الماتى وبلىسىندا سوڭعى اپتادا كوروناۆيرۋسپەن اۋىرعانداردىڭ ءوسۋ قارقىنى 0,6 پروتسەنتتى قۇراپ، وتكەن تاۋلىكتە 99 جاعداي تىركەلگەن. وسىعان بايلانىستى وڭىردە كارانتين رەجيمى كۇشەيتىلەدى. بۇل تۋرالى ۇكىمەت وتىرىسىندا وبلىس باسشىسى اماندىق باتالوۆ ايتتى. 

بۇگىندە ينفەكتسيالىق ستاتسيوناردىڭ تولىمدىلىعى 43 پروتسەنتتى، رەانيماتسيالىق توسەكتەر تولىمدىلىعى 15 پروتسەنتتى قۇراپ وتىر.

باتالوۆتىڭ ايتۋىنشا، ينفەكتسيالىق ستاتسيونارداعى توسەكتەر سانى 412-گە كوبەيتىلىپ، قازىر سانى 1 550 بىرلىككە جەتكىزىلدى.

بيىلعى جىلدىڭ باسىنان باستاپ 11 پتسر-زەرتحاناسىندا 137 مىڭ تەست وتكىزىلگەن. 391 ءموبيلدى بريگادا كوروناۆيرۋس كۇدىگى بار ناۋقاستاردىڭ ۇيىنە بارىپ 50,7 مىڭنان استام مەديتسينالىق قىزمەت كورسەتتى.

وبلىستا اۋرۋ دەڭگەيىنىڭ وسۋىنە بايلانىستى كارانتيندىك رەجيم كۇشەيتىلدى.

بەلگىلى بولعانداي، مەكتەپكە دەيىنگى مەكەمەلەردىڭ، قوعامدىق تاماقتانۋ وبەكتىلەرىنىڭ، ءدىني ۇيىمدارىنىڭ، قوعامدىق مونشالار مەن كولىكتىڭ جۇمىسى ساعات 17-گە دەيىن، ويىن-ساۋىق وبەكتىلەرى مەن مەيرامحانالاردىڭ جۇمىسى ساعات 21-گە دەيىن كەلۋشىلەر سانىن ەسكەرە وتىرىپ شەكتەلدى. دەمالىس كۇندەرى وبلىستا تولىق لوكداۋن ەنگىزىلەدى.

«الماتى قالاسى مەن وبلىس اراسىندا حالىق كوشى-قونىنىڭ جيىلەۋىنە بايلانىستى قالا ماڭىنداعى جامبىل، قاراساي، تالعار، ەڭبەكشىقازاق، ىلە اۋداندارىندا اۋرۋ دەڭگەيىنىڭ ءبىرشاما ءوسۋى بايقالادى، باس سانيتارلىق دارىگەرلەر شەكتەۋ شارالارىن كۇشەيتۋ جونىندە جەكەلەگەن قاۋلىلار قابىلدادى», - دەپ اتاپ ءوتتى ا.باتالوۆ.

وڭىردە كارانتيندىك شارالاردى ساقتاۋ جونىندەگى مونيتورينگتىك توپتاردىڭ جۇمىسى كۇشەيتىلدى.

1 قاڭتاردان باستاپ 6797 رەيد بارىسىندا 449 كارانتيندىك رەجيمدى بۇزۋ انىقتالدى، 410 حاتتاما تولتىرىلىپ، ايىپپۇل سالىندى.

كوروناۆيرۋستىق ينفەكتسياعا قارسى ۆاكتسينا سالۋ 30 ەگۋ پۋنكتىندە جۇرگىزىلەدى، 6883 ادامعا ەكپە جاسالدى.

اتاپ وتسەك، قازىر الماتى وبلىسى «سارى» ايماقتا تۇر. اۋرۋحانالاردا 685 ادام ەم قابىلداپ جاتىر، سونىڭ 22-ءسىنىڭ جاعدايى اۋىر.

Abai.kz