قازاقستاندىق 35 كومپانيا ەكسپورتتى جەدەلدەتۋ باعدارلاماسى شەڭبەرىندە قىتاي نارىعىنا شىعادى. بۇل تۋرالى LS سايتى مالىمدەدى. 

ساۋدا جانە ينتەگراتسيا مينيسترلىگى اعىمداعى جىلدىڭ سوڭىنا دەيىن تاماق ونەركاسىبىندەگى 35 كومپانيادان 40-60 ملرد تەڭگە كولەمىندەگى ەكسپورتتىق كىرىس بولادى دەپ حابارلادى. ال، ونىڭ 8-12 ملرد تەڭگەسى سالىق تۇرىندە مەملەكەتتىك بيۋدجەتكە تۇسەدى.

«سونداي-اق، ءوندىرىس كولەمى، قۋاتتىلىعى، ساتىلىمى وسەدى جانە جاڭا جۇمىس ورىندارى پايدا بولادى»، - دەدى ساۋدا مينيسترلىگى.

دەپارتامەنت بۇگىندە قازاقستاننىڭ 123 ەلگە تاۋارلارىن ەكسپورتتايتىندىعىن اتاپ ءوتتى. ونىمدەر قارجىلىق جانە قارجىلىق ەمەس قولداۋدىڭ ارقاسىندا 800 تاۋارلىق تۇرگە جەتكىزىلەدى.

سونىمەن قاتار، بيىل ەكسپورتتى جەدەلدەتۋ باعدارلاماسى ىسكە قوسىلدى. وسىنىڭ ارقاسىندا قازاقستاندىق كاسىپكەرلەر وزدەرىنىڭ ەكسپورتتىق مۇمكىندىكتەرىن باعالايدى جانە سىرتقى نارىقتارعا شىعادى نەمەسە  ەكسپورت كولەمىن ۇلعايتادى.

سونىمەن قاتار، ساۋدا مينيسترلىگىنىڭ ناقتىلانعان بيۋدجەتتىك جوسپارلارىنا سايكەس، اعىمداعى جىلى ىشكى جانە سىرتقى ساۋدا ساياساتى، حالىقارالىق ەكونوميكالىق ينتەگراتسيا، قۇقىقتاردى قورعاۋ سالاسىنداعى ساياساتتى ىسكە اسىرۋعا 3,5 ملرد تەڭگە ءبولىندى، بۇل جىل باسىندا جوسپارلانعاننان  39,3%-عا از.

Abai.kz