اۋىل شارۋاشىلىعى مينيسترلىگى ماڭعىستاۋ مەن قىزىروردا وبلىسىنداعى قۋاڭشىلىققا قارسى جاسالىپ جاتقان جۇمىستاردى جاريالادى.

«اينالىم تەتىگى بويىنشا ازىق-تۇلىكتى ورتالىقتاندىرىپ ساتىپ الۋ ءۇشىن «كاسپي» اكك ارقىلى 204 ميلليون تەڭگە ءبولىندى. سونىمەن قاتار، 12 ماۋسىمدا مينيسترلىك «ازىق-تۇلىك كەلىسىم شارت كورپوراتسياسى» اق رەسۋرستارى ارقىلى 637 توننا ارزانداتىلعان ارپا تيەدى. ارپا نارىقتىق قۇنىنىڭ 17 پايىزىنا ارزان ساتىلادى.

ماڭعىستاۋ وبلىسى فەرمەرلەرىنىڭ جازعى مال جايۋى ءۇشىن اقتوبە وبلىسىنىڭ العا، بايعانين، تەمىر جانە قوبدا اۋداندارى بويىنشا 100 مىڭ گەكتارعا جۋىق جايىلىمدىق جەرلەر انىقتالدى. قازىرگى ۋاقىتتا اتالعان اۋماققا 1500 باس جىلقى، 3000 باس قوي، 200 باس تۇيە جانە 500 باس ءىرى قارا مال تاسىمالداندى»، – دەپ حابارلادى مينيسترلىكتە.

سونداي-اق، تىكەلەي كەلىسىمشارتتار جاساسۋ ارقىلى وڭىردەگى ازىق قۇنىن تۇراقتاندىرۋعا مۇمكىندىك تۋدى. قازىر ءشوپ 1200-1300 تەڭگە، وراما 12-16 مىڭ تەڭگە باعادا ساتىلۋدا.

مينيسترلىك مالىمەتىنشە، ۇكىمەت رەزەرۆىنەن جەم-ءشوپ قۇنىن ارزانداتۋعا اقشا ءبولىنۋى مۇمكىن.

«ۇقساس شارالار قىزىلوردا وبلىسىنىڭ اكىمدىگى دە قاراستىرىپ جاتىر. ازىق-تۇلىك كورپوراتسياسى ارقىلى ارزانداتىلعان ارپانى جەتكىزۋگە كەلىسىمشارت جاسالادى. ارال اۋدانىنىڭ مال شارۋاشىلىعى ءۇشىن باسقا اۋدانداردان مال ازىعىن جەتكىزۋ ۇيىمداستىرىلۋدا. سونداي-اق، فەرمەرلەر ءۇشىن جەم-ءشوپ قۇنىن جەرگىلىكتى بيۋدجەت ەسەبىنەن سۋبسيديالاۋ تەتىگى جۇمىس ىستەيدى. بۇل ماقساتقا قىزىلوردا وبلىسى بويىنشا 17 ميلليون تەڭگە قاراستىرىلعان»، – دەپ اتاپ ءوتتى مينيسترلىكتە.

ەسكە سالا كەتەيىك، ماڭعىستاۋ وبلىسىندا اشتىقتان قۇر سۇيەگى قالعان جىلقىلاردىڭ سۋرەتتەرىن Facebook قولدانۋشىسى بەردىمۇرات تورەكەنوۆ تۇسىرگەن بولاتىن. ماڭعىستاۋ وبلىسىنىڭ بىرنەشە اۋىلىندا جىلقىلار جويىلۋ الدىندا تۇر. بيىل جاۋىن-شاشىن بولماعاندىقتان، جايىلىمدار كەۋىپ قالعان، جىلقى ازىعىنىڭ جەتىسپەۋىنەن ونى تاماقتاندىراتىن جەم قالماعان.

Abai.kz