قازاق تەلەۆيزياسى تاريحىندا العاش رەت قازاقتىلدى كورەرمەنگە الەمدىك اۆتورلىق كينوتۋىندىلار ۇسىنىلماق. 16 قازاننان باستاپ «Abai tv» ارناسىنان جۋرناليست دارحان ابدىكتىڭ «سوڭعى مۋزا» تانىمدىق جوباسى ەفيرگە شىعادى.

حابار جاس كينەماتوگرافتارعا اۆتورلىق كينو جانرىن كاسىبي تۇرعىدان تالقىعا سالاتىن، سول ارقىلى وتاندىق كينو پروبلەمالارىن كوتەرەتىن قازاقتىلدى تەلەالاڭ ۇسىنۋدى كوزدەيدى. وسى ماقساتتا باعدارلاماعا اتاقتى مەترلار عانا ەمەس، كينو اكادەمياسىنىڭ جوعارى كۋرس ستۋدەنتتەرى، جاس رەجيسسەرلار مەن ىنتالى كورەرمەن شاقىرىلادى.

«اۆتورلىق فيلمدەردى ساتىپ الۋ كوممەرتسيالىق تۇرعىدان ءتيىمسىز بولعاندىقتان، كينوپروكاتقا شىقپايدى، الايدا، بۇل تۋىندىلار الەمدىك كينوفەستيۆالدەردە ناعىز ونەر جاۋھارى رەتىندە مويىندالعان. وكىنىشكە قاراي، ءالى كۇنگە دەيىن ولاردىڭ كوبى قازاقتىلدى كورەرمەنگە ۇسىنىلعان جوق. سول سەبەپتى «سوڭعى مۋزا» حابارىن «قازاقستان» تەلەراديوكورپوراتسياسى تاراپىنان جۇزەگە اسىرىلىپ وتىرعان ۇلكەن ەكسپەريمەنت ءارى اعارتۋشىلىق بيىك ماقساتتى كوزدەيتىن جوبا دەپ ەسەپتەۋگە بولادى»، - دەيدى باعدارلاما جۇرگىزۋشىسى د.ابدىك. 

«Abai tv» ارناسى جالپى 130-دان استام شەتەلدىك ءفيلمدى قازاق تىلىنە اۋدارىپ ۇسىنباق. ونىڭ ىشىندە «وسكار» يەگەرى «كورول ءسوزى»، «قۇلدىقتاعى 12 جىل»، «اسپان بالالارى»، «ۇزدىك ايەل ءرولى» اتالىمى ءۇشىن «التىن گلوبۋس» جۇلدەسىن العان «جان ايناسى» فيلمدەرى، چ.ءچاپليننىڭ «ۇلكەن قالا وتتارى»، «جاڭا ءداۋىر»، يراندىق رەجيسسەر ا.كياروستاميدىڭ «شيەنىڭ ءدامى»، «ءبارىمىزدى جەل ۇشىرادى»، «ءومىر-وزەن»، امەريكالىق رەجيسسەر م.فلەناگاننىڭ «اۋەن قۇدىرەتى»، امەريكالىق كينەماتوگرافيست د.لەونەتتيدىڭ اۆتورلىق تۋىندىلارى بار. 

باعدارلاما بارىسىندا كورەرمەنگە كينو ءتىلىنىڭ اللەگورياسى، كارتينا جەلىسىنەن تىس قالاتىن وپەراتور جۇمىسىنىڭ ەرەكشەلىكتەرى، مونتاج بارىسىندا پايدالانىلعان ادىستەر كاسىبي تۇرعىدان تۇسىندىرىلەدى.

جوبا «Abai tv» ارناسىنان 16 قازاننان باستاپ ءار جۇما سايىن 22:20-دا ەفيرگە شىعادى. 

Abai.kz