پەتروپاۆل حالىقارالىق اۋەجايىنىڭ ەڭبەكاقى بويىنشا قارىزى 27,3 ملن تەڭگەگە جەتىپ، بانكروت دەپ تانىلدى. بۇل تۋرالى قازاقپارات حابارلادى.

سولتۇستىك قازاقستان كولىك پروكۋراتۋراسىنىڭ مالىمەتىنشە، 2020 جىلدىڭ 28 جەلتوقسانىندا اۋەجاي مامانداندىرىلعان اۋدانارالىق ەكونوميكالىق سوتىنىڭ ۇكىمىمەن بانكروت دەپ تانىلدى.

بيىل 13 ساۋىردە سوت ۇكىمى زاڭدى كۇشىنە ەندى.

«بۇگىندە پەتروپاۆل حالىقارالىق اۋەجايىن وبلىس اكىمدىگىنىڭ كوممۋنالدىق مەنشىگىنە وتكىزۋ ءراسىمى جۇرگىزىلىپ جاتىر. سقو بويىنشا مەملەكەتتىك كىرىستەر دەپارتامەنتىنىڭ 2020 جىلعى 30 جەلتوقسانداعى №125 بۇيرىعىمەن بانكروتتىقتى باسقارۋشى تاعايىندالدى. بانكروتتىقتى باسقارۋشى تاعايىندالۋىمەن كاسىپورىننىڭ كەيبىر مۇلكىنە باعالاۋ جۇرگىزىلىپ، 44 ملن تەڭگە سوماسىندا بولجامدى قۇنى بەلگىلەندى. وبلىس ءماسليحاتىنىڭ شەشىمىمەن سونشا اقشا ءبولىندى. بۇل قاراجات اۋەجاي جۇمىسشىلارىنىڭ ەڭبەكاقى بويىنشا قارىزىن جابۋعا جۇمسالادى»، – دەيدى سولتۇستىك قازاقستان كولىك پروكۋرورى ابىلايبەك ورداباەۆ.

ەڭبەكاقى بويىنشا قارىز ماسەلەسى بۇرىننان بار. سقو اكىمى قۇمار اقساقالوۆتىڭ كومەگىمەن وتكەن جىلدىڭ قازان ايىنان بەرى 8 ترانش جۇرگىزىلىپ، قارىزدىڭ 44 154 251 تەڭگە سوماسى وتەلگەن. قازىر اۋەجايدىڭ 109 جۇمىسشىسىنىڭ قارىزى 27,3 ملن تەڭگەگە جەتكەن.

«ءبىز كولىك كاسىپورىندارىندا ەڭبەك زاڭناماسىنىڭ ساقتالۋىنا ۇنەمى مونيتورينگ جۇرگىزەمىز. اۋەجايدىڭ ۇجىمىمەن كەزدەسۋ ۇيىمداستىرىلدى. جۇمىسشىلارعا اۋەجايدىڭ قارجىلىق جاعدايى، نىساننىڭ اكىمدىكتىڭ كوممۋنالدىق مەنشىگىنە وتەتىنى ءتۇسىندىرىلدى. قازىرگى ۋاقىتتا اۋەجايدىڭ ازاماتتارعا قىزمەت كورسەتۋى توقتاتىلۋىنا بايلانىستى شاعىمدار مەن ارىزدار جوق. الەۋمەتتىك جاعداي بىرقالىپتى»، – دەيدى ابىلايبەك ورداباەۆ.

Abai.kz