ماڭگىلىك الاۋ دا ماڭگىلىككە وشەر!
9-مامىر - ەكىنشى جاھان سوعىسى قۇرباندارىن ەسكە الۋ كۇنى قالاي اتالىپ ءوتىلىپ جاتىر ەكەن، بىلەيىن دەپ الماتىداعى ماڭگىلىك الاۋ جاققا بارعام عوي ادەيى. قاراڭ-قۇراڭ جۇرت كورىنەدى. پاندەميانىڭ دا سالدارى بولار. بۇرىنعىداي قالىڭ ءنوپىر بايقالمايدى. كوبىسى كەۋدەسىنە گەورگيەۆ لەنتاسىن تاعىپ العاندار. بىراق وتكەن جىلدارداعىداي جەڭىسجىندىلىق (پوبەدوبەسيە) جوق. قازاقتار از. بەس-التى قاراكوز قىز-جىگىت ورىس تىلىندە مايدان اندەرىن ايتىپ تۇر. ماڭگىلىك الاۋدان كلوچكوۆ قورعاعان قابىرعاعا دەيىن گۇل توگىلىپ جاتىر.
انادايدا تۋ سىرتىندا «مچس روسسي» دەگەن جازۋى بار جارتىلاي اسكەري فورماداعى ۇزىن بويلى ورىس جىگىتى مەن ورىس قىزى «سسسر» دەگەن قىزىل جالاۋ كوتەرىپ بارادى. ورتاسىندا ارەڭ قوزعالاتىن ءداۋ سەمىز ءيتى بار.
–پوچەمۋ ۆى نەسەتە فلاگ سسسر؟
–چتو نەلزيا؟
–نەلزيا!
–پوچەمۋ؟
–پوتومۋ، چتو ەتو مەنيا وسكوربلياەت. سسسر – بىل ساموي كروۆوجادنوي سترانوي. زا 74 گودا ۆو ۆلاستي وني يسترەبيلي وكولو 90 ملن سۆويح گراجدان، ۆ توم چيسلە 10 ميلليونوۆ كازاحوۆ. ۆ رەزۋلتاتە رۋكوتۆورنوگو گەنوتسيدا پوگيبلي نەپوسرەدستۆەننو موي بليزكيە رودستۆەننيكي، دەدى ي بابۋشكي!
–مى يز مچس روسسي!
–نۋ ي چتو؟ كتو ۆاس پروسيل پودنيات فلاگ سسسر؟
الگىلەر ۇندەمەي اۋعان سوعىسى ارداگەرلەرىنىڭ ەسكەرتكىشى جاققا تىعىلدى.
ول جاقتا دا جاۋىنگەرلىك فورماداعى ءبىر قازاعىمىز قىزىل جالاۋ كوتەرىپ الىپتى.
–ەي، شىراعىم، مىناۋ نە؟
–وي، اعا بۇل راحىمجان قوشقارباەۆتىڭ رەيحستاگقا تىككەن جالاۋى عوي! –دەيدى. ويپىرم-اي، زىميان يدەولوگيانىڭ سسسر جالاۋىن وزدەرىنشە بۇركەمەلەگەن ءتۇرى. باتىردىڭ اتىن ايتساق ەشكىم اۋزىن اشا المايدى دەگەنى عوي. ياعني كەلەسى جىلداردا بۇكىل سسسر اتريبۋتيكاسىنا تىيىم سالۋ قاجەت دەگەن ءسوز.
ءتىپتى اتريبۋتيكاسىمەن قوسا بۇگىندە وتقا تابىنۋشىلىقتىڭ كورىنىسىنە اينالىپ كەتكەن ماڭگىلىك الاۋدى دا ماڭگىلىككە وشىرەتىن كەز جەتكەن سياقتى. 28 پانفيلوۆشىلار پاركىنىڭ اتىن «وتان قورعاۋشىلار پاركى» دەپ وزگەرتۋ جونىندە ۇسىنىس جاساپ كەلە جاتقانىمىزعا دا بەس جىل بولدى. كلوچكوۆتىڭ ويدان شىعارىلعان ەرلىگىنەن گورى سوناۋ اتيللادان باستاپ، سوڭى قايرات رىسقۇلبەكوۆكە دەيىن كۇللى باتىرلارىمىزعا اشىق اسپان استىندا مۇراجاي اشىپ قويسا ەڭ عاجابى سول ەمەس پە؟
مۇندا ەكى ساعات ءجۇرىپ ەكى تانىسىمىزدى ازەر كەزىكتىردىك. قازاقتاردىڭ وزدەرىنىڭ ءالى ساناسى تومەن. «پوبەدا» دەسە بولدى، فاشيستەرمەن بولسا دا قۇشاقتاسىپ سۋرەتكە تۇسۋگە ءازىر.
قالداياقوۆ كوشەسىنە قاراي ءوتىپ بارا جاتىپ، بۇرىشتا گۇل ساتىپ تۇرعان كەمپىردى ويبايلاتىپ، بۋكەتتەرىن جۇلىپ سىندىرىپ جاتقان ەكى پوليتسيانى كوردىم. ءبىرى سىندىرعان بۋكەتتەردى قولتىعىنا قىسىپ كولىگىنە الىپ كەتتى. «گۇلدەرىمدى قايتارىڭدارشى، اقشاعا ساتىپ الدىم عوي، بالالارىمدى قايتىپ اسىرايمىن؟!» دەپ زار قاققان كەمپىرگە قوقان-لوقى جاساپ ماشينەسىمەن الىپ كەتپەك بولىپ تۇرعان ەكىنشى پوليتسياعا «انالارىڭداي ۇلكەن ادامعا ءتيىسىپ قايتەسىڭدەر؟ قويساڭدارشى!» دەسەم «باستىقتارىمىز سولاي تالاپ ەتىپ جاتىر، مەن قايتەيىن!» دەيدى اقتالىپ. پوليتسيا شەت ەلدىڭ تۋىن كوتەرىپ تايراڭداپ جۇرگەندەردە شارۋاسى جوق تا، انشەيىن گۇل ساتىپ تيىن-تەبەنمەن بالا-شاعاسىنىڭ ناپاقاسىن ايىرىپ جۇرگەندەردىڭ توبەسىن شوقيدى.
قازاقستان ءۇشىن ۇيرەنشىكتى كورىنىس! وسىلاي كوڭىلىمىز قۇلازىپ ۇيگە قايتتىق. تەك كەۋدەمىزدە «كوپ ۇزاماي ماڭگىلىك الاۋ دا ماڭگىلىككە وشەر!» دەگەن سەنىم عانا لاۋلاي بەردى.
مارات ءبايدىلداۇلىنىڭ جازباسى
Abai.kz
