قر پرەزيدەنتىنىڭ كومەكشىسى ەرلان كارين 2020 جىلدىڭ ساياسي قورىتىندىسىن شىعاردى. بۇل تۋرالى ول تelegram كانالىندا جازدى.

«بۇكىل الەمدەگىدەي قازاقستان ءۇشىن دە ءوتىپ بارا جاتقان جىل وتە كۇردەلى بولدى. دەگەنمەن، اۋقىمدى قيىندىقتارمەن سىرتقى جايتتاردىڭ قىسىمىنا قاراماستان، بيلىك وقيعا دامۋىنىڭ تەرىس ستسەناريلەرىنىڭ جۇزەگە اسۋىنا جول بەرمەدى.

ءىس جۇزىندە جىل بويى بارلىق مەملەكەتتىك ورگاندار - پرەزيدەنت اكىمشىلىگى، ۇكىمەت، اكىمدىكتەر ۇلكەن ءبىر داعدارىسقا قارسى شتاب رەتىندە توتەنشە جاعداي رەجيمىندە جۇمىس ىستەدى. پاندەميا كوپتەگەن جوسپارعا تۇزەتۋ جاساعانىمەن ول مەملەكەتتىڭ جالپى كۇنتارتىبىن تۇبەگەيلى وزگەرتە العان جوق»،- دەپ جازدى

كاريننىڭ ايتۋىنشا، بيلىك مالىمدەگەن رەفورمالار باعدارىن جالعاستىرۋ ۇستىندە. ساياسي رەفورمالاردىڭ العاشقى توپتاماسى جۇزەگە اسىرىلىپ، ونىڭ اياسىندا بەيبىت جينالىستار تۋرالى مۇلدەم جاڭا زاڭ قابىلداندى.

«زاڭ بىردەن جۇمىس ىستەي باستادى. سايلاۋ، پارتيالار جانە پارلامەنت تۋرالى زاڭنامالارعا دا وزگەرتۋلەر ەنگىزىلدى. جاڭا نورمالار دا ءىس جۇزىندە جۇزەگە اسىرىپ جاتىر. تاۋەلسىزدىك كۇنى قارساڭىندا پرەزيدەنت كەلەسى جىلدىڭ باسىندا-اق ساياسي رەفورمالاردىڭ كەزەكتى توپتاماسى قابىلداناتىندىعىن جاريالادى. بۇل رەفورمالارعا باعدار ساقتالاتىندىعىن جانە جالعاساتىندىعىن بىلدىرەدى»، - دەدى ول.

ونىڭ سوزىنشە، ءوتىپ بارا جاتقان جىلدا قوعامدىق-ساياسي الاڭداعى وزگەرىستەر جالعاسىپ تاپتى. جاڭا قوعامدىق تۇلعالار مەن ءتۇرلى بەلسەندى ازاماتتىق توپتار پايدا بولدى. ساياسي پارتيالاردا دا بۋىن الماسۋى ورىن الىپ، جاڭا تۇلعالار شىعا باستادى.

«سوندىقتان دا پاندەميا سىندى قۋاتتى سترەسس-تەستپەن بەتپە-بەت كەلگەن قازاقستاننىڭ كوروناداعدارىستىڭ تەرىس اسەرىن تومەندەتە العانى جانە ءوزىنىڭ دامۋ كۇنتارتىبىن جۇزەگە اسىرۋىن جالعاستىرۋى جىلدىڭ جالپى قورىتىندىسى سانالادى»، - دەدى ول.

Abai.kz