سەنبى, 28 قاراشا 2020
COVID-19 قازاقستاندا. جۇقتىرعاندار — 130039. جازىلعاندار — 116044. قايتىس بولعاندار — 1990
دات 4505 24 پىكىر 23 قازان, 2020 ساعات 14:11

تاۋەلسىزدىك كۇنىن 25 قازانعا اۋىستىرۋ كەرەك!

قازاقستان رەسپۋبليكاسىنىڭ

پرەزيدەنتى قاسىم-جومارت توقاەۆقا

ۇسىنىس

قۇرمەتتى قاسىم-جومارت كەمەلۇلى!

قازاقستان رەسپۋبليكاسىنىڭ باستى قۇندىلىعى، ەلىمىزدىڭ -تاۋەلسىزدىگى. تاۋەلسىزدىك - قازاق حالقىنا، اللانىڭ بەرگەن ۇلكەن سىيى، ءارى زور باقىتى. ءبىز تاۋەلسىزدىكتى كوزدىڭ قاراشىعىنداي ساقتاي ءبىلۋىمىز قاجەت. ول ءۇشىن ءبىز قۇلدىق سانادان قۇتىلىپ، رۋلىق سانادان كوتەرىلىپ، ۇرپاعىمىزدىڭ بويىنا ۇلتتىق سانانى قالىپتاستىرۋىمىز قاجەت. ءبىز سوندا عانا الەمنىڭ وركەنيەتى ەلدەرىنىڭ كوشىن باستايمىز. سوندا عانا تاۋەلسىزدىگىمىزدىڭ بەرىك بولادى

الداعى 2021 جىلى 16 جەلتوقساندا تاۋەلسىزدىگىمىزگە 30 جىلدىعى بولماق.

ءبىز تاۋەلسىزدىك كۇنىن، جاڭا جىل، ناۋرىز مەرەكەسى سياقتى حالىقتىق مەرەكە دەڭگەيىندە تويلاي الماي جۇرگەنىمىز جاسىرىن ەمەس. اقيقاتىندا قازاق حالقى ءۇشىن تاۋەلسىزدىك كۇنىنەن اسقان مەرەكە بولۋى مۇمكىن دە ەمەس.

قازىر 16 جەلتوقسان شەنەۋنىكتەرگە ماراپات، مەدال تاراتاتىن كۇنگە اينالىپ بارادى. حالىقتىڭ ساناسىندا بۇل كۇن 1986 جىلى تاۋەلسىزدىك جولىندا قۇربان بولعان بوزداقتاردى جانە 2011 جىلى 16 جەلتوقساندا جاڭاوزەن مەن شەتپەدە جازىقسىز وققا ۇشقان بەيبىت ازاماتتارىمىزدى ەسكە الۋ كۇنى بولىپ قالدى. سەبەبى، سول بوزداقتاردىڭ اتا-انالارى، باۋىرلارى، بالالارى ارامىزدا ءجۇر. قازاق ازالى كۇندە توي جاسامايدى. ءبىز قانمەن جازىلعان تاريحتى سانامىزدان وشىرە المايمىز. بۇل ءبىزدىڭ جاقسى بولسىن، جامان بولسىن ءوز تاريحىمىز!

قۇرمەتتى قاسىم-جومارت كەمەلۇلى!

ءبىزدىڭ ۇسىنىسىمىز «تاۋەلسىزدىك كۇنىن» 16 جەلتوقساننان، 25 قازانعا اۋىستىرۋ قاجەت. بۇل تاريحي كۇن 25 قازان 1990 جىلى ەلىمىزدىڭ تاريحىندا تۇڭعىش رەت تاۋەلسىزدىك دەكلاراتسياسى قابىلدانعان كۇن بولاتىن. قازاقستان سول كۇننەن باستاپ، وزىندىك كوزقاراسى بار جەكە مەملەكەت رەتىندە تانىلا باستادى. قابىلدانعان دەكلاراتسيا قازاقستاننىڭ بولاشاق تاۋەلسىزدىگىنىڭ ىرگەتاسى قالانعان كۇن بولىپ سانالدى.

بۇل دەكلاراتسيانىڭ قابىلدانۋىمەن ەگەمەندىگىن ءمالىم ەتەتىن جەكە تەرريتورياسى، ازاماتتىعى، مەملەكەتتىك بيۋدجەتى، حالىقارالىق قاتىناستارداعى دەربەستىگى، مەملەكەتتىك رامىزدەرىمىز بەكىتىلدى. قازاقستاننىڭ ەگەمەندىگى جانە تەرريتورياسىنىڭ تۇتاستىعى ساياسي، قۇقىقتىق جانە ەكونوميكالىق تۇرعىدان دايەكتەلدى. وسى كەزدەن باستاپ دەموكراتيالىق قوعام قۇرۋ ماقساتىندا ەل ىشىندەگى قوعامدىق-ساياسي قۇرىلىمعا ءبىراز وزگەرىستەر ەنگىزىلە باستادى. بۇل اكت ارقىلى الەم كارتاسىنداعى جاڭا مەملەكەت - قازاقستان رەسپۋبليكاسىنىڭ نەگىزى قالاندى.

قۇرمەتتى قاسىم-جومارت كەمەلۇلى!

كەلەر جىلى تاۋەلسىزدىكتىڭ 30 جىلدىق مەرەكەسىن 25 قازان كۇنى حالىقتىق مەرەكە رەتىندە سالتاناتتى تۇردە اتاپ وتسەك كەرەمەت بولار ەدى.

بۇل تەك مەنىڭ عانا ۇسىنىسىم ەمەس، حالىقتىڭ كوپتەن بەرى كوكەيىندە جۇرگەن تالاي رەت ايتىلىپ تا، جازىلىپ تا كەلگەن وزەكتى ماسەلە دەپ ەسەپتەيمىز. سوندىقتان دا، ءوزىڭىزدى قازاقستان رەسپۋبليكاسىنىڭ پرەزيدەنتى ەتىپ سايلاعان حالقىڭىزدىڭ ۇسىنىسىن قابىل الادى دەپ سانايمىز!

جانىبەك قوجىق

Abai.kz

24 پىكىر