تۇلەكتەر مەملەكەتتىك گرانتتى 3 جىل جۇمىسپەن وتەيدى
بۇگىن ءماجىلىستىڭ جالپى وتىرىسىندا دەپۋتاتتار «قازاقستان رەسپۋبليكاسىنىڭ كەيبىر زاڭنامالىق اكتىلەرىنە ءبىلىم بەرۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسىن ءبىرىنشى وقىلىمدا ماقۇلدادى.
زاڭ جوباسى قر ەڭبەك كودەكسى نورمالارىنا بىرقاتار تۇزەتۋلەر ەنگىزۋگە، ءبىلىم ساپاسىن ارتتىرۋعا، جوو تۇلەكتەرىنىڭ مەملەكەتتىك گرانتتى وتەۋ ماسەلەسىن شەشۋگە نەگىزدەلگەن.
«ءبىلىم بەرۋ سالاسىنداعى ۋاكىلەتتى ورگانعا تەحنيكالىق جانە كاسىپتىك، ورتا بىلىمنەن كەيىنگى ءبىلىمى بار كادرلاردى دايارلاۋ ءۇشىن مەملەكەتتىك تاپسىرىستى قالىپتاستىرۋ، ءبولۋ قاعيدالارىن بەكىتۋ بويىنشا قۇزىرەت بەرۋ ارقىلى شەشۋ ۇسىنىلادى. ماسەلەن، تجكب جۇيەسىندە كادرلاردى دايارلاۋعا مەملەكەتتىك تاپسىرىس جۇمىسپەن قامتۋ ورگاندارىنىڭ، وڭىرلىك كاسىپكەرلەر پالاتالارىنىڭ ۇسىنىستارى نەگىزىندە وڭىرلىك ەڭبەك نارىعىنىڭ قاجەتتىلىكتەرى ەسكەرىلە وتىرىپ ورنالاستىرىلادى. بۇگىندە مەملەكەتتىك ءبىلىم بەرۋ تاپسىرىسىنىڭ قالىپتاسۋ ماسەلەسى كوزدەلمەگەن. ۇسىنىلىپ وتىرعان تۇزەتۋ مەملەكەتتىك تاپسىرىستى ورنالاستىرۋ جانە ونى بەرۋ كەزىندە سىبايلاس جەمقورلىقتىڭ ىڭپالىن تومەندەتۋگە مۇمكىندىك بەرەدى. جوو تۇلەكتەرى مەملەكەتتىك ءبىلىم بەرۋ تاپسىرىسىندا وقۋ ۇزاقتىعىنا پروپورتسيونالدى تۇردە ەڭبەكپەن وتەۋ مەرزىمىن بەلگىلەۋ ارقىلى شەشۋ ۇسىنىلادى»، - دەدى دەپۋتات ءابدىماناپ بەكتۇرعانوۆ.
وسىلايشا تۇلەكتەر مەملەكەتتىك گرانتتى 3 جىل مەرزىمدە جۇمىسپەن وتەيتىن بولادى. ال ءبىلىم الۋشىلار ءىشىنارا، ياعني ءبىر بولىگىن اقىلى نەگىزدە – مەملەكەتتىك بيۋدجەت ەسەبىنەن وقۋ كەزەڭىنە مولشەرلەس وتەيدى.
سونىمەن قاتار حالىقارالىق تاجىريبەنى ەسكەرە وتىرىپ، ءبىلىم بەرۋ ۇيىمدارىن سىرتقى باعالاۋ تەتىگىن جەتىلدىرۋ ماسەلەسى دە قارالدى. بۇل ءبىلىم الۋشىلاردىڭ ءبىلىم ساپاسىن ارتتىرۋعا مۇمكىندىك بەرمەك.
«زاڭ جوباسىن قابىلداۋ ءبىلىم بەرۋ پروتسەسىن جەتىلدىرۋ، ونىڭ ىشىندە كاسىبي كادرلاردى دايارلاۋ جانە ولاردى ودان ءارى جۇمىسقا ورنالاستىرۋ ءۇشىن بارلىق قاجەتتى جاعدايلاردى جاسايدى دەپ سانايمىز»، - دەدى بەكتۇرعانوۆ.
ايتا كەتەيىك، «قازاقستان رەسپۋبليكاسىنىڭ كەيبىر زاڭنامالىق اكتىلەرىنە ءبىلىم بەرۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسى پالاتا قاراۋىنا بيىلعى ساۋىردە ەنگەن.
