ازاماتتىق بەلسەندىلەر ءاسيا تولەسوۆا مەن ءاليا جولبولدينا Progress ساياسي پارتياسىن قۇرماق.  بۇل تۋرالى بەلسەندىلەر Instagram مەن Facebook الەۋمەتتىك جەلىلەرىندە وتكەن تىكەلەي ترانسلياتسيا كەزىندە مالىمدەدى، دەپ حابارلايدى malim.kz سايتى. 

“قازىرگى پارلامەنتتە وتىرعان ادامدار مەنىڭ وكىلدەرىم ەمەس. مەنىڭشە، مەن سياقتى ويلايتىندار كوپ. ءبىز پارلامەنت شىن مانىندە حالىق وكىلدەرىنەن قۇرالسا، حالىق مۇددەسىن بىلدىرسە دەيمىز. بۇعان قول جەتكىزۋدىڭ جولى بىرەۋ. ول – ساياسي پارتيا قۇرۋ”، – دەدى ءا.تولەسوۆا.

ء“بىز جاس بۋىن مەن پروگرەسسيۆتى ويلايتىن حالىق سۇرانىسىنا جاۋاپ بەرەتىن پارتيا قۇرعىمىز كەلەدى. بۇل يدەيانى بۇرىننان ءپىسىرىپ جۇردىك. پاريانى قۇرۋ بويىنشا جارتى جىلعا جوسپار جاسادىق. 1 ماۋسىم كۇنى پارتيانىڭ العاشقى قۇرىلتاي سەزىن وتكىزەمىز”، – دەدى ءاليا جولبولدينا.

بەلسەندىلەر ساياسي پارتيانىڭ باعدارلاماسىن جاساۋ ءۇشىن حالىقتان پىكىر جينايتىنىن مالىمدەدى.

“ازاماتتاردان ەلگە قانداي ساياسي رەفورما كەرەك، نەنى وزگەرتۋ كەرەك جايلى پىكىر سۇرايمىز. ايماقتاردا جاقتاستارىمىزدى جينايمىز. پارتيانىڭ سايتىن اشامىز”، – دەدى ءا.جولبولدينا.

ءا.جولبولدينا دا، ءا.تولەسوۆا دا ەلدە ساياسي پارتيانى قۇرۋعا كەدەرگى كوپ ەكەنىن، بۇل ۇزاققا سوزىلاتىن پروتسەسس ەكەنىن مويىندايدى. الايدا بەلسەندىلەر بۇل جاعدايدى وزگەرتۋگە ءۇمىتتى.

“ادىلەت مينيسترلىگىنە پارتيانى تىركەۋ تۋرالى قۇجاتتاردى تاپسىرعان سوڭ، مينيسترلىكتەن جاۋاپ الۋ جىلدارعا سوزىلۋى مۇمكىن ەكەن. الايدا ءبىز ادىلەت مينيسترلىگىنە 20 مىڭ قولدى تاپسىرعان سوڭ، مينيسترلىكتەن پارتيانى تىركەۋ تۋرالى ءوتىنىشتى قاراپ، نە ء“يا”، نە “جوق” دەپ جاۋاپ بەرۋىن تالاپ ەتەمىز. قاجەت بولسا ميتينگىلەر وتكىزەمىز”، – دەدى ءا.جولبولدينا.

ازاماتتىق بەلسەندىلەر پارتيانىڭ ارتىندا ەشكىم تۇرعان جوق، ساياسي جانە بيزنەس وكىلدەرىنەن، كورپوراتسيالاردان، شەتەلدەن جانە وليگارحتاردان قارجى المايتىنىن مالىمدەدى. ولاردىڭ ايتۋىنشا، پارتيا قاراپايىم ازاماتتاردىڭ قولداۋىنا سۇيەنەدى.

“پارتيا قاراپايىم حالىقتىڭ اۋداراتىن اقشاسىنىڭ ەسەبىنەن قارجىلاندىرادى. سايت ارقىلى كەز كەلگەن ادام اقشا اۋدارا الادى”، – دەدى ءا.جولبولدينا.

Abai.kz