ وتىر. بىراق وقۋ ورنىنىڭ رۋحاني-اعارتۋ ىستەرى بويىنشا پرورەكتورى مۇنىڭ ءبارىن تەرىسكە شىعاردى.

Abai.kz