سامۇرىق قازىنا ۇلتتىق ءال-اۋقات قورىنىڭ توراعاسى, زەينەت جاسىنداعى ساياساتكەر احمەتجان ەسىموۆ قىزمەتىنەن كەتتى. بۇگىن قر ۇكىمەت باسشىسى اسقار مامين احمەتجان ەسىموۆتى قىزمەتىنەن بوساتىپ، ونىڭ ورنىنا سۋ جاڭا توراعا – الماسادام ساتقاليەۆتى تانىستىرعان.

ۇكىمەت ءباسپاسوزى تاراتقان مالىمەتكە سۇيەنسەك، پرەمەر-مينيستر اسقار مامين قازاقستاننىڭ ەكونوميكالىق-الەۋمەتتىك دامۋىنا قوسقان ۇلەسى ءۇشىن جانە وسى ۋاقىتقا دەيىن اتقارعان ءارتۇرلى مەملەكەتتىك قىزمەتتەرى ءۇشىن ەسىموۆكە العىس ايتقان.

وسىعان دەيىن جەلىدە سامۇرىق-قازىنا ۇلتتىق ءال-اۋقات قورىنىڭ توراعاسى احمەتجان ەسىموۆ ناۋرىزدىڭ 29-ى كۇنى قىزمەتىنەن بوساتىلىپ، زەينەتكە شىعادى دەگەن اقپارات شىققان. بۇل تۋرالى «قازتاگ» باسىلىمى حابارلاعان.

احمەتجان ەسىموۆ 15 جەلتوقسان كۇنى 70 جاسقا تولعان ەدى. قازاقستانداعى زەينەتكە شىعۋ جاسى ەرلەر ءۇشىن 63 ەكەنىنە قاراماستان، ەسىموۆ جەتى جىل ارتىق قىزمەت ەتىپ، زەينەتكە كەتۋى مۇمكىن. بۇعان دەيىن احمەتجان ەسىموۆتىڭ «ۋاقىتشا ەڭبەككە جارامسىزدىعىنا بايلانىستى قىزمەتىنەن بوساتىلعانى» تۋرالى قاۋلىنىڭ كوشىرمەسى جەلىگە جاريالانعان بولاتىن.

«29 ناۋرىزدا ەسىموۆتى زەينەتكە شىعارىپ سالۋ شاراسى وتەدى. وعان مەملەكەت باسشىلىعى العىس ايتادى. ەسىموۆ دەمالىسقا كەتۋدى بۇرىنان سۇراپ جۇرگەن. بىراق باسشىلىق كوروناۆيرۋس ماسەلەسىن شەشۋ كەزىندە جۇمىس ىستەي تۇرۋىن سۇراعان. وسى جيىن بارىسىندا قوردىڭ جاڭا توراعاسى تانىستىرىلادى»، – دەگەن دەرەككوز ءسوزىن جاريالادى باسىلىم.

ساياسي ارەنادا سالماعى باسىم، تاجىريبەسى مول احمەتجان ەسىموۆ بۇعان دەيىن بىرنەشە ءىرى قىزمەتتە بولدى. ول الماتى قالاسىنىڭ اكىمى قىزمەتىن اتقارعان ەدى. الايدا قالانىڭ ماسەلەسىن شەشۋگە قاراعاندا، ەل اراسىندا احمەتجان ەسىموۆتىڭ تاۋەلسىزدىك كۇنىن ءتيىستى دارەجەدە ەسكەرمەگەنى قالدى. «نەگە الاڭعا كەلىپ، گۇل شوقتارىن قويمايسىز» دەگەن سۇراققا، «15 جەلتوقسان تۋعان كۇنىم ەدى، سوعان بايلانىستى قالادا بولمايمىن»، دەپ جاۋاپ قاتقان. بۇل جاۋاپ ەل اراسىندا نارازىلىق تۋدىرىپ، اكىمدى ايىپتاۋشىلار كوپ بولدى.

ارتىنشا «استانا ەكسپو-2017 ۇك» اق باسقارما توراعاسى قىزمەتىن يەمدەندى. قارجىسى بىرنەشە ملرد دوللاردى قۇراعان بۇل جوبانىڭ ءساتتى جانە ءساتسىز تۇستارىن دا ەسىموۆ ەسىمىمەن بايلانىستىراتىندار كوپ.

احمەتجان ەسىموۆ سامۇرىق-قازىنا ۇلتتىق ءال-اۋقات قورىنىڭ توراعاسى بولىپ 2017 جىلى تاعايىندالىپ، وسى ۋاقىتقا دەيىن قىزمەت اتقارىپ كەلەدى.

Abai.kz