وزگەرىستەر مەن تۇزەتۋلەر قىلمىستىق پروتسەسستە ازاماتتاردىڭ قۇقىعىن قورعاۋ مەن كوررۋپتسياعا قارسى كۇرەسكە باعىتتالعان زاڭدارعا ەنگىزىلىپ جاتىر. بۇعان سايكەس، شەنەۋنىكتەرگە شەتەل بانكتەرىنەن ەسەپشوت اشىپ، اقشا ساقتاۋعا تىيىم سالىنادى.
سەناتور نۇرجان نۇرسيپاتوۆ مۇنداي شەكتەۋ ولاردىڭ وتباسى مۇشەلەرىنە دە قاتىسى بار ما دەپ سۇرادى. "رەسەيدە مۇنداي تىيىم 2013 جىلى بارلىق مەملەكەتتىك كورپوراتسيالار مەن كومپانيالارعا ەنگىزىلگەن. سونىمەن بىرگە شەنەۋنىكتەردىڭ وتباسى مۇشەلەرىنە دە ەسەپشوت اشۋعا تىيىم سالىنعان", - دەدى ول.
سەناتور اندرەي لۋكيننىڭ سوزىنشە، جاڭا تالاپتار مەملەكەتتىك قىزمەتكەرلەر مەن دەپۋتاتتارعا جانە سۋديالارعا عانا ارنالعان.
قارجى ءمينيسترى ەرۋلان جاماۋباەۆ قىركۇيەك ايىندا FATF (كولەڭكەلى اقشانى زاڭداستىرۋعا قارسى كۇرەس شارالارى توبى) ۇسىنىسى بويىنشا شەنەۋنىكتەردىڭ وتباسى مۇشەلەرىنە دە شەتەلدەن ەسەپشوت اشۋعا تىيىم سالۋدى قاراستىرىپ جاتقانىن ايتقان.
ماۋسىم ايىندا ەكس-پرەزيدەنت نۇرسۇلتان نازارباەۆتىڭ تۇڭعىش قىزى داريعا مەن ونىڭ ۇلكەن ۇلى ءنۇرالى اليەۆ بريتان سوتىندا لوندون ورتاسىنداعى 100 ميلليون دوللارعا باعالاناتىن ءزاۋلىم سارايىن قايتارىپ الدى. بۇل مۇلىككە قىلمىسقا قارسى كۇرەس ۇلتتىق اگەنتتىگىنىڭ تالابى بويىنشا بۇعات سالىنعان. بيىل تامىز ايىندا لوندوندا داريعا نازارباەۆانىڭ 29 جاستاعى ۇلى ايسۇلتان قايتىس بولدى. ول ءومىرىنىڭ سوڭعى ايلارىندا Facebook پاراقشاسىنا ەلدەگى شەنەۋنىكتەر مەن تۋىستارىنىڭ قاتىسۋىمەن جاسالىنعان ءىرى كوررۋپتسيالىق ارەكەتتەر تۋرالى اشىق جازعان.
Abai.kz
