سەنبى, 15 مامىر 2021
بيلىك 2580 2 پىكىر 8 ءساۋىر, 2021 ساعات 18:41

قۋعىن-سۇرگىن قۇرباندارىن اقتاۋ جونىندەگى مەمكوميسسيانىڭ وتىرىسى ءوتتى

2021 جىلعى 8 ساۋىردە قر مەملەكەتتىك حاتشىسى ق.كوشەرباەۆتىڭ توراعالىعىمەن ساياسي قۋعىن-سۇرگىن قۇرباندارىن تولىق اقتاۋ جونىندەگى مەملەكەتتىك كوميسسيانىڭ ەكىنشى وتىرىسى ءوتتى.

جيىن بارىسىندا ساياسي قۋعىن-سۇرگىن قۇرباندارىن تولىق اقتاۋ جونىندەگى مەملەكەتتىك كوميسسيا مەن ونىڭ وڭىرلىك فيليالدارىنىڭ بيىلعى اتقارعان قىزمەتى تالقىلاندى.

مەملەكەتتىك كوميسسيانىڭ توراعاسى ق.كوشەرباەۆ اتالعان كوميسسيانىڭ جۇمىسىن ۇيىمداستىرۋ كەزەڭى اياقتالىپ، ەلىمىزدىڭ ءتۇرلى ارحيۆتەرىندە عالىمداردىڭ جانە ساراپشىلاردىڭ بەلسەندى زەرتتەۋ جۇمىستارى باستالعانىن اتاپ ءوتتى.

كوميسسيانىڭ قىزمەتىن قامتاماسىز ەتۋ ءۇشىن ارنايى جوبالىق وفيس قۇرىلىپ، ونىڭ قۇرامىنا عالىمدار، زەرتتەۋشىلەر جانە مەملەكەتتىك ورگانداردىڭ وكىلدەرى كىرگەن. سونىمەن قاتار مەملەكەتتىك كوميسسيا جۇمىسىنىڭ بارلىق باعىتىن تولىق قامتۋ ءۇشىن 11 جۇمىس توبى قۇرىلدى. ءار توپ ءوز قىزمەتىن قۋعىن-سۇرگىن قۇرباندارىنىڭ ساناتىنا سايكەس تاقىرىپتىق جوسپارلار مەن بەلگىلى ءبىر ادىستەمەلەر اياسىندا جۇزەگە اسىرادى.

مەملەكەتتىك كوميسسيانىڭ جۇمىسىن جۇيەلى ۇيىمداستىرۋ ءۇشىن ەلىمىزدىڭ بارلىق ايماقتارىندا ساياسي قۋعىن-سۇرگىن قۇرباندارىن تولىق اقتاۋ جونىندەگى وڭىرلىك كوميسسيالار قۇرىلدى. ولاردى وبلىستارداعى اكىمدەردىڭ ورىنباسارلارى باسقارادى جانە قۇرامىندا عالىمدار، كورنەكتى قوعام قايراتكەرلەرى جانە مەملەكەتتىك ورگاندار مەن ۇيىمداردىڭ وكىلدەرى بار.

ءبىلىم جانە عىلىم ءمينيسترى ا.ايماعامبەتوۆ ءماجىلىس بارىسىندا جۇمىس توپتارىنىڭ بارلىق مۇشەلەرى جابىق جانە ارنايى ارحيۆتەردە جۇمىس ىستەۋگە رۇقسات العانىن اتاپ ءوتتى. عالىمداردىڭ جالاقىسى مەن بارلىق الەۋمەتتىك تولەمدەرى ساقتالا وتىرىپ، جوعارى وقۋ ورىندارى مەن عىلىمي-زەرتتەۋ ينستيتۋتتارىنداعى نەگىزگى جۇمىستارىنان ۋاقىتشا بوساتىلدى.

مادەنيەت جانە سپورت ءمينيسترى ا.رايىمقۇلوۆا ساياسي قۋعىن-سۇرگىن ماسەلەلەرى جونىندەگى ارنايى ارحيۆ قورىن جانە ۇلتتىق جاد ينستيتۋتىن قۇرۋ جۇمىستارى تۋرالى ايتتى.

وتىرىس بارىسىندا ساياسي قۋعىن-سۇرگىن جونىندەگى جابىق ارحيۆ قورلارىن جان-جاقتى زەردەلەۋ جانە ولاردى كەزەڭ-كەزەڭىمەن قۇپياسىزداندىرۋ ءۇشىن شاعىن كوميسسيا قۇرۋ جونىندە شەشىم قابىلداندى.

جيىن قورىتىندىسى بويىنشا مەملەكەتتىك حاتشى ۆەدومستۆولىق جانە مەملەكەتتىك ارحيۆتەردىڭ قىزمەتىن جەتىلدىرۋگە، ارحيۆتەردەگى عالىمدار مەن زەرتتەۋشىلەردىڭ جۇمىسى ءۇشىن قولايلى جاعداي جاساۋعا باعىتتالعان بىرقاتار تاپسىرما بەردى. وڭىرلىك كوميسسيالاردىڭ قىزمەتىن جانداندىرىپ، ولاردىڭ قىزمەتىن قارجىلاندىرۋ، سونداي-اق، مەملەكەتتىك كوميسسيا قىزمەتىنىڭ اقپاراتتىق ستراتەگياسىن قالىپتاستىرۋ مىندەتتەرى بەلگىلەندى.

Abai.kz

2 پىكىر