بۇگىن قر يندۋستريا جانە ينفراقۇرىلىمدىق دامۋ مينيسترلىگى قر تسيفرلىق دامۋ مينيسترلىگىمەن، "قازاقستاننىڭ اۆياتسيالىق اكىمشىلىگى" اق، نۇر-سۇلتان جانە الماتى قالالارىنىڭ اۋەجايلارىمەن بىرلەسىپ، "Air Astana" اۋە كومپانياسىنىڭ نۇر-سۇلتان-الماتى جانە الماتى-نۇر-سۇلتان باعىتتارىنداعى رەيستەرىندە تسيفرلىق قۇجاتتاردى پايدالانۋ جونىندەگى پيلوتتىق جوبانى ىسكە قوستى.

بۇگىننەن باستاپ ەلەكتروندىق جەكە كۋالىكتى EGOV mobile قوسىمشاسى ارقىلى كورسەتىلگەن اۋەجايلاردا تىركەۋ، تەكسەرۋ جانە وتىرعىزۋ پۋنكتتەرىندە قولدانۋعا بولادى.

دەگەنمەن، جولاۋشىلاردا جەكە كۋالىكتەرىنىڭ تۇپنۇسقاسى دا بولعانى ءجون. ويتكەنى، پيلوتتىق جوبا كەزىندە تسيفرلىق قۇجاتتار جولاۋشىنىڭ مارتەبەسىن تەكسەرۋدىڭ بالاما نۇسقاسى بولادى.

EgovMobile-داعى "تسيفرلىق قۇجاتتار" قىزمەتىمەن گەنەراتسيالانعان QR-code ەسەپتەۋ بويىنشا "ە-document" باعدارلامالىق قامتاماسىز ەتۋ جۇيەسى نۇرسۇلتان نازارباەۆ حالىقارالىق اۋەجايىمەن بىرلەسىپ ازىرلەندى.

جوبا مەملەكەت باسشىسىنىڭ جەكە كۋالىكتەر، ديپلومدار مەن قۇقىقتاردى ەلەكتروندىق تۇردە بەرۋ جونىندەگى پروتسەستەردى تسيفرلاندىرۋ جانە مەملەكەتتىك ورگانداردىڭ جۇمىسىنا ەنگىزۋ جونىندەگى تاپسىرماسىن ورىنداۋ ماقساتىندا ەنگىزىلدى.

Abai.kz