بەلگىلى ايتىسكەر رينات زايىتوۆ «الاتاۋ» ءداستۇرلى ونەر تەاترى كوممۋنالدىق مەملەكەتتىك قازىنالىق كاسىپورنىنىڭ ديرەكتورى بولىپ تاعايىندالدى.

«قادىرلى اعايىن، بۇگىن الاتاۋ ءداستۇرلى ونەر تەاترىنا قىزمەتكە تاعايىندالدىم. جالعان سويلەپ، اقتالۋدان اۋلاقپىن. دەگەنمەن دە قايدا بارىپ، نە ىستەسەم دە بارلىعى اۋەلى جاراتۋشى، سونان سوڭ ومىرلىك تىلەكشىم، ساقتاۋشىم، جاناشىرىم دا حالىق بولعاندىقتان ءبىر اۋىز ءتۇسىندىرىپ وتەيىن.

ادام ءبىر نارسەگە قابىلەتتى ەكەنىن كورسەتپەيىنشە، ەشكىمگە ەشتەڭەنى قۇر سوزبەن دالەلدەي المايتىنى ايدان انىق. سوندىقتان ماعان بەرىلگەن بۇل مۇمكىندىك ءبىرىنشى كەزەكتە وزىمە سىناق»،- دەپ جازدى زايىتوۆ.

سونداي-اق، ول وزىنە سەنىم بىلدىرگەن الماتى قالاسىنىڭ مادەنيەت باسقارماسىنا العىسىن ايتتى.

«ءۇش جۇزگە سويلەپ جۇرگەن اقىندارىڭىز ەكى ءجۇز ادامدى جۇمىلدىرىپ جۇمىس ىستەتە الماسا، ونىڭ پايداسى نە؟. وسى سوزبەن كەلىسەتىن شىعارسىزدار؟. ومىردەگى ەڭ ۇلكەن تىلەگىم ءوز ەلىمنىڭ ءبىر بۇرىشىندا قازاق ونەرىنە ادال قىزمەت ەتۋ عانا. ونى تالاي جەردە ايتىپ تا ءجۇردىم. مىنە سول تىلەگىمنىڭ العاشقى كۇنى بۇگىن ءوتتى. قۇتتىقتاۋ ارتىق. ساتتىلىك تىلەسەڭىزدەر العىسىم شەكسىز. الماتى قالاسىنىڭ، مادەنيەت باسقارماسىنىڭ باسشىلىعىنا سەنىم بىلدىرگەنىنە كوپ راحمەت»،- دەپ جازدى ايتىسكەر.

ايتا كەتەيىك، رينات زايىتوۆ 2019 جىلى پرەزيدەنت سايلاۋىنان كەيىن ميتينگ ۇيىمداستىردى دەگەن ايىپپەن «الاتاۋ» ءداستۇرلى ونەر تەاترىنىڭ الدىندا ۇستالعان بولاتىن.

Abai.kz