قازاقستاندىق مۋزىكانت يمانبەك زەيكەنوۆتىڭ SAINt JHN اتتى ءانشىنىڭ Roses انىنە جازىلعان رەميكسى Grammy سىيلىعىن جەڭىپ الدى. بۇل تۋرالى قازاقپارات مالىمدەدى.

ول ءتورت ۇمىتكەردىڭ ىشىنەن ۇزدىك شىققان. كەيىننەن رەپەردىڭ ءوزى Instagram پاراقشاسىندا ۆيدەو جاريالادى.

سىيلىقتى العان ساتىندە ول ەڭ الدىمەن اتا-اناسىنا، كومانداسىنا، مەنەدجەرىنە جانە وسى سىيلىققا لايىق دەپ تاپقان Grammy قازىلارىنا العىسىن جەتكىزەدى.

«ءار مۋزىكانتتىڭ كارەراسىنداعى ەڭ كەرەمەت ءسات - Grammy سىيلىعىن يەلەنۋ. ءبىز وسى جەتىستىككە قول جەتكىزدىك!» دەپ جازادى يمانبەك زەيكەنوۆ.

تاياۋدا كوپشىلىككە ديدجەي رەتىندە تانىلعان جەرلەسىمىز Imanbek Rita Ora جانە David Guetta سياقتى الەمگە ايگىلى مۋزىكانتتارمەن بىرگە ءان جازعان بولاتىن.

ايتا كەتەيىك، Roses رەميكسىمەن الەمدىك مۋزىكا چارتتارىندا سۋىرىلىپ العا شىققان يمانبەك زەيكەنوۆ اتا-اناسىمەن بىرگە پاۆلودار وبلىسىنىڭ اقسۋ قالاسىندا تۇرادى.

ءوزىنىڭ ايتۋىنشا، ول ءان ارلەۋدى جەرگىلىكتى ديدجەيلەر مەن پروديۋسەرلەردەن جانە Youtube جەلىسىندەگى ۆيدەوساباقتان ۇيرەنگەن.

وتكەن جىلدىڭ جەلتوقسانىنا دەيىن ول جەرگىلىكتى تەمىر جول ستانساسىندا جۇمىس ىستەدى. 2019 جىلدىڭ جازىندا يمانبەك Saint Jhn اتتى رەپەردىڭ Roses اتتى ءانىن تاۋىپ، سوعان رەميكس جازۋدى قولعا الادى.

بۇل كومپوزيتسيا ءۇش جىل بۇرىن شىعىپ قويعان بولاتىن. يمانبەك انگە رەميكس جازىپ، ونى الەۋمەتتىك جەلىگە جاريالادى. ارادا بىرنەشە اي وتكەندە ول پوپ جۇلدىزعا اينالدى.

ءتىپتى، امەريكانىڭ The New York Times گازەتىندە يمانبەك جايلى ماقالا دا جاريالاندى.

Abai.kz