سەيسەنبى, 26 قاڭتار 2021
جاڭالىقتار 2285 36 پىكىر 27 قاراشا, 2020 ساعات 18:36

قازاق جانە قىتاي مادەنيەتى...

(ۇقساستىعى مەن ايىرماشىلىعى)

ەل مەن ەلدى بايلانىستىرۋدا مادەنيەت اسپەكتىسى مەن «حالىقتىق ديپلوماتيا» ايرىقشا ءرول اتقارادى. ويتكەنى، مەملەكەتتەر اراسىندا ەكونوميكالىق جانە ساياسي بايلانىس ورناتۋدا قوعامدىق پىكىر ءسوزسىز ماڭىزدى. شىنداپ كەلگەندە، قازاقستان قوعامىندا دا قىتاي جانە قىتاي مادەنيەتىنە قاتىستى پىكىر سىڭارجاق كوزقاراستار مەن ستەرەوتيپتەرگە قۇرىلعانى وتىرىك ەمەس. كوپ جاعدايدا بۇل ستەرەوتيپتەر شىندىققا جاناسپاي جاتادى. ال باق پەن قوعامدىق تالقىدا مادەني ۇقساستىقتار جايلى ءجيى ايتىلا بەرمەيدى. كەرىسىنشە، تۇرمىس-تىرشىلىكتەگى جانە مەنتاليتەتتەگى ءارالۋان ايىرماشىلىقتار اڭگىمە ەتىلەدى.

ازيالىق ىنتىماقتاستىق. قازاق جانە قىتاي حالىقتارىنىڭ مادەني ۇقساستىقتارىن ءسوز ەتەردە، اۋەلى انترومورۆتىق (ناسىلدىك) ۇقساستىقتى ءسوز ەتكەن دۇرىس بولار. قازاقتاردىڭ دەنى (قىتايلار سەكىلدى) ازيالىق كەلبەتكە يە. بۇل دا ءوز الدىنا ازيالىق سايكەستىك پەن بايلانىستىڭ ەرەكشە پلاتفوماسىن قالىپتاستىرۋشى، تۇرمىستىق ومىردەگى ۇقساستىقتىڭ قوسىمشا اسپەكتىسى بولىپ تابىلادى. ءتىپتى، ازيالىق ءسان ۇلگىسى دە، كيىمدەردىڭ تۇرلەرى مەن ءتۇر مەن ءبىتىم ۇقساستىقتارى دا ازيالىق دەگەن ورتاق سيپاتقا يە. سونداي-اق، قىتاي نارىعىنا ارنالعان تۇرمىستاعى حيميالىق تاۋارلار (سۋسابىن، گەلدەر، كرەمدەر مەن باسقا دا تۇرمىستىق زاتتار ت.ب.) رەسەيگە نەمەسە ەۋروپا ەلدەرىنە ارنالعان تاۋارلاردان گورى قازاقتارعا كوبىرەك جاقىن. ياعني، قازاقتاردىڭ كۇندەلىكتى قولدانىسىنا كەرەكتى تاۋارلار دا قىتايلاردىڭ قولداناتىن تۇرمىستىق تاۋارلارىمەن بىردەي-اق...

ايتا كەتۋ كەرەك، بۇگىندە قازاقستانداعى ازيالىق قاۋىمداستىق تۇجىرىمداماسىن وڭتۇستىك كورەيالىق وبرازدار ءساتتى قولدانۋدا. وڭتۇستىك كورەيا پوپ-مادەنيەتىنىڭ قازاقستاندىق جاستاردىڭ اراسىندا اسا تانىمالدىلىعى الەمدىك ارەنادا جانە ەكراندا ۇقساس تۇلعالاردىڭ بولماۋى فاكتورىمەن بايلانىستى.

ەكىنشى جاعىنان ديماش قۇدايبەرگەن مەن ءسابينا التىنبەكوۆالاردىڭ جەتكەن جەتىستىكتەرى قىتاي كورەرمەندەرى ءۇشىن قازاقستاندىق وبرازداردىڭ دا تۇسىنىكتى ءارى قىزىقتى ەكەنىن كورسەتتى. سونداي-اق، ديماش قۇدايبەرگەننىڭ جەتىستىگى قازاق جاستارىنا «ءوز ەڭبەگىنىڭ» ارقاسىندا ازيا كەڭىستىگىندە جەتىستىككە جەتۋگە بولاتىندىعىن جانە قىتاي ازيا كونتينەنتىندەگى ەڭ جاقىن ءترامپليننىڭ ءبىرى ەكەنىن كورسەتتى.

