تاجىكستان پرەزيدەنتى ەمومالي راحمون پرەزيدەنتتىك سايلاۋدا تاعى دا جەڭىسكە جەتتى. بۇل جولى ول جالپى سايلاۋشىلاردىڭ 90,92 پايىز داۋىسىن جيناعان ەكەن. بۇگىن تاجىكستاننىڭ ورتالىق سايلاۋ كوميسسياسى كەشەگى وتكەن سايلاۋدىڭ قورىتىندى ەسەپتەرىن جاريالاپتى.

سايلاۋعا جالپى ەلەكتوراتتىڭ 85,39 پايىزى قاتىسقان. ال تاجىكستاندا ۇزىن-ىرعاسى 4 900 545 ادامنىڭ داۋىس بەرۋ قۇقى بار. بۇل ساناتقا جاتاتىن تاجىك ازاماتتارىنىڭ ءبىر بولىگى كورشى ەلدەردە ەڭبەك ميگرانتتارى رەتىندە ءجۇر. سوندىقتان دا، تاجىكستان اۋماعىنان بولەك شەت مەملەكەتتەردە 39 سايلاۋ ۋچاسكەلەرى ۇيىمداستىرىلعان. ال تاجىكستاننىڭ وزىندە 3375 ۋچاسكە جۇمىس ىستەگەن.

بۇل تاجىكستان تاۋەلسىزدىگىنىڭ 29 جىلىنداعى بەسىنشى پرەزيدەنت سايلاۋى. مەرزىمىنەن بۇرىن وتكەن وسى جولعى سايلاۋعا پرو-بيلىكشىل پارتيالار وكىلدەرى قاتىسقان. وپپوزيتسيا بايكوت جاريالاعان.

پرەزيدەنت سايلاۋىنا بارلىعى 5 ادام ۇمىتكەر رەتىندە تۇسكەن. ولار:

• ەمومالي راحمون (حالىقتىق-دەموكراتيالىق پارتيا، «ۇلت كوشباسشىسى»),
• ميرودج ابدۋللوەۆ (كومپارتيا، ءبىرىنشى رەت سايلاۋعا تۇسكەن) ،
• ابدۋحاليم گاففورزودا (سوتسياليستىك پارتيا، ءۇشىنشى رەت سايلاۋعا تۇسكەن),
• رۋستام لاتيفزودا (اگرارلىق پارتيا، ءبىرىنشى رەت سايلاۋعا تۇسكەن),
• رۋستام راحماتزودا (ەكونوميكالىق رەفورمالار پارتياسى، ءبىرىنشى رەت سايلاۋعا تۇسكەن).

راحمونعا دەيىن تاجىكستاندى كىمدەر باسقاردى؟

تاجىكستان پرەزيدەنتتەرى:

كاحار ماحكاموۆ – 1990 جىلدىڭ قاراشاسى مەن 1991 جىلدىڭ تامىزى ارالىعىندا ەل باسقاردى.

1991 جىلدىڭ تامىزى مەن قىركۇيەگى ارالىعىندا كادريددين اسلونوۆ پرەزيدەنت مىندەتىن اتقارۋشى بولدى.

راحمون نابيەۆ – 1991 جىلدىڭ قىركۇيەگى مەن قازانى ارالىعىندا تاجىكستان پرەزيدەنتى اتاندى.

1991 جىلدىڭ قازانى مەن جەلتوقسانى ارالىعىندا اكبارشو يسكانداروۆ پرەزيدەنت مىندەتىن اتقارۋشى بولدى.

راحمون نابيەۆ – 1991 جىلدىڭ جەلتوقسانى مەن 1992 جىلدىڭ قىركۇيەگى ارالىعىندا پرەزيدەنت بوپ تاڭدالدى.

1992 جىلدىڭ قىركۇيەك-قازان ارالىعىندا اكبارشو يسكانداروۆ پرەزيدەنت مىندەتىن اتقارۋشى بولدى.

1992 جىلدىڭ قاراشاسىندا تاجىكستان پرەزيدەنتى دەگەن لاۋازىم جويىلىپ، ونىڭ بارلىق قۇزىرەتى تاجىكستان رەسپۋبليكاسىنىڭ جوعارعى كەڭەسى توراعاسىنا بەرىلدى.

ءسويتىپ، 1992 جىلدىڭ قاراشاسىندا بيلىك تىزگىنى ەمومالي راحموننىڭ قولىنا ءوتتى.

ال 1994 جىلى تاجىكستان پرەزيدەنتى دەگەن لاۋازىم قايتارىلدى. سودان بەرى ەموملي راحمون تاجىكستان پرەزيدەنتى بوپ كەلەدى.

ايتا كەتەيىك، تاجىكستانداعى بۇل سايلاۋدى 145 حالىقارالىق بايقاۋشى باقىلايدى دەگەن. ولار 5 ەلدەن، 6 حالىقارالىق ۇيىمنان جانە 8 ەلشىلىكتەن بارعان. بايقاۋشىلار اراسىندا ەقىۇ-نىڭ دەموكراتيالىق ينستيتۋتتار جانە ادام قۇقىقتارى جونىندەگى بيۋروسىنىڭ 7 وكىلى بار.

ال قازاقستان اتىنان باقىلاۋشى بولىپ – سەنات دەپۋتاتى تالعات مۇساباەۆ بارعان.

Abai.kz