ەۋرازيالىق ەكونوميكالىق كوميسسيا قازاقستاننان قىزاناق پەن بۇرىش اكەلۋدى شەكتەيتىن رەسەي بيلىگىنىڭ ارەكەتتەرىن زاڭسىز دەپ تانىدى. بۇل تۋرالى قر ساۋدا جانە ينتەگراتسيا مينيسترلىگى مالىمدەدى. 

2021 جىلعى 16 ناۋرىزدا قازاقستان تاراپىنىڭ باستاماسى بويىنشا ەۋرازيالىق ەكونوميكالىق كوميسسيا القاسى قازاقستان رەسپۋبليكاسىنان قىزاناق پەن بۇرىش جەمىستەرىن اكەلۋگە رەسەيلىك تىيىم سالۋدىڭ زاڭدىلىعى ماسەلەسىن قارادى. القا مۇشەلەرى مەن تاراپتار وكىلدەرىنىڭ پىكىرسايىسىنىڭ قورىتىندىسى بويىنشا ەەك القاسى وتكەن جىلدىڭ سوڭىندا روسسەلحوزنادزور (رەسەي فەدەراتسياسىنىڭ ۆەتەرينارلىق جانە فيتوسانيتارلىق قاداعالاۋ جونىندەگى فەدەرالدىق قىزمەتى) بەلگىلەگەن تىيىم زاڭسىز بولىپ تابىلادى جانە كەدەرگى دەپ تانىلادى دەپ شەشتى.

رەسەي فەدەراتسياسى ەەك القاسىنىڭ قابىلداعان شەشىمىنە سايكەس بەلگىلەنگەن تىيىمداردى ءبىر اي ىشىندە جويۋ قاجەت.

ەستەرىڭىزگە سالا كەتەيىك، 2020 جىلدىڭ 16 جەلتوقسانىنان باستاپ روسسەلحوزنادزور پاۆلودار وبلىسىنان قىزاناق پەن بۇرىش اكەلۋگە، ال 2021 جىلدىڭ 18 قاڭتارىنان باستاپ اقتوبە جانە الماتى وبلىستارىنان قىزاناق جەمىستەرىنىڭ قوڭىر ءاجىم ۆيرۋسىنىڭ (تomato brown rugose fruit virus) قازاقستاندىق ونىمدە بولۋىنا سىلتەمە جاساي وتىرىپ، تىيىم سالدى.

«ەاەو-نىڭ قۇقىقتىق بازاسىنا سايكەس فيتوسانيتاريالىق باقىلاۋ جانە ءتيىستى شارالار جالپى كەلىسىلگەن تىزبەدە بار ۆيرۋستارعا قاتىستى عانا قولدانىلادى. الايدا، روسسەلحوزنادزور قولدانىستاعى كەلىسىمدەردى بۇزا وتىرىپ، باقىلاۋ شارالارىن جۇرگىزىپ، قازاقستاندىق ونىمدەردى اكەلۋگە تىيىم سالدى.

جەكە زەرتتەۋلەر، سونىڭ ىشىندە نيدەرلاندىدا جۇرگىزىلدى، ولار قازاقستاندىق قىزاناقتار مەن بۇرىشتاردا قانداي دا ءبىر ۆيرۋستاردىڭ جوقتىعىن دالەلدەدى.

ءبىزدىڭ باستامامىز بويىنشا بۇل ماسەلە وسى جىلدىڭ قاڭتار-اقپان ايلارىندا ەاەو ورگاندارىنىڭ الاڭىندا بىرنەشە رەت قارالدى. بارلىق سەرىكتەستەر، رەسەيلىكتەردى قوسپاعاندا، ءبىزدى قولدادى. اۋىل شارۋاشىلىعى مينيسترلىگىمەن بىرلەسكەن جۇمىس ناتيجەلەرى بويىنشا ءىرى جەتكىزۋشىلەردەن شەكتەۋلەردى الىپ تاستاۋعا مۇمكىندىك تۋدى.

سونىمەن قاتار، جالپى قازاقستاندىق ونىمدەردى اكەلۋگە تىيىم سالۋ جۇمىسىن جالعاستىردى.

تىيىم سالۋ بەلگىلەنگەن ساتتەن باستاپ قازاقستاندىق كاسىپورىندار 200 ملن. تەڭگەدەن استام سومانى جوعالتقانىن اتاپ وتكىم كەلەدى. ەەك القاسى ءبىزدىڭ دالەلدەرىمىزدى ەستىدى جانە رەسەي بيلىگىنىڭ ارەكەتتەرىن توسقاۋىل دەپ تانىدى» - دەپ اتاپ ءوتتى ساۋدا جانە ينتەگراتسيا ۆيتسە-ءمينيسترى.

Abai.kz