سونىمەن قاتار، قازاقستان ءۇشىن ازيالىق جانە قىتايلىق مادەنيەت ءالى كۇنگە بوتەن ءارى تاڭسىق ەكەنى جاسىرىن ەمەس. تەلەارنالار، سۇلۋلىق ستاندارتتارى، قوعامدا ءوزىن-ءوزى ۇستاۋ مادەنيەتى جانە باسقالارى ەۋروپا ەلدەرىنىڭ ۇلگىسىنە باعىتتالىپ كەلەدى. ءتىپتى، اقش ەمەس، ناق ەۋروپا ۇلگىسىنە. ءتىپتى، وزدەرىنىڭ ازيالىق كەلبەتكە يە بولعانىنا قاراماستان، وسى بىرەگەيلىككە قانى قاس ادامدار دا جەتەرلىك.

دەسە دە، الەمدىك ەكونوميكا مەن مادەنيەتتە ازيانىڭ سالماعى ارتقان سايىن، ازيالىق بىرەگەيلىككە دەگەن سۇرانىس تا ارتا بەرەتىنى انىق. سونىڭ ىشىندە، بۇل پروتسەسس قىتاي ءوسىمىنىڭ ەسەبىنەن جاسالادى. جانە قازاقستان كورشى مەملەكەت رەتىندە ىنتىماقتاستىقتىڭ ورتاق نۇكتەلەرىن قالىپتاستىرۋ ءۇشىن العىشارتتار جاسايدى. بۇل فاكت.

گاسترونوميالىق بايلانىس. بۇل ماسەلەنىڭ كۇندەلىكتى كورىنىسىنە قاراماستان، گاسترونوميالىق ۇقساستىقتار مەن وزگەشەلىكتەر ءوزارا مادەني ارەكەتتەسۋدە باستى رولدەردىڭ ءبىرىن اتقارادى. اس-اۋقاتتاعى ۇقساستىقتار دا ءوزارا سەنىم قالىپتاستىرۋشى ماڭىزدى فاكتور. مۇنىڭ جارقىن مىسالى رەتىندە قازاقستان قوعامىنداعى ەتنوكونفەسسيالىق كەلىسىمدى الىپ قاراۋعا بولادى. اسىرەسە، ءدىني مەرەكەلەردە ءارتۇرلى ەتنوس وكىلدەرى ءبىر-بىرىنە وزدەرىنىڭ ۇلتتىق تاعامدارىن ۇسىناتىنى بۇل تەزيستىڭ دالەلى.

وسى رەتتە ءدال قىتاي اسحاناسىنا قاتىستى قازاقستاندا ءتۇرلى قاۋەسەتتەر مەن ستەرەوتيپتەر قالىپتاسقان. قازاقستان قوعامىندا كوپ اتا-انا ءوز بالالارىن قىتايعا وقۋعا جىبەرەردە، بالالارىنىڭ وندا دۇرىس تاماقتان الاتىن-المايتىنىنا الاڭدايدى. قىتاي اسحاناسى الەمنىڭ تۇكپىر-تۇكپىرىنە تارالىپ، اركىم وزىنە كەرەكتىسىن الاتىنداي ءوزىنىڭ ارالۋاندىعىمەن ەرەكشەلەنىپ، ءتىپتى قازاقستاندا دا قىتاي تاعامدارىنىڭ بىرنەشە ءتۇرى تۇرمىستىق ومىرگە ءسىڭىستى بولىپ كەتسە دە، بۇل ءوز كەزەگىندە پارادوكستى فاكت بولىپ وتىر.

