2021 جىلعى 1 قاڭتاردان باستاپ قازاقستاندا جالپىعا بىردەي دەكلاراتسيالاۋ ءتارتىبى كۇشىنە ەنەدى.

قر قارجى مينيسترلىگى مەملەكەتتىك كىرىستەر كوميتەتىنىڭ جالپىعا بىردەي دەكلاراتسيالاۋ باسقارماسىنىڭ باسشىسى دينا قۇسايىنوۆا العاشقى كەزەڭدە كىمدەر دەكلاراتسيا تاپسىرۋى كەرەكتىگىن ءتۇسىندىردى.

«جالپىعا بىردەي دەكلاراتسيانىڭ باستى ماقساتى – كولەڭكەلى ەكونوميكامەن كۇرەس، سىبايلاس جەمقورلىققا قارسى قۇرالدى قالىپتاستىرۋ ءارى ەل بيۋدجەتىن تولىقتىرۋ. جالپىعا بىردەي دەكلاراتسيالاۋعا ەلدىڭ ءاربىر ازاماتىنىڭ ءومىرىن جاقسارتۋدىڭ كوپتەگەن مۇمكىندىگى كىرەدى. 2021 جىلعى 1 قاڭتاردان باستاپ ءبىزدىڭ ءبارىمىز جالپىعا بىردەي دەكلاراتسيالاۋ جۇيەسىنە ەنەمىز. العاشقى كەزەڭدە وعان مەملەكەتتىك قىزمەتشىلەر، ولارعا تەڭەستىرىلگەن جۇبايلارى كىرەدى»، - دەدى دينا قۇساينوۆا

ونىڭ ايتۋىنشا، مەملەكەتتىك قىزمەتكەرلەر بۇرىن كورسەتپەگەن بەلگىلى ءبىر اكتيۆتەر بار. وعان دەبيتورلىق بەرەشەك، قۇندى مۇلىك، ينۆەستيتسيالىق التىن، مۇلىك، اۆتورلىق قۇقىق، قولما-قول اقشا دا كىرەدى.

«دەكلاراتسيانى 2021 جىلدىڭ 1 قاڭتارىنان باستاپ تاپسىرۋعا مىندەتتى ادام 2020 جىلدىڭ 31 جەلتوقسانىنداعى جاعداي بويىنشا بارلىق اكتيۆى مەن مىندەتتەمەلەرىن كورسەتۋى ءتيىس.

دەكلاراتسيانى ناقتى كىم تاپسىرادى؟

2021 جىلدىڭ 1 قاڭتارىنان باستاپ دەكلاراتسيانى جاۋاپتى مەملەكەتتىك قىزمەتتى اتقاراتىن ادامدار جانە ولاردىڭ جۇبايلارى، مەملەكەتتىك فۋنكتسيالاردى ورىنداۋعا ۋاكىلەتتى ادامدار جانە ولاردىڭ جۇبايلارى، مەملەكەتتىك فۋنكتسيالاردى ورىنداۋعا ۋاكىلەتتىك بەرىلگەن ادامدارعا تەڭەستىرىلگەن ادامدار جانە ولاردىڭ جۇبايلارى تاپسىرادى.

ودان بولەك، بۇل ساناتقا كونستيتۋتسيالىق زاڭعا، قر سايلاۋ تۋرالى جانە سىبايلاس جەمقورلىققا قارسى ءىس-قيمىل تۋرالى، قر بانكتەرى جانە بانكتىك قىزمەتى تۋرالى، ساقتاندىرۋ قىزمەتى تۋرالى زاڭدارعا سايكەس دەكلاراتسيا تاپسىرۋ مىندەتى جۇكتەلگەن ادامدار دا كىرەدى»، - دەدى دينا قۇسايىنوۆا.

Abai.kz