قازاقستان تۇركياعا اۋە رەيسىن ەكى ەسە قىسقارتىپ، وزبەكستانمەن اۋە قاتىناسىن جانداندىرادى. بۇل تۋرالى يندۋستريا جانە ينفراقۇرىلىمدىق دامۋ مينيسترلىگى مالىمدەدى. 

قازاقستاندا كوروناۆيرۋس ينفەكتسياسى تارالۋىنىڭ الدىن الۋ جونىندەگى ۆەدومستۆوارالىق كوميسسيانىڭ 2020 جىلعى 30 قاراشاداعى شەشىمى وسىنداي بولىپ وتىر.

شەشىمگە سايكەس، قازاقستان رەسپۋبليكاسى دەنساۋلىق ساقتاۋ مينيسترلىگىنىڭ ۇسىنىستارىن، ەپيدەميولوگيالىق احۋالدى ەسكەرە وتىرىپ، 2020 جىلدىڭ 10 جەلتوقسانىنان باستاپ قازاقستان جانە تۇركيا اراسىنداعى ەكى ەلدىڭ اۋە كومپانيالارى ورىندايتىن رەيستەر سانى اپتاسىنا 20-دان 10 رەيسكە دەيىن قىسقارتىلادى.

رەيستەر ەكى ەلدىڭ سانيتارلىق-ەپيدەميولوگيالىق تالاپتارىن قاتاڭ ساقتاي وتىرىپ، اۋە كومپانيالارىنىڭ سايتتارىندا جاريالانعان كەستەگە سايكەس ورىندالادى.

قازاقستان جانە تۇركيا اۋە كومپانيالارىنىڭ رەيستەر كەستەسىندەگى وزگەرىستەر تۋرالى اۋە كومپانيالارىنىڭ انىقتاما قىزمەتتەرىنەن نەمەسە بيلەتتەردى ساتىپ العان ورىنداردان ناقتىلاۋ كەرەك.

سونىمەن قاتار، 10 جەلتوقساننان باستاپ نۇر-سۇلتان مەن تاشكەنت اراسىندا اۋە رەيستەرى قايتا جانداناتىنىن حابارلايدى. ەكى مەملەكەتتىڭ اراسىندا اپتاسىنا ەكى رەت ۇشاق ۇشادى. رەيستەردى «ەير استانا» (بەيسەنبى سايىن) مەن Uzbekistan Airways (سەيسەنبى سايىن) اۋە كومپانيالارى ورىندايدى»، - دەلىنگەن مينيسترلىكتىڭ ءباسپاسوز قىزمەتىنىڭ حابارلاماسىندا.

Abai.kz