تاريحتان قارايتىن بولساق، قازاقستانعا قىتايدىڭ اسحانا مادەنيەتىنەن ءتۇرلى تاعامدار ءسىڭىستى بولعان. ولار: لاعمان ء拉面,مانتى 包子، بۋلانعان نان 馒头، اششى بۇرىش قوسىلعان تاعام تۇرلەرى 辣子، داپانچجي 大盘鸡 جانە ت.ب. بۇل تاعام تۇرلەرىنىڭ دەنى قازاقستان تۇرمىسىنا توقسانىنشى جانە ەكى مىڭىنشى جىلداردا شىڭجاڭ ايماعىنان جەتكەن. بۇل تاعام تۇرلەرىنىڭ قازاق تۇرمىسىنا ءسىڭىستى بولۋىنا بىرنەشە فاكتور اسەر ەتكەن. ولار: سول جىلدارداعى قازاقستان-قىتاي اراسىنداعى ەكونوميكالىق بايلانىستاردىڭ كۇشەيۋى مەن قىتايداعى ەتنيكالىق قازاقتاردىڭ كوپتەپ كوشىپ كەلۋى... قازاقستاندىقتاردىڭ شۇار ايماعىنا كەلىپ-كەتۋى كوبەيگەن سايىن، ولار جەرگىلىكتى اسحانا مادەنيەتىمەن دە ءوزارا الماسىپ جاتتى. مىسالى، بۇگىندە الماتى اسحانالارىنداعى «گۋيرۋ لاگمان» 过油肉拌面، «سۋيرۋ لاگمان» 碎肉拌面، «گانفان» ت.ب. تاعام تۇرلەرى وسى بايلانىستار نەگىزىندە كەلگەن. ەرتەرەكتە، سوۆەت وداعى كەزىندە بۇل تاعام تۇرلەرى ءبىز ءۇشىن تاڭسىز بولدى. ءتىپتى، ۇيعىرلار كوپ قونىستانعان اۋماقتاردىڭ وزىندە سيرەك كەزدەسەتىن. تەك، دۇنگەن ەتنيكاسى اراسىندا عانا تانىمالدىققا يە بولدى.

بۇگىندە، قازاقستاننىڭ بارلىق قالالارىندا قىتاي مەيرامحانالارى جىل ساناپ كوبەيىپ كەلەدى. جانە ولار سۇرانىسقا يە. ورتا جانە جوعارى تاپتاعىلارعا ارنالعان ەكزوتيكالىق اسحانا سەگمەنتىندە عانا ەمەس، تۇرمىسى تومەن، قىتاي تاۋارلارى قاپتاعان قارا بازارلارداعى ازاماتتار ءۇشىن دە مۇنداي مەيرامحانالار قولجەتىمدىلىككە ءارى تانىمالدىققا يە بولدى. الايدا، ادىلدىك ءۇشىن بۇل تەندەنتسيا كوبىنە كوپ الماتى، شقو مەن وڭتۇستىك قازاقستان سەكىلدى قىتايمەن شەكاراعا جاقىن ايماقتاردا عانا سۇرانىسقا يە ەكەنىن ايتا كەتكەن ءجون.

جالپى ايتقاندا، قازاقستان جانە قىتاي اسحانالارىندا ايتارلىقتاي ايىرماشىلىق بار. اسحانا ەتيكەتىندە دە ايىرما كوپ. مىسالى، كوپ قازاقستاندىق تاياقشامەن تاماق جەي المايتىنى راس. سايكەسىنشە، قىتايلار دا شانىشقىمەن تاماق جەۋگە ماشىقتانباعان. قىتاي تاعامدارىنىڭ دەنى قازاقستاندىقتار ءۇشىن تاڭسىق كورىنەدى. سول سەكىلدى، قىتايلىقتار ءۇشىن دە قازاقستاننىڭ كوپ تاعام تاڭسىق. قازاقستان اسحاناسىنداعى ءشوپ-شالاڭنىڭ ازدىعى مەن تاعام تۇرلەرىنىڭ مايلىلىعى تاڭسىق جايت رەتىندە قابىلدانادى. الايدا، قازاقستاندىقتار دا، قىتايلىقتار دا ءبىر-ءبىرىنىڭ ۇلتتىق اسحانالارىمەن تانىسۋعا بەيىلدى. مىسالى، قىتاي تۋريستەرى ءۇشىن قازاقتاردىڭ جىلقى ەتىنەن جاسالاتىن تاعىم تۇرلەرى نەمەسە ەت تاماقتارى قىزىق بولسا، قازاقستاندىق تۋريستەر ءۇشىن قىتاي اسحاناسى ايتارلىقتاي قىزىعۋشىلىققا يە.

