قازاقستان رەسپۋبليكاسىنىڭ پرەزيدەنتى قاسىم-جومارت توقاەۆ قازاقستاندىقتاردى ورازا ايت مەيرامىمەن قۇتتىقتادى. قۇتتىقتاۋ پرەزيدەنتتىڭ رەسمي سايتىندا جاريالاندى. 

"ارداقتى اعايىن!

بارشاڭىزدى ورازا ايت مەرەكەسىمەن شىن جۇرەكتەن قۇتتىقتايمىن!

رۋحاني تازارۋ مەن جاڭارۋعا جول اشاتىن وسى قاسيەتتى مەيرام كۇللى مۇسىلمان قاۋىمى ءۇشىن ايرىقشا ماڭىزدى.

رامازان ايىنا جالعاسقان بۇل جارقىن مەرەكە قاستەرلى دىنىمىزدەگى مەيىرىم مەن شاپاعات، جاناشىرلىق پەن قامقورلىق سياقتى اسىل قۇندىلىقتاردى دارىپتەيدى.

ورازا ايت ءار ادامنىڭ جۇرەگىنە يمان نۇرىن سەۋىپ، ىزگىلىككە ۇندەيدى، جۇرتتى جاقسىلىققا جەتەلەپ، قوعامدى يگى ىستەرگە جۇمىلدىرادى. سول ارقىلى حالقىمىزدىڭ بەرەكە-بىرلىگىن نىعايتىپ، ىرىس-ىنتىماعىن ارتتىرادى.

بارشامىز ايتتان ايتقا امان-ەسەن جەتە بەرەيىك!

سىزدەرگە زور دەنساۋلىق، باق-بەرەكە تىلەيمىن!

ءار شاڭىراق شۋاققا بولەنىپ، قۋانىشقا كەنەلسىن!

ورازا ايت قۇتتى بولسىن!"

Abai.kz