«سولتۇستىك اعىمعا» سوققى: رەسەي ەندى قايتپەك؟
دانيا ايماعى ارقىلى «بالتىق گاز قۇبىرى» جوباسى سالىنىپ جاتىر. پولشا اتالمىش قۇبىر ارقىلى نورۆەگيادان گاز الىپ، رەسەي گازىنان باس تارتۋدى جوسپارلاۋدا. جوبانىڭ بازاسىن نەمىستىڭ مۋكران پورتىنا ورنالاستىرعان. بۇل پورتتا «سولتۇستىك اعىم-2» قۇبىرىنىڭ لوگيستيكالىق ورتالىعى ورنالاسقانىن دا اتاپ وتۋگە ءتيىسپىز.
بورنحولم ارالىنىڭ جانىندا قۇبىردى سالۋ جۇمىستارى باستالىپ كەتتى. ونى ارنايى عارىشتىق تۇسىرىلىمدەردەن دە كورۋگە بولادى. ءۇش كۇننىڭ ىشىندە «Castorone» كومپانياسى 5,7 شاقىرىم بولاتىن قۇبىردى دانيا باعىتىنا قاراي سالىپ ۇلگەرگەن. جۇمىستىڭ باستالعانى جايلى 28 ماۋسىمدا «Baltic Pipe» كومپانياسى دا حابارلادى. ەگەر تەڭىزدەگى اۋا رايى جاعىمدى بولسا، قۇبىردى سالۋ جۇمىستارى بيىل اياقتالماق.
قۇبىردى سالۋ جۇمىستارىنا 6 كەمە قاتىسۋدا. «Solvik Supplier Sea» مەن «GoldCrest» كەمەلەرى نەمىستىڭ مۋكران پورتىنا بارىپ، كەرى قايتۋدا. «بالتىق گاز قۇبىرىنىڭ» تەرمينالى پورتتىڭ سولتۇستىك بەتىندە، ال «سولتۇستىك اعىم-2» جوباسىنىڭ تەرمينالى وڭتۇستىك بەتىندە ورنالاسقان. نەمىستىڭ مۋكران پورتى اقش سانكتسيالارىنا قاراماستان ازىرگە «سولتۇستىك اعىم-2» قۇبىرىنىڭ سالىنۋىنا ىقپال ەتۋدە. پورتقا قۇبىردى سالۋعا ارنالعان قاجەتتى قۇرالداردى جەتكىزۋ جۇمىستارى جالعاسۋدا.
«بالتىق گاز قۇبىرى» جوباسىنىڭ سالىنۋىن دانيا اۋماعى ارقىلى وتەتىن قۇرلىقتىق بولىگى باياۋلاتۋى مۇمكىن. سەبەبى ۆيرۋستىڭ تاراۋى مەن تاۋلى ايماق ارقىلى قۇبىر سالۋ ءبىرشاما قيىندىقتار ارقىلى ىسكە اسادى. قۇبىردىڭ قۇرلىقتىق بولىگىنە قاتىستى جەرگىلىكتى ەكولوگتاردىڭ دا شۋى كوپ بولىپ تۇر. دانيا ەكولوگتارى قۇرلىقتاعى قۇبىر جۇمىسى فلورا مەن فاۋنانى جويادى دەپ ەسەپتەپ، پەتيتسيا جيناپ جاتىر. قازىر قۇرلىقتىق بولىگىنە قاتىستى قوعامدىق تىڭداۋلار ءوتىپ جاتىر. حالىقتىڭ ويى مەن قۇبىر جۇمىستارىن جۇرگىزەتىن كومپانيانىڭ ويىن تىڭداۋ سەگىز ايعا سوزىلماق.
پولشا ليدەرى اندجەي دۋدا ءوزىنىڭ دانيا جانە نورۆەگيالىق ارىپتەستەرىنەن «بالتىق گاز قۇبىرىن» قولداۋعا شاقىردى. گاز قۇبىرى 2022 جىلى تولىق ىسكە قوسىلىپ، پولشا رەسەي گازىنان تولىق باس تارتپاق. پولشانىڭ «PGNiG» كومپانياسى قازىردىڭ وزىندە «گازپروموم» كومپانياسىمەن جاساسقان كەلىسىمدى سوزبايتىنىن مالىمدەدى. اتالمىش گاز جوباسىنا وزگە ەۋروپالىق ەلدەردى دە تارتۋ جoسپاpلانىپ وتىر.
Abai.kz