اينالاعا دەگەن قۇرمەت. قازاق پەن قىتاي مادەنيەتىندەگى تاعى ءبىر ۇقساستىق – تۋعان-تۋىسقا، ونىڭ ىشىندە جاسى ۇلكەنگە دەگەن ەرەكشە قۇرمەت. كۇندەلىكتى تۇرمىستاعى «اعاي» نەمەسە «اپاي» دەگەن سوزدەر قىتايلىقتار اراسىندا دا بار (大哥نەمەسە 大姐). جاسى ۇلكەنگە دەگەن قۇرمەت – ءوز كەزەگىندە قىزمەتتىك قارىم-قاتىناستا دا، سۋبورديناتسيا ساقتاۋدا دا بايقالىپ جاتادى. قازاقتار دا، قىتايلار دا باسشىلىقتىڭ ابىرويىن ەرەكشەلەپ كورسەتىپ وتىرادى. ال بۇل قارىم-قاتىناس ءتۇرى كوپتەگەن باتىس ەلدەرى ءۇشىن بوتەن قۇبىلىس رەتىندە قابىلدانادى. مىسالى، ول جاقتا جاسىنىڭ ۇلكەن-كىشىلىگىنە قاراماستان «سەن» دەپ سويلەۋ قالىپتى.

قازاقتاردا دا، قىتايلاردا دا ءار تۋىستىڭ ءوز اتاۋى بار. بۇل دا باتىستىق ويلاۋ ۇلگىسىنە جات. ەكى ەلدىڭ تۇرمىستىق ومىرىندە تۋعان-تۋىستارىن ءارتۇرلى اتاۋلارىنىڭ بولۋى قازاقتىلدى ستۋدەنتتەر ءۇشىن قىتاي ءتىلىن ۇيرەنۋدە دە، قىتاي فيرمالارىنداعى قازاق، قازاق فيرمالارىنداعى قىتاي جۇمىسشىلارىنىڭ جىلدام ينتەگراتسيالانۋىنا، ورتاق ءتىل تابىسۋىنا كوپ سەپتىگىن تيگىزەدى.

بۇعان باسقا دا مادەني كودتىڭ سەپتىگى بار. ول – قاراپايىم تىلمەن ايتقاندا تۇرلەردىڭ ۇقساستىعى. قازاق تىلىندە ءوز رەپۋتاتسياسىن كىرلەگەن، ابىرويسىز، ارسىز ادامدى «بەتسىز» دەپ اتايدى. وسىعان ۇقساس قۇبىلىس قىتاي تىلىندە دە بار. مىسالى، اردان بەزگەن ادامدى «ءجۇزى كۇيگەن» ادام دەيدى. جالپى ماعىناسى سولاي... ەكى ەلدىڭ مادەنيەتىندە دە قوعامعا جات قىلىقتارىمەن كورىنگەن ادامدى «بەت-ءجۇزى كىرلەگەن» ادام رەتىندە قابىلدايدى. وسى جاعىنان قازاق پەن قىتايدىڭ ءىس-ارەكەتتەرىندە كوپتەگەن ۇقساستىق بايقالادى. قازاقتار دا، قىتايلار دا الدىنا كەپ تۇرعان ادامنىڭ بەتىن قايتارمايدى، «جوق» دەي المايدى. ول ءۇشىن ءتۇرلى سىلتاۋ ىزدەيدى. ول اۋەلى، وزىنەن بۇرىن الدىنا كەلگەن ادامنىڭ ابىرويىن الاسارتىپ الماۋ ءۇشىن جاسالدى. ءتىپتى، سىپايىلىقتىڭ، سىيلاستىقتىڭ بۇل فورماسى مىناۋ رەسەيلىكتەر ءۇشىن دە بوتەندەۋ كورىنەدى. ال قازاقتار مەن قىتايلار ءۇشىن بۇل قالىپتى جاعداي. الايدا، بۇل قۇبىلىس قازاقستاندا وڭىرلەردەگى مادەنيەتكە دە بايلانىستى. مىسالى، باتىس قازاقستان جاقتا ءبىرشاما دورەكى، بىراق ناقتى-ناقتى ايتىلسا، شىعىس پەن وڭتۇستىك ايماقتاردا بارىنشا سىپايىلاپ، تىگىسىن جاتقىزىپ جەتكىزۋ ۇيرەنشىكتى ەكەنىن كورەمىز. بۇل قۇبىلىس قىتايدا دا ءدال سولاي...

