بۇگىن سەناتتا «ەۋرازيالىق ەكونوميكالىق وداقتىڭ تاۋار بەلگىلەرى، قىزمەت كورسەتۋ بەلگىلەرى جانە تاۋارلار شىعارىلعان جەرلەردىڭ اتاۋلارى تۋرالى شارتتى راتيفيكاتسيالاۋ تۋرالى» زاڭ قابىلداندى.

«تاۋار وندىرۋشىلەر قازاقستاندا، رەسەيدە، بەلارۋستە، قىرعىزستاندا جانە ارمەنيادا ءبىر مەزگىلدە قولدانىلاتىن ەەاو تاۋارلارى شىعارىلعان جەرلەردىڭ تاۋار بەلگىلەرى مەن اتاۋلارىنىڭ كۋالىكتەرىن الا الادى.

بۇل قازاقستان رەسپۋبليكاسى قاتىسۋشىسى بولىپ تابىلاتىن زياتكەرلىك مەنشىك وبەكتىلەرىن تىركەۋدىڭ بەسىنشى حالىقارالىق جۇيەسى»,- دەپ مالىمدەدى قر ادىلەت مينيسترلىگى.

بۇعان دەيىن اتالعان ماسەلە سەناتتىڭ كونستيتۋتسيالىق زاڭناما، سوت جۇيەسى جانە قۇقىق قورعاۋ ورگاندارى كوميتەتىندە قارالعان بولاتىن.

ناتيجەسىندە، ەندى ەاەو-عا قاتىسۋشى ەلدەردىڭ 5 ۇلتتىق پاتەنتتىك ۆەدومستۆولارىنىڭ كەز كەلگەنىنە پاتەنت الۋ ءۇشىن ءوتىنىم بەرۋ جەتكىلىكتى بولادى. ال وسى مەكەمە ەاەو-نىڭ بارلىق اۋماعىندا قولدانىلاتىن تاۋار بەلگىلەرىن قۇقىقتىق قورعاۋدى قامتاماسىز ەتەتىن بولادى.

بۇرىن ءوتىنىم بەرۋشى تاۋار بەلگىسىنىڭ قورعاۋ قۇجاتىن الۋ ءۇشىن ەاەو-نىڭ بارلىق ەلدەرىنىڭ ۇلتتىق پاتەنتتىك مەكەمەلەرىنە جەكە-جەكە جولىعۋىنا تۋرا كەلگەنىن اتاپ ءوتۋ قاجەت. بۇل راسىمدەر كۇردەلى، ۇزاققا سوزىلاتىن ءارى قىمباتقا تۇسەتىن ەدى.

- شارت راتيفيكاتسيالاعاننان كەيىن ەۋرازيالىق نارىققا باعدارلانعان وتاندىق تاۋار وندىرۋشىلەردىڭ قۇقىقتارىن قورعاۋ دەڭگەيى ارتا تۇسەدى، سونداي-اق ەاەو بۇكىل اۋماعىندا زياتكەرلىك مەنشىك قۇقىقتارىن بۇزۋ قاۋپى قىسقارۋى ءتيىس، - دەگەن بولاتىن كوميتەت حاتشىسى قاناتبەك سافينوۆ. 

Abai.kz