جۇما, 23 قازان 2020
COVID-19 قازاقستاندا. جۇقتىرعاندار — 110086. جازىلعاندار — 105493. قايتىس بولعاندار — 1796
جاڭالىقتار 531 0 پىكىر 28 قىركۇيەك, 2020 ساعات 18:36

«قازاعىم-اي» ونلاين-كونتسەرتى ءوتتى

27 قىركۇيەك «ۇلى دالا ەلىنەن» جوباسى اياسىندا «حالىق قازىناسى» مەملەكەتتىك ونەر ۇجىمىنىڭ شەتەلدەگى قانداستارعا ارنالعان «قازاعىم-اي» اتتى ونلاين كونتسەرتى ءوتتى. كونتسەرتتى قازاق دياسپوراسىنا رۋحاني قولداۋ كورسەتۋ جانە شەتەلدەگى قانداستارمەن بايلانىستى نىعايتۋ ماقساتىندا دۇنيەجۇزى قازاقتارىنىڭ قاۋىمداستىعى، «وتانداستار قورى» كەاق مەن «قازاقكونتسەرت» ۇيىمى بىرلەسىپ ۇيىمداستىردى.

اتالعان يگىلىكتى ءىس-شارا 2019 جىلدان بەرى قر اقپارات جانە قوعامدىق دامۋ مينيسترلىگىنىڭ تاپسىرماسىمەن جۇزەگە اسىرىلىپ كەلەدى. ونلاين كونتسەرت نۇر-سۇلتان ۋاقىتىمەن ساعات 21:00 تىكەلەي ەفيردە «وتانداستار قورى» كەاق Otandastar channel YouTube ارناسىندا كورسەتىلدى. بارشاعا قول جەتىمدى بولىپ، شەتتەگى قانداستارىمىزعا شىعارماشىلىق كوڭىل-كۇي سىيلاعان كونتسەرتكە قازاقستاننىڭ ەڭبەك سىڭىرگەن قايراتكەرلەرى قاتىستى. الىستاعى اعايىننىڭ ىستىق ىقىلاسىنا بولەنگەن جانعالي ءجۇزباي، ەرلان رىسقالي، ەربولات شالدىبەكوۆ، كلارا تولەنباەۆا، ارداق بالاجانوۆا جانە حالىقارالىق بايقاۋلاردىڭ لاۋرەاتتارى اسقار مۇقيات، اقەركە تاجىباەۆا، ۆەنەرا تابىس قاتارلى ونەرپازداردىڭ ونەرى قانداستاردىڭ كوڭىلىنەن شىقتى. ونەرپازدار كوپشىلىك ءسۇيىپ تىڭدايتىن ۇلتتىق مۋزىكالىق تۋىندىلار مەن جاڭا مۋزىكالىق كومپوزيتسيالاردى ورىندادى. 

ەلۆيرا ىسقاقوۆا،

مينسك قالاسىندا تۇراتىن بەلارۋس ەلىندەگى قازاق دياسپوراسىنىڭ وكىلى: 

- راقمەت، كونتسەرت وتە كەرەمەت كوڭىلدى ءوتتى. دۇنيەجۇزى قازاقتار قاۋىمداستىعى مەن «وتانداستار قورىنا» العىسىم شەكسىز. اتاجۇرتتان جەتكەن ىستىق سالەمدى، رۋحاني قازىنانى زور قۋانىشپەن قابىل الدىق. اۋەزدى ءان، كۇمبىرلى كۇي تىڭداپ ساعىنىشىمىزدى باستىق. قانداستار ءۇشىن جاساپ جاتقان  بارلىق جوبالارىڭىز تابىستى بولىپ،  جۇمىستارىڭىز بەرەكەلى بولسىن!

گاۋحار جۇماعازىقىزى،

تەگەران قالاسىندا تۇراتىن وتانداسىمىز يران تەلەراديو بىرلەستىگىنىڭ الەمدىك قىزمەت تورابىنا قاراستى قازاق راديوسىنىڭ ديكتورى جانە www.parstoday.com/kz سايتىنىڭ اۋدارماشىسى:

- الىس-جاقىن شەت ەلدەردەگى قازاق قانداستار تۇپكى تامىرىنان اجىراپ قالماۋى ءۇشىن رۋحاني دۇنيەلەرىن مولايتاتىن مادەني ءىس-شارالار ۇيىمداستىرۋ اسا ماڭىزدى. دۇنيەجۇزى قازاقتارى قاۋىمداستىعى مەن وتانداستار قورىنىڭ پاندەميا كەزىندە ءتۇرلى مۋزىكالىق ۇجىمدارمەن ارىپتەسىپ، ونلاين كونتسەرت ۇيىمداستىرۋى اتاجۇرتىن ساعىنىپ، جاڭالىققا سۋساپ وتىرعان قانداستاردىڭ جانىن جادىراتىپ، رۋحىن كوتەرەدى. بار ەكەنىمىزدى جانە ءبىر ەكەنىمىزدى ءبىلۋ ءار قازاقتى مارقايتادى. وسىنداي مۇمكىندىكتى ۇلت مۇددەسىنە ساي ۇتىمدى پايدالانۋعا كۇش سالىپ جاتقان «وتانداستار قورى» مەن دۇنيەجۇزى قازاقتارىنىڭ قاۋىمداستىعىنا جانە بارلىق جاناشىر جاندارعا العىسىمىز شەكسىز! 

گۇلدانا نارىنبەتوۆا،

وزبەكستان رەسپۋبليكاسى ناۋاي وبلىسى قازاق ۇلتتىق مادەني ورتالىعى كوورديناتورى، رەسپۋبليكالىق «نۇرلى جول» گازەتىنىڭ ايماقتىق ءتىلشىسى:

- ونلاين كونتسەرت ۇلتتىق ناقىشتا وتە كەرەمەت ءوتتى. 2017-2019 جىلدارى قىزىلوردا وبلىسىنان فيلارمونيا كەلگەندە حالىق اندەرى مەن كۇيلەرىن، تەرمەلەردى تىڭداعان بولاتىنبىز. بىزدە كوبىنەسە ەسترادا مەن توي اندەرى كوپ ورىندالادى. وسى ورايدا شەتەلدە تۇراتىن قانداستارعا ۇلتتىق اسپاپتاردىڭ ءۇنىن ەستىرتكەن كونتسەرت ۇيىمداستىرۋشىلارعا، مادەنيەت قىزمەتكەرلەرىنە، جالپى دۇنيەجۇزى قازاقتارىنىڭ قاۋىمداستى مەن «وتانداستار قورىنا» ەرەكشە العىسىمىزدى بىلدىرەمىز. ءبىز شەتەلدەگى قازاق دياسپوراسىنىڭ وكىلدەرى، مادەنيەتىمىز بەن ۇلتتىق قۇندىلىقتارىمىز الەم ساحناسىنان كورىنەتىنىنە سەنەمىز!

Abai.kz

0 پىكىر