ەسكەرە كەتەتىن تاعى ءبىر جايت، قىتايدا اينالاداعى ادامدارعا، ولاردىڭ سەزىمىنە دەگەن قارىم-قاتىناس قۇرمەتى كونفۋتسي پرينتسيپتەرىندە جازىلعان ( «礼»). قازاق مادەنيەتىنە ءتان كوپتەگەن قارىم-قاتىناس تۇرلەرى كونفۋتسيانستۆودا جازىلعان. وسى تۇرعىدان قازاقستانداعى كونفۋتسي ينستيتۋتتارى تەك تىلدىك اسپەكتىگە ءمان بەرىپ قويماي، مادەني بايلانىستار جاعىن دا قولعا السا، ونداعى وقىپ جاتقان ازاماتتار كونفۋتسيانستۆونى قارىم-قاتىناس ءىلىمى رەتىندە دە تاني تۇسەتىن ەدى. بۇل ءوز كەزەگىندە قازاق-قىتاي بايلانىستارىن نىعايتۋعا دا ءوز سەپتىگىن تيگىزەتىنى انىق.

تاعامعا دەگەن قۇرمەت. قازاق-قىتاي مادەنيەتىندە تاعامعا دەگەن قۇرمەت ەرەكشە. ەگەر قازاقتا: «جاماننان جارتى قاسىق اس قالادى» دەسە، قىتايلار: «كۇرىشتىڭ ءار ءتۇيىرى ەڭبەكپەن كەلەدى» دەيدى (谁知盘中餐粒粒皆辛苦). الايدا قىتايدىڭ بۇل مادەنيەتى قازاقستان قوعامى ءۇشىن ءالى تولىق تانىلا قويعان جوق.

ءۇن ۇقساستىعى. ءۇن ۇقساستىعى رەتىندە قازاق تىلىندەگى ءۇندى داۋىسسىز دىبىسى «ڭ» مەن قىتايدىڭ «ng» دىبىستارى ۇقساسادى. وسى سەكىلدى قىتاي ءتىلىنىڭ وزگە دە دىبىستارى شەتەلدىكتەر ءۇشىن كۇردەلى بولىپ كورىنگەنىمەن، قازاق ستۋدەنتتەرى ءۇشىن وڭايىراق.

ارينە، بۇل ۇقساسىقتارمەن قاتار، قازاق پەن قىتاي اراسىندا ايىرماشىلىقتار از ەمەس. قازاق پەن قىتاي ەكى بولەك ۇلت بولعاندىقتان، بۇل قالىپتى دۇنيە. جانە سول ايىرماشىلىقتار كوزگە الدىمەن كورىنەدى. ولاردى جىپكە تىزگەندەي ساناي بەرۋگە بولادى. سوندىقتان، سول ايىرماشىلىقتاردىڭ ءبىرلى-جارىمىنا عانا توقتالعاندى ءجون كودىك.

1. ۋاقىت ۇنەمدەۋگە دەگەن كوزقاراس. قازاقتار مەن قىتايلار ۋاقىتقا مۇلدە بولەك قارايدى. سوندىقتان دا، قىتايلار ءۇشىن قازاقتار جايباسار ءارى ۋاقىتىلى ءجۇرىپ-تۇرمايتىن ۇلت دەگەن كوزقاراستا. ال قازاقتار مۇنىمەن مۇلدە كەلىسپەيدى. كەرىسىنشە، جىلدام-جىلدام كەلىسىم جاساسىپ، قالعانىن سوعان قاراي رەتتەۋگە بەيىمدى. سوندىقتان دا، قىتايلاردىڭ ايلار بويى كەلىسىم جاساۋ دەگەنىن جايباسارلىق دەپ قابىلدايدى.

2. قاتتى سويلەۋ. قازاق ءۇشىن قاتتى سويلەۋ - مادەنيەتسىزدىكتىڭ جانە اگرەسسيانىڭ بەلگىسى رەتىندە قابىلدانادى. ال قىتايدىڭ سويلەۋ مانەرى ءۇشىن بۇل قالىپتى نارسە. الايدا، وسى ءبىر مادەني ايىرماشىلىق كەي جاعدايلاردا ءوزارا تۇسىنىستىكتىڭ بۇزىلۋىنا الىپ كەلەدى. اسىرەسە، قازاقستانداعى قىتاي جۇمىسشىلاردىڭ ماسەلەسىنە كەلگەندە...

3. ۇستەل باسىندا ءوزىن-ءوزى ۇستاۋ مادەنيەتى. قازاق پەن قىتايدىڭ اسحانا نەمەسە ۇستەل باسىداعى ەتيكەتى ەكىتۇرلى. قىتايلار تاياقشامەن تاماق جەسە، قازاقتار ەتتى قولمەن جەيدى. نەمەسە قازاقتار تاماقتى دىبىسسىز جەۋدى مادەنيەتتىلىك ساناسا، كەرىسىنشە، قىتايلار ءۇشىن داۋىستى قاتتىراق شىعارىپ تاماق جەۋدى – اس يەسىنە ەگەن قۇرمەت دەپ بىلەدى.

