«ەرەكشە قاجەتتىلىگى بار بالالار ءۇشىن انيماتسيا مەكتەبى اشىلادى»
«Balapan» تەلەارناسىنىڭ جانىنان «ەرەكشە ءبىلىم الۋ قاجەتتىلىكتەرى بار بالالارعا ارنالعان انيماتسيا مەكتەبى» جوباسى جۇزەگە اسىرىلا باستايدى.
بۇل تۋرالى قر اقپارات جانە قوعامدىق دامۋ ءمينيسترى ايدا بالاەۆا Facebook پاراقشاسىندا جازدى.
«مەملەكەت باسشىسى قاسىم-جومارت توقاەۆ ايتقانداي، ءبىز ەرەكشە قاجەتتىلىكتەرى بار ادامدار ءۇشىن بىردەي مۇمكىندىك جاساۋعا مىندەتتىمىز. كەز كەلگەن وركەنيەتتى، رۋحى بيىك قوعامنىڭ ۇستانىمى وسىنداي بولسا كەرەك.
ححI عاسىر مىڭ قۇبىلعان، سىندارلى كەزەڭ عانا ەمەس، بۇل – جاڭا مۇمكىندىكتەر زامانى. اسىرەسە، ايرىقشا قاجەتتىلىكتەرى بار ەرەكشە بالالاردى قوعامعا بەيىمدەۋ، زامان كوشىنەن قالدىرماۋ – بارشامىزعا ورتاق مىندەت.
وسى ورايدا، «قازاقستان» تەلەراديوكورپوراتسياسى «Balapan» تەلەارناسىنىڭ جانىنان «ەرەكشە ءبىلىم الۋ قاجەتتىلىكتەرى بار بالالارعا ارنالعان انيماتسيا مەكتەبى» جوباسىن جۇزەگە اسىرۋ باستاماسىن كوتەرىپ وتىرمىن.
بۇل شەشىمنىڭ ۇتىمدى تۇستارىنا توقتالا كەتەيىن. بىرىنشىدەن، انيماتسيا سالاسى ەلىمىزدە جوعارى قارقىنمەن دامىپ كەلەدى. سوندىقتان انيماتسيا ماماندارى وتاندىق جانە حالىقارالىق نارىقتا قاشان دا سۇرانىسقا يە بولارى ءسوزسىز. ەكىنشىدەن، بۇل دەنساۋلىعىنا بايلانىستى ءبىر ورىندا وتىرىپ جۇمىس ىستەۋگە ءماجبۇر ازاماتتار ءۇشىن وتە پايدالى الاڭ بولماق. ۇشىنشىدەن، جوبا جاس تالانتتاردىڭ جۇلدىزىن جاعاتىن، ولاردىڭ ارمانعا جەتۋ جولىنداعى العاشقى باسپالداعى بولادى دەپ سەنەمىز»، - دەدى مينيستر.
ايدا بالاەۆانىڭ ايتۋىنشا، ايرىقشا ءبىلىم الۋ قاجەتتىلىكتەرى بار بالالارعا جاڭا مۇمكىندىك سىيلاۋدى كوزدەيتىن جانە جۇمىسپەن قامتۋعا جاردەمدەسەتىن مەكتەپ جۇمىسى اقپان ايىندا باستالماق.
«وقىتۋ 14-16 جاستاعى بالالار اراسىندا 6 اي بويى جۇرگىزىلەدى. وسى ورايدا قايىرىمدىلىق جوباسىنا ەرىكتىلىك تانىتىپ، قولداۋ ءبىلدىرىپ وتىرعان ەلىمىزدەگى جەتەكشى مۋلتيپليكاتسيا ماماندارىنا العىس بىلدىرەمىن.
«ەرەكشە ءبىلىم الۋ قاجەتتىلىكتەرى بار بالالارعا ارنالعان انيماتسيا مەكتەبىنە» وتىنىمدەر balapantv@kaztrk.kz ەل.پوشتاسى ارقىلى قابىلدانادى»، - دەپ تۇيىندەندى ۆەدومستۆو باسشىسى.
ايتا كەتەرلىگى، قر اقپارات جانە قوعامدىق دامۋ مينيسترلىگى قازىرگى ۋاقىتتا كورەيلىك جانە جاپوندىق سەرىكتەستەرىمەن سول ەلدىڭ ماماندارىنىڭ قازاقستاندىق جاس ماماندارعا انيماتسيانى وقىتۋ جانە شەبەرلىك ساباعىن وتكىزۋىنە قاتىستى كەلىسسوزدەر وتكىزىپ جاتىر.
Abai.kz
