بۇگىن پالاتا سپيكەرى نۇرلان نىعماتۋليننىڭ توراعالىعىمەن وتكەن جالپى وتىرىستا ۇكىمەت پەن ەسەپ كوميتەتىنىڭ 2020 جىلعا ارنالعان ەسەپتەرى تىڭدالدى.

وندا ءماجىلىس توراعاسى رەسپۋبليكالىق بيۋدجەتتى يگەرۋدىڭ وزەكتى ماسەلەلەرىنە توقتالىپ:

-  بىلتىردان بەرى ەلىمىزدە قالىپتاسقان جاعداي بارشاڭىزعا بەلگىلى. بۇكىل الەمدى قامتىعان كورونوۆيرۋس پاندەمياسى ءبىزدىڭ ومىرىمىزگە دە كوپتەگەن وزگەرىستەر الىپ كەلدى. بىراق تا، ەلىمىزدى دامىتۋ، حالقىمىزدى قورعاۋ جولىنداعى ماقساتتار، مىندەتتەر، جۇمىستار ءبىر كۇنگە دە توقتاعان جوق. سوندىقتان، الەۋمەتتىك-ەكونوميكالىق تۇراقتىلىقتى ساقتاۋعا قاتىستى جۇمىستار دەر كەزىندە قولعا الىندى، - دەدى.

نۇرلان نىعماتۋلين حالىقتى قولداۋ ءۇشىن داعدارىسقا قارسى شارالار قابىلدانعانىن، ول قاراجاتتار بارلىق الەۋمەتتىك مىندەتتەمەلەردى جۇزەگە اسىرۋعا جانە وتاندىق ەكونوميكانى قولداۋعا ىقپال ەتكەنىن ايتتى. ماسەلەن، اتالعان كەزەڭدە ۇلتتىق قوردان كەپىلدەندىرىلگەن ترانسفەرت رەتىندە 4,8 تريلليون تەڭگە بولىنگەن.

ۇكىمەت قابىلداعان داعدارىسقا قارسى شارالار ەلىمىز بويىنشا جۇمىسسىزدىقتى 4,9% دەڭگەيىنەن اسىرماۋعا جانە ورتاشا ايلىق جالاقىنى 7,3% - عا ۇلعايتۋعا جول اشتى. اۋىل شارۋاشىلىعى ءوندىرىسىنىڭ ءوسىمى 5,6% قۇرادى.

الايدا، نۇرلان نىعماتۋلين بيۋدجەتتىڭ ورىندالۋىندا ءالى ورىن العان كەمشىلىكتەر بارىن العا تارتا كەلىپ، مەملەكەت قاراجاتىن ۇتىمدى، ناتيجەلى جانە ءتيىمدى يگەرۋ كەرەكتىگىنە باسا نازار اۋداردى.

سونىمەن قاتار وتىرىس بارىسىندا حالىقتى ۋاقىتشا جۇمىسپەن قامتۋ شارالارىنا قاتىستى بىرقاتار ماسەلەلەر باستى نازاردا بولدى.

ەسەپ كوميتەتىنىڭ قورىتىندىسى بويىنشا «جۇمىسپەن قامتۋدىڭ جول كارتاسى» اياسىندا 2020 جىلى 239 مىڭ ادام جۇمىسقا ورنالاستىرىلعان. ادلايدا، جوبالاردىڭ قىسقا مەرزىمدىلىگىنە بايلانىستى ادام قازىردىڭ وزىندە 158 مىڭ جۇمىستان بوساتىلدى. ال جۇمىسقا ورنالاسقانداردىڭ 17%-ى ءبىر اي عانا جۇمىس ىستەگەن.

وسى رەتتە، نۇرلان نىعماتۋلين بۇل بار-جوعى 4,5 پايىز عانا قۇراپ وتىرعانىن العا تارتا كەلىپ:

-  ايتەۋىر «ەكى قولعا ءبىر كۇرەك»،-دەپ، ۋاقىتشا جۇمىسقا الىپ بارامىز. بىراق تا، ونى تۇراقتى شەشىم دەپ ايتۋعا بولمايدى. سەبەبى، قالعان ۋاقىتتا، مىسالى، كۇزدە، قىستا نە ىستەيدى؟ ول كەزدە دە جۇمىس ىستەۋ كەرەك قوي، ول كەزدە دە وتباسىن اسىراۋ كەرەك قوي، - دەدى.

پالاتا سپيكەرىنىڭ پىكىرىنشە، حالىقتى تۇراقتى، ءتيىمدى، ساپالى ەڭبەكپەن قامتاماسىز ەتۋ كەرەك. بۇل جۇمىس ەسەپ بەرۋ ءۇشىن، بايانداما ءۇشىن ەمەس، شىن مانىندە، حالىقتىڭ جاعدايىن جاقسارتۋ ءۇشىن قاجەت.

وسىعان وراي، ءماجىلىس توراعاسى الەۋمەتتىك قورعاۋ مينيسترىنە اتالعان ماسەلەلەرگە اسىرەسە، تۇراقتى جۇمىستارعا ەرەكشە نازار اۋدارۋ قاجەتتىگىن ەسكەرتە وتىرىپ، وسى جۇمىستى دۇرىس ۇيىمداستىرۋ كەرەكتىگىن ايتتى.

Abai.kz