جۋرناليست ەربول ماندىبەك Facebook پاراقشاسىندا ۇكىمەت مۇشەلەرى بيۋدجەتتىڭ قىرۋار قارجىسىنا ۇشاق جالدايتىنى جايلى جازعان بولاتىن. ونىڭ جازعانىن رەسمي بيلىك جوققا شىعاردى. 

«پرەمەر-مينيستر اسقار ءماميننىڭ ۇشاعىنا ارتىق ادام وتىرمايدى. ماسەلەن، وڭىرلەرگە جۇمىس ساپارى كەزىندە ۆيتسە-پرەمەرلەرگە بولەك بيزنەس-ۇشاق قاراستىرىلعان. وعان مينيسترلەردىڭ مىڭگەسۋىنە رۇقسات. بيزنەس ساناتتاعى ۇشاقتىڭ 1 ساعاتى كەمى 5000 ەۆرودان باستالادى. 10 ساعات جالداساڭىز 50 000 ەۆرو. ۇلتتىق ۆاليۋتامەن ەسەپتەسەڭىز شامامەن 25 ميلليون تەڭگە. بۇل-ءبىر باعىتتىڭ عانا شىعىنى. ال، حالىقارالىق ۇشۋلار قۇنى 40 000 ەۆرودان باستالادى. جىلىنا كەمىندە ىشكى جانە سىرتقى 30-40 جۇمىس ساپارى جوسپارلانادى. ونىڭ شىعىنىن ەسەپشوتقا سوعا بەرىڭىز. سوماسى ميللياردتاردى قۇرايدى.

پرەمەر-ءمينيستردى، 4 ۆيتسە-پرەمەردى جانە مينيسترلەردى، سەنات پەن ءماجىلىس توراعالارىن «تۋدا-سيۋدا» تاسىمالداۋعا جىل سايىن رەسپۋبليكالىق بيۋدجەتتەن 15 000 000 000-20 000 000 000 (ون بەس-جيىرما ميلليارد تەڭگە) قاراستىرىلادى»،- دەگەن ەدى جۋرناليست ماندىبەك.

الايدا ءماميننىڭ ءباسپاسوز قىزمەتى بۇل اقپاراتتاردى تولىقتاي جوققا شىعاردى. ءباسپاسوز قىزمەتى:

«2021 جىلعا قر پرەمەر-ءمينيسترى مەن پرەمەر-ءمينيستردىڭ ورىنباسارلارى باستاعان قازاقستاندىق دەلەگاتسيالاردىڭ اسا ماڭىزدى ۇشۋ ساپارلارىن (ليتەرلىك رەيستەردى) جۇزەگە اسىرۋعا 578 ملن تەڭگە مولشەرىندە شىعىس قاراجاتى قاراستىرىلعان.

كورسەتىلگەن سوما 2021 جىلى كولىك قىزمەتتەرىن قامتاماسىز ەتۋگە ەسەپتەلگەن. بۇل رەتتە تولەم قازاقستاندىق دەلەگاتسيالاردىڭ ورىندالعان ناقتى وڭىرلىك جانە حالىقارالىق ۇشۋ جاعدايلارى بويىنشا تولەنەدى. مىسالى، 2020 جىلى وسى ماقساتقا 578 ملن تەڭگە قاراستىرىلسا، ءىس جۇزىندە 275,6 ملن تەڭگەگە جۇمسالدى.

پرەمەر-مينيستر مەن پرەمەر-ءمينيستردىڭ ورىنباسارلارىندا تەك ولارعا بەكىتىلگەن جەكە ۇشاقتار جوق.

ۇشاق ارقىلى جۇزەگە اسىرىلاتىن ساپارلار ەلىمىزدىڭ الەۋمەتتىك-ەكونوميكالىق دامۋ ماسەلەلەرىن شەشۋ ءۇشىن قر وڭىرلەرى ىشىندە، سونداي-اق مەملەكەت باسشىسىنىڭ شەت ەلدەرمەن، ونىڭ ىشىندە ەۋرازيالىق ەكونوميكالىق وداق جانە باسقا دا بىرلەستىكتەر اياسىندا ەكونوميكالىق ىنتىماقتاستىقتى دامىتۋ جونىندەگى تاپسىرمالارىن ورىنداۋ ماقساتىندا تاياۋ جانە الىس شەتەل مەملەكەتتەرىنە تەك قىزمەتتىك ماقساتتاردا ورىندالادى.

«كەستەسىز جولاۋشىلاردى تاسىمالداۋ بويىنشا اۋە كولىگى قىزمەتتەرىن (ىشكى جانە حالىقارالىق)» قر ءپىب «بۇركىت» مەملەكەتتىك اۋە كومپانياسى» شجق رمك كورسەتەدى. مينيسترلەر باستاعان قازاقستاندىق دەلەگاتسيالاردىڭ ۇشۋ ساپارلارىن كوممەرتسيالىق اۋە كومپانيالارىنىڭ رەيستىك جولاۋشىلار ۇشاقتارى جۇزەگە اسىرادى.

قازاقستاندىق مەملەكەتتىك باق-تىڭ بۇرىنعى ءجۋرناليستى ۇشاقتا قىزمەت كورسەتۋگە قىزىل جانە قارا ۋىلدىرىق، اراق پەن ۆيسكي، ەكزوتيكالىق جەمىستەر كىرەتىنىن جازدى، بۇل دا شىندىققا جاناسپايدى.

ۇشۋ ۇزاقتىعى 1 ساعاتقا دەيىن بولعان جاعدايدا جولاۋشىلارعا الكوگولسىز سالقىن سۋسىندار مەن سنەكتەر، ۇزاقتىعى 1-3 ساعات بولعان كەزدە ىستىق تاماق پەن ىستىق سۋسىندار (شاي، كوفە) بەرىلەدى. بورتتا تاماقتاندىرۋ ارەكەت ەتىپ تۇرعان زاڭناماعا – «قازاقستان رەسپۋبليكاسىنىڭ اۋە كەڭىستىگىن پايدالانۋ جانە اۆياتسيا قىزمەتى تۋرالى» قر زاڭىنا، جولاۋشىلاردى، باگاجدى جانە جۇكتەردى اۋە كولىگىمەن تاسىمالداۋ قاعيدالارىنا جانە باسقا دا نورماتيۆتىك قۇقىقتىق اكتىلەرگە سايكەس ۇسىنىلادى»،- دەدى.

جۋرناليست ماندىبەكتىڭ ايتقانى مەن ءمامين ءباسپاسوزىنىڭ ماعلۇماتى ءبىر-بىرىنە كەرەعار بولىپ تۇر. قايسىسى وتىرىك، قايسىسى شىن؟ ونى پاتشا كوڭىلىڭىزدىڭ تارازىسىنا سالىڭىز.

Abai.kz