جۇما, 22 قاڭتار 2021
سايلاۋ 2012 40 پىكىر 27 قاراشا, 2020 ساعات 13:01

جسدپ سايلاۋعا قاتىسپايتىن بولدى

قازاقستاننىڭ وپپوزيتسيالىق جالپىۇلتتىق سوتسيال-دەموكراتيالىق پارتياسى 2021 جىلدىڭ 10 قاڭتارىندا وتەتىن ءماجىلىس پەن ءماسليحات سايلاۋىنا قاتىسۋدان باس تارتتى. بۇل تۋرالى پارتيا جەتەكشىسى اسحات راقىمجانوۆ مالىمدەگەن ەكەن.

جسدپ توراعاسى اسحات راقىمجانوۆ پارتيا بۇل سايلاۋعا بايكوت جاريالايتىنىن، سول ارقىلى ەلدەگى قازىرگى احۋالعا دەگەن پارتيا ۇستانىمىن كورسەتەتىنىن ايتىپتى. «تengrinews.kz» سايتى سولاي دەپ جازعان.

راقىمجانوۆ ءوز سوزىندە پارتيا جاڭارۋ باعىتىنداعى جۇمىسىن بەلسەندى جالعاستىرا بەرەتىنىن ايتقان.

«سايلاۋعا قاتىسۋ – ماڭدايشاداعى ۇران ءسوزدى اۋىستىرۋمەن شەكتەلمەيدى. مويىنداۋ كەرەك، بىزگە جىلدامدىق جەتپەيدى. ءبىزدىڭ باعدارلامامىز 2012 جىلى جازىلعان. ودان بەرى دە ءومىر وزگەردى. قازىر بىزگە پارتيانىڭ كەلەسى سەزىنە دەيىن جاڭا باعدارلاما جاساۋ، جاڭا باعدارلامانىڭ جوباسىن ازىرلەۋ كەرەك. پارتيا جارعىسىنا دا وزگەرىس ەنگىزۋ كەرەك»، - دەپتى راقىمجانوۆ.

پارتيا سەزىندە الداعى سايلاۋعا بايكوت جاريالاۋدى 32 ادام قولداعان، 3 ادام قارسى بولىپ، 5-ەۋى قالىس قالعان.

ەستەرىڭىزگە سالا كەتەيىك، وسىعان دەيىن پرەزيدەنت توقاەۆ ءماجىلىس پەن ءماسليحات سايلاۋىنىڭ ۋاقىتىن بەلگىلەپ، دودا باستالعاندا جسدپ جەتەكشەلىرە بۇل باستامانى قولدايتىندارىن مالىمدەگەن. پارتيا جەتەكشىلەرىنىڭ ءبىرى تازابەك سامبەتباي مىرزا ءوزىنىڭ «Facebook-تاعى» پاراقشاسىندا پارتيا توراعاسى اسحات راقىمجانوۆتىڭ مالىمدەمەسىن جاريالاعان.

جسدپ توراعاسى اسحات راقىمجانوۆتىڭ مالىمدەمەسى:

«پارلامەنت دەپۋتاتتارى مەن جەرگىلىكتى وكىل ورگاندارىنىڭ سايلاۋى كەز-كەلگەن مەملەكەت ءۇشىن دامۋدىڭ ماڭىزدى كەزەڭى بولىپ تابىلادى. ەلىمىزدىڭ ۇستىنە تۇسكەن قيىن زاماندا، سايلاۋ مەملەكەتىمىزدىڭ دامۋىنا ماڭىزدى اسەرىن تيگىزۋى كەرەك.

سايلاۋ ارقىلى مەملەكەتتى باسقارۋ قۇقىعى جۇزەگە اسىرىلادى، سوندىقتان كەز-كەلگەن ساياسي پارتيالار سياقتى جسدپ دا بۇل پروتسەستەرگە قاتىسۋى كەرەك.

ءبىز جانە ازاماتتىق قوعام وكىلدەرى پروپورتسيونالدى جۇيەنى ارالاس نەمەسە ماجوريتارلى جۇيەگە وزگەرتۋ قاجەتتىلىگى تۋرالى ايتىپ كەلەمىز. قازىرگى تاڭدا پارتيا ىشىندە سايلاۋ ناۋقانىن ۇيىمداستىرۋعا ارنالعان ءتۇرلى ۇسىنىستار تالقىلانىپ جاتىر. جاقىن ارادا بۇل ماسەلە بويىنشا جالپى پارتيالىق شەشىم قابىلداناتىن بولادى».

22 قازان، 2020 جىل.

ايتا كەتەيىك، ءماجىلىس پەن ءماسليحات سايلاۋلارى 2021 جىلدىڭ 10 قاڭتارىندا وتەدى. قازىرگە دەيىن «نۇر وتان»، «اق جول»، «اۋىل»، «ادال» جانە «قحپ» سەز وتكىزىپ، ءتىزىم ۇسىندى.

Abai.kz

40 پىكىر