ۇلىبريتانيادا كوروناۆيرۋس ىندەتىنىڭ جاڭا شتاممى تابىلدى. ول بۇرىنعىدان گورى 70 پايىزعا جۇقپالى دەيدى، ماماندار. ۇلىبريتانيا پرەمەرى بوريس جونسون اتالعان كوروناۆيرۋستىڭ جاڭا شتاممىنىڭ جەدەل ورشۋىنە، مۋتاتسيالانعان ۆيرۋستىڭ ءولىم-ءجىتىم كورسەتكىشىنىڭ جوعارى بولۋىنا قاتىستى پىكىر ايتىپتى.

ءوزىنىڭ Twitter-ىندە: «بۇل تۋرالى [ۆيرۋستىڭ جاڭا شتاممى] ايتارلىقتاي سەنىمسىزدىك بار، جانە ول ءبىز قاراستىرعان تۇپنۇسقاعا قاراعاندا 70%-عا جۇقپالى بولۋى مۇمكىن»، - دەيدى جونسون.

الايدا ول ۆيرۋستىڭ مۋتاتسيالانعان تۇرىنەن ءولىم-ءجىتىم بۇرىنعىدان گورى جوعارى بولاتىنى تۋرانى ناقتى مالىمەت ازىرگە جوق ەكەنىن ايتادى.

«كوروناۆيرۋستىڭ جاڭا ءتۇرى انىقتالىپ وتىر. سوعان بايلانىستى، ۇلىبريتانيانىڭ كەيبىر ايماقتارىندا اۋرۋدىڭ تارالۋ جىلدامدىعى كۇرت ءوستى»، - دەپ حابارلادى ۇلىبريتانيانىڭ دەنساۋلىق ساقتاۋ ءمينيسترى مەتت حەنكوك. بۇل مالىمدەمە 15 جەلتوقساندا ايتىلعان. ول كەزدە ۇلىبريتانيانىڭ 60 ايماعىندا ۆيرۋستىڭ جاڭا ءتۇرىن جۇقتىرۋدىڭ 1000-نان استام فاكتىسى راستالعان.

لوندون وسى اپتادا Covid-19 ىندەتىنىڭ تارالۋىنا بايلانىستى كارانتيندىك شەكتەۋلەردىڭ ماكسيمالدى، ياعني ءۇشىنشى دەڭگەيىن ەنگىزدى. ۇلىبريتانيا ۇكىمەتىنىڭ 19 جەلتوقسانداعى مالىمەتى بويىنشا، پاندەميا باستالعاننان بەرى ەلدە 2 ميلليوننان استام ادامنان Covid-19 ىندەتى انىقتالعان.  ال 13 جەلتوقساننان 19 جەلتوقسانعا دەيىنگى التى كۇندە 173,3 مىڭ ادام ىندەت جۇقتىرعان. بۇل كورسەتكىش وتكەن اپتاعا قاراعاندا 38,1%-عا كوپ.

ۇلىبريتانيا الەمدە ءبىرىنشى بولىپ ءوز ازاماتتارىنا كوروناۆيرۋستىق ينفەكتسياعا قارسى Covid-19 ۆاكتسيناسىن جاپپاي سالا باستادى.

ال كونوناۆيرۋستىڭ جاڭا ءتۇرىنىڭ پايدا بولۋىنا بايلانىستى ەۋروپا ەلدەرى ۇلىبريتانيامەن اۋە جانە تەمىر جول بايلانىستارىن توقتاتتى. ولار:

نيدەرلاندى 1 قاڭتارعا دەيىن ۇلىبريتانياعا قاتىنايتىن بارلىق جولاۋشىلار ءۇشىن اۋە جانە تەمىر جول بايلانىستارىن توقتاتتى.

فرانتسيا ۇلىبريتانيامەن اراداعى بارلىق بايلانىس جولدارىن 48 ساعاتقا توقاتتى. بۇل شەكتەۋ جولاۋشىلار تاسىمالىنا عانا ەمەس، جۇك تاسىمالدارىنا دا قاتىستى قابىلدانعان.

يرلانديا انگليا، ۋەلc پەن شوتلانديادان قاتىنايتىن بارلىق جولاۋشىلار تاسىمالىن 48 ساعاتقا توقتاتتى.

گەرمانيا جەكسەنبىگە دەيىن بۇل مەملەكەتتەن كەلەتىن اۋە رەيستەرىن توقتاتقان. سونداي-اق، گەرمانيا بارلىق ەۋروپا وداعى ەلدەرىن وسىنداي شەشىم قابىلداۋعا شاقىرعان.

بەلگيا وتكەن جەكسەنبىدە ۇلىبريتانيامەن اۋە جانە تەمىر جول بايلانىستارىن 24 ساعاتقا توقتاتقان.

يتاليا ۇلىبريتانيامەن ەكىارادا قاتىنايتىن بارلىق رەيستەردى 6 قاڭتارعا دەيىن توقتاتقان. وسىعان دەيىن ۆيرۋستىڭ بريتاندىق بەلگىسى يتاليادا دا انىقتالعانى ايتىلعان.

تۇركيا مەن شۆەيتساريا دا ۇلىبريتانيا، دانيا مەن نيدەرلاندىعا قاتىنايتىن بارلىق اۋەرەيستەرىن توقتاتقان. قانشا ۋاقىتقا توقتاتىلعانى ايتىلماعان.

بۇدان بولەك، ساۋد ارابياسى دا شەكاراسىن جاپقان.

كەرىمسال جۇباتقانوۆ

Abai.kz