پاۆلوداردا حاكىم ابايعا ەسكەرتكىش ورناتىلدى.بۇل تۋرالى 24 kz مالىمدەدى.

ۇلى ويشىل، كەمەڭگەر اقىن، قازاقتىڭ ماقتانىشى – اباي قۇنانباەۆتىڭ 175 جىلدىق مەرەيتويىن ەرتىس ءوڭىرىنىڭ جۇرتشىلىعى وسىنداي تاريحي وقيعامەن قورىتىندىلاپ وتىر.

ەسكەرتكىشتىڭ تۇعىرى ءمارمار تاستان سوعىلعان. كوركەم قولادان قۇيىلعان ءمۇسىنىنىڭ بيىكتىگى – 5,25 مەتر. وعان «ادامزاتتىڭ ءبارىن ءسۇي، باۋىرىم دەپ...» دەگەن ابايدىڭ  سوزدەرى جازىلعان. اۆتورى – قازاقستان سۋرەتشىلەر وداعىنىڭ مۇشەسى، ءمۇسىنشى اسقار نارتوۆ.

ايتا كەتەيىك، ول باياناۋىلداعى شاكەن ايمانوۆتىڭ دا ەسكەرتكىشىن سومداعان.

رىمتاي شوكەەۆ، وبلىستىق ارداگەرلەر كەڭەسىنىڭ توراعاسى:

- ۇلى ابايدى بىلمەيتىن كىسى جوق. ءبىز مىناۋ ەكى مەملەكەتتىڭ شەكاراسىندا تۇرامىز. سوندىقتان ۇلى ابايدىڭ ەسكەرتكىشى ءبىزدىڭ پاۆلودار قالاسىنا اشىلۋىنىڭ ءوزى كەلەشەككە كەلىپ جاتقان ۇرپاققا وتە قاسيەتى زور. سوندىقتان مەن پاۆلودار وبلىسىنىڭ تۇرعىندارىن وسى ۇلى ابايدىڭ ەسكەرتكىشى اشىلعانىمەن قۇتتىقتايمىن.

عاريفوللا ەسىم، فيلوسوفيا عىلىمدارىنىڭ دوكتورى:

- ەسكەرتكىش ابايعا كەرەگى جوق، ەسكەرتكىش بىزگە جانە بىزدەن كەيىنگى ۇرپاققا كەرەك. وسىنداي ەسكەرتكىشتى مەن ازەربايجاندا نيزاميعا قويعاندى كوردىم. مەن وزبەكستاندا ناۋايعا قويعاندى كوردىم. تۇركيادا يۋنۋس ەمرەگە قويعاندى كوردىم. ءوزىن ەلمىن، حالىقپىن، مەملەكەتپىن دەگەن جەردە سول ەلدىڭ مىقتى-مىقتى تۇلعالارىنا ەسكەرتكىش قويىلادى. بۇل وركەنيەتتىك ءتاسىل. سوندىقتان سىزدەر وسى وركەنيەتتىك جولعا ءتۇسىپ وتىرسىزدار. بۇل – ابايدىڭ جولى، ەلدىڭ جولى.

Abai.kz