الماتى وبلىسى ءبىلىم باسقارماسىنىڭ باستىعى مايگۇل وماروۆا سوتقا دەيىنگى تەرگەۋ بارىسىندا قاماۋعا الىندى، دەپ حابارلايدى zakon.kz.

بۇل تۋرالى وبلىستىق پروكۋراتۋرانىڭ رەسمي ساۋالعا بەرگەن جاۋابىندا ايتىلادى. ءبىلىم بەرۋدەگى اقپاراتتىق تەحنولوگيالار سالاسىنداعى وبلىستىق عىلىمي-زەرتتەۋ ورتالىعىنىڭ ديرەكتورى اراپبي مەڭلىباەۆ تا قاماۋعا الىندى.

پروكۋراتۋرا 2021 جىلدىڭ 1 اقپانىندا قازاقستان رەسپۋبليكاسى سىبايلاس جەمقورلىققا قارسى ءىس-قيمىل اگەنتتىگىنىڭ (سىبايلاس جەمقورلىققا قارسى قىزمەت) الماتى وبلىسى بويىنشا دەپارتامەنتى قازاقستان رەسپۋبليكاسى قىلمىستىق كودەكسىنىڭ 366-بابى، 4-تارماعى (الدىن الا كەلىسىم بويىنشا ادامدار توبىنىڭ پارا الۋى) جانە 367-باپتىڭ 4-تارماعى (الدىن الا كەلىسىم بويىنشا اسا ءىرى كولەمدە توپ ادامنىڭ پارا بەرۋى) بويىنشا قىلمىستىق قۇقىق بۇزۋشىلىقتاردى جاسادى دەگەن كۇدىكپەن الماتى وبلىسى ءبىلىم بەرۋ مەملەكەتتىك مەكەمەسىنىڭ لاۋازىمدى تۇلعالارى جانە باسقالارىنا قاتىستى سوتقا دەيىنگى تەرگەۋ امالدارىن باستاعانىن حابارلادى.

«2021 جىلدىڭ 4 اقپانىندا تالدىقورعان قالاسىنىڭ مامانداندىرىلعان تەرگەۋ سوتى كۇدىكتىلەر - وماروۆا م.ت. مەن مەڭلىباەۆ ا.ا.-عا قاتىستى ەكى ايعا قاماۋعا الۋ تۇرىندە، كۇدىكتى ابدولدانوۆ ب.س-عا قاتىستى ۇيقاماققا الۋ تۇرىندە بۇلتارتپاۋ شاراسىن تاعايىندادى. قازىرگى ۋاقىتتا ءىس بويىنشا سوتقا دەيىنگى تەرگەۋ ءجۇرىپ جاتىر. تەرگەۋ مۇددەلەرىنە قاتىستى باسقا اقپارات قىلمىستىق ءىس جۇرگىزۋ كودەكسىنىڭ 201-بابى بويىنشا جاريا ەتۋگە جاتپايدى»، - دەلىنگەن رەسمي جاۋاپ حاتتا.

بۇعان دەيىن بۇقارالىق اقپارات قۇرالدارىندا وبلىستىق ءبىلىم باسقارماسىنىڭ باستىعى وماروۆانىڭ جەكە كاسىپكەر وكىلىنەن 37 650 000 تەڭگە پارا العانى ءۇشىن ۇستالعانى تۋرالى اقپارات تاراعان.

Abai.kz