4. ىسكەرلىك ەيكەت. قازاقستان مەن قىتاي اراسىنداعى ىسكەرلىك ەتيكەتتە ايىرماشلىق ۇلكەن. ءتىپتى، ءبىر-بىرىنە ەسىمحات (ۆيزيتكا) تابىستاۋدان باستاپ، بىرلەسكەن ءىس مادەنيەتىنە دەيىن وزگەشەلىك بار. سايكەسىنشە، ەكى تاراپ تا ءبىر-بىرىنەن كورگەن ايىرماشىلىقتى مادەنيەتسىزدىك دەپ قابىلدايدى.

5. قىتاي فوبياسى. قازاقستان قوعامىنىڭ كەي بولىگىنىڭ قىتايعا، قىتاي ادامىنا دەگەن سەنىمسىزدىگى بار. بۇل دا ءوز كەزەگىندە جاڭا داۋىردەگى قىتايدى، قىتاي مادەنيەتىن، قىتاي پسيحولوگياسىن دۇرىس تانىماۋمەن بايلانىستى.

اسىرەسە، بۇل تۇسىنىك «قىرعي-قاباق سوعىستان قالعان. ويتكەنى، قازاقستان كسرو-نىڭ ءبىر فورپوستى رەتىندە تەگەۋرىندى اقپاراتتىق-پروپوگاندالىق ساياساتتى كورگەن. مىسالى، وسى كاتەگورياعا جاتاتىن ادامداردىڭ ءجيى ايتاتىن تەزيستەرى – قازاقستان مەن قىتايدىڭ ەجەلدەن دوس حالىقتار ەمەس. ال شىن مانىندە، تاريحي جاعىنان قازاقستان مەن قىتايدى ەجەلدەن-اق، «جىبەك جولى» بويىنداعى ساۋدا-ساتتىق بايلانىستىرىپ نەمەسە جوڭعار شاپقىنشىلىعى مەن پاتشالىق رەسەي باسقىنشىلىعىنا قارسى كۇرەستەر بىرىكتىرىپ وتىرعان. دەسە دە، بۇل تەزيستەر سوۆەت كەزىندەگى تاريحي روماندارعا نەگىزدەلىپ قالىپتاسقان. ال قازاق ادەبيەتىن جاساردا سوۆەت بيلىگى «قىتاي قاۋپى» تۋرالى يدەولوگيالىق شتامپ جاساعانى وتىرىك ەمەس.

وسىلايشا، قازاق-قىتاي مادەنيەتىنەن كوپتەگەن ۇقساستىقتاردى تابۋعا بولادى. ال ەكى ەل اراسىنداعى بايلانىستاردى ارتتىرۋدىڭ كەدەرگىسى سول – ەكى ەل حالقىندا ءبىر-بىرلەرى تۋرالى اقپاراتتىڭ ازدىعى، بىرلەسكەن مادەني-گۋمانيتارلىق جوبالاردىڭ جوقتىعى نەمەسە جەتىسپەۋشىلىگى، ۆيزا رەجيمىندەگى كەدەرگىلەر مەن تۋريستەردىڭ ازدىعى ت.ب.

كۇنى بۇگىنگە دەيىنگى قالىپتاسقان تاجىربيە كورسەتكەندەي، بىرلەسكەن جوبالار نەمەسە جۇمىستاردان سوڭ كوپتەگەن قازاق پەن قىتاي ءوزارا تەز ءتىل تابىسىپ، دوستاسىپ كەتىپ جاتادى. الايدا، ەكى ەل اراسىنداعى وسىنداي ءساتتى بايلانىستار باق-تا ءجيى ناسيحاتتالمايدى. بۇل دا اقپاراتتىق نەگاتيۆتىڭ كوبەيۋىنە اسەر ەتەدى. ايتپەسە، ديماش قۇدايبەرگەننىڭ قىتايداعى جەتىستىگىنەن سوڭ دا، كوپتەگەن تالانتتى جاستاردى سونداي كونكۋرستارعا قاتىستىرۋ نەمەسە باق-تا قىزۋ تالقىلاناتىن بىرلەسكەن كونكۋرستار وتكىزۋ قىزىقتى بولار ەدى.

ءادىل كاۋكەنوۆ، شىعىستانۋشى

Abai.kz

36 پىكىر