قر قورعانىس مينيسترلىگىنە قاراستى ورتالىق سپورت كۋلبىنىڭ اسكەري سامبو ءبولىمىنىڭ نۇسقاۋشى-سپورتشىسى مارات بايكامۋروۆ ماسكەۋدە وتكەن الەم كۋبوگىندا 98 كەلىگە دەيىنگى سالماق دارەجەسىندە قولا مەدال جەڭىپ الدى.

سامبو كۇرەسى بويىنشا وتكەن «ا. حارلامپيەۆ مەموريالى» الەم كۋبوگى دەپ اتالاتىن تۋرنير ەكى كۇنگە جالعاستى. جارىسقا جالپى 16 ەلدىڭ 300-گە جۋىق سپورتشىسى قاتىستى. وندا الەمنىڭ ۇزدىك سامبوشى ەرلەرى مەن ايەلدەرى جانە جاۋىنگەرلەر باق سىناسىپ، 21 سالماق دارەجەسى بويىنشا ونەر كورسەتتى.  ماسكەۋدىڭ «لۋجنيكي» ستاديونىنىڭ كىشى سپورت ارەناسى تۋرنير وتەتىن ءداستۇرلى الاڭعا اينالعان.

- مارات بايقامىروۆ - ءوز سالماق دارەجەسىندە سامبودان ۇلتتىق قۇرامانىڭ كوشباسشىسى، قازاقستاننىڭ بىرنەشە دۇركىن چەمپيونى، 2019 جىلعى قازاق كۇرەسىنەن ۇلتتىق ويىنداردىڭ جەڭىمپازى. ارميا اتىنان شىققان سپورتشىمىز لايىقتى شەبەرلىك پەن جاۋىنگەرلىك رۋح كورسەتتى. ءبىزدى الدا وسى كەزەڭنىڭ باسقا دا حالىقارالىق جارىستارىنا، سونداي-اق قازاق كۇرەسىنەن «قازاقستان بارىسى-2021» رەسپۋبليكالىق ءتۋرنيرى مەن قاراشادا تاشكەنتتە وتەتىن سامبودان الەم چەمپيوناتىنا تولاسسىز دايىندىق جۇمىستارى كۇتىپ تۇر، – دەدى ارميانىڭ ورتالىق سپورت كلۋبىنا قارايتىن سامبودان شتاتتىق كوماندانىڭ جاتتىقتىرۋشىسى، ەفرەيتور اسان مامبەتقۇلوۆ.

ايتا كەتەيىك، «ا. حارلامپيەۆ مەموريالى» دەپ اتالاتىن الەم كۋبوگى سامبونىڭ نەگىزىن قالاۋشىلاردىڭ ءبىرى – اناتولي حارلامپيەۆتىڭ قۇرمەتىنە اتالعان. بۇل جارىس 1980 جىلعى ماسكەۋ وليمپياداسىن وتكىزگەن جىلى قۇرىلعان بولاتىن.

تۋرنيردە جەڭىسكە جەتكەن سپورتشىلار حالىقارالىق دارەجەدەگى سپورت شەبەرى اتاعىن الادى.

جالپى قازاقستان اسكەرىنىڭ قۇرامىندا كاسىبي سپورتشىلار دا جەتەرلىك. ولار وتان الدىنداعى بورىشىن ابىرويمەن اتقارىپ كەلەدى. ساربازدار اراسىندا الەم جانە رەسپۋبليكالىق سايىستاردا بوكستەن، اۋىر اتلەتيكادان، جۇزۋدەن، كۇرەستەن توپ جارعاندار بار.

2020 جىلى الماتى قالاسى قورعانىس ءىسى بويىنشا دەپارتامەنتىنىڭ مالىمەتىنە سۇيەنسەك، 24 كاسىبي سپورتشى وتان الدىنداعى بورىشىن وتەۋگە اتتانعان. اسكەر قاتارىنا شاقىرتۋ العان سپورتشىلاردىڭ باسىم بولىگى حالىقارالىق سپورت شەبەرى اتاعىن العاندار. الايدا وتان الدىنداعى بورىشىن وتەۋ بويىنشا شاقىرتۋ العاندا، ويلانباستان اسكەري بولىمشەگە بارىپ، مەديتسينالىق كوميسسيادان ەڭ ءبىرىنشى بولىپ وتكەندەردىڭ قاتارىندا.

سپورتشىلاردىڭ سوزىنە سەنسەك، اسكەري قىزمەت اسكەري بيلەت الۋ ءۇشىن ەمەس، جالپى وتاندى قورعاۋ ءۇشىن قاجەت. قازاقستان اسكەرىندە وليمپيادادان التىن مەن كۇمىس تاققان سپورتشىلار دا ءوز بورىشتارىن وتەگەن. ولاردىڭ ىشىندە 2016 جىلى ريو-دە-جانەيرودا توپ جارعان اۋىر اتلەتيكانىڭ تارلانى نيجات راحيموۆ پەن جۇزۋدەن التىن تاعىنعان دميتري بالاندين بار. بۇل سپورتشىلارعا اسكەري بورىشىن وتەۋ ۇلكەن ابىروي سانالدى. ولار اسكەردە ءجۇرىپ، سپورتتان قول ۇزبەي، اسكەريلەر اراسىنداعى سايىستاردا دا وزدەرىنىڭ ۇزدىك ەكەندىكتەرىن كورسەتە ءبىلدى.

Abai.kz