قاجەتتىلىك. مەملەكەتتىك ءتىلدى ەلىمىزدىڭ ءار ازاماتى ءوز بەتىمەن ۇيرەنۋگە، تازا سويلەپ، جازۋعا ، ومىردە قولدانۋعا قۇلىقتى بولۋى ءۇشىن الدىمەن قاجەتتىلىك بولۋى كەرەك. سوندا عانا قازاق ءتىلىن شىن مانىندەگى مەملەكەتتىك تىلگە، ەلىمىزدەگى ۇلتارالىق قاتىناس تىلىنە اينالدىرۋعا مۇمكىندىك بار.

ال ول قاجەتتىلىكتى تۋعىزۋدىڭ ەكى جولى بارى بەلگىلى. ءبىرىنشىسى، زاڭمەن مىندەتتەۋ، باقىلاۋدى كۇشەيتۋ. ەكىنشىسى، ءار ازاماتتىڭ ءتىلدى ۇيرەنۋگە دەگەن قۇلشىنىسىن وياتۋ، جاعداي تۋعىزۋ، ورتا قالىپتاستىرۋ، پاتريوتتىق رۋحىن، سۇيىسپەنشىلىگىن ارتتىرۋ.

ءبىرىنشىسىنىڭ جايى بەلگىلى، قوعام مەملەكەتتىك ءتىل تۋرالى زاڭ قابىلداۋعا جاقىنداپ كەلە جاتىر. ال ەكىنشىسى، ياعني ءتىلدى ۇيرەنۋگە دەگەن قۇلشىنىستى وياتۋ، قاجەتتىلىك تۋعىزۋ كۇن سايىن جانە توقتاۋسىز جۇرگىزىلەتىن جۇمىس.

ءتىل كوميتەتى توراعاسى قىزمەتىنە تاعايىندالعان ون كۇن ىشىندە وسى باعىتتا جاسالعان جۇمىستارعا نازار اۋدارتا كەتەيىن.

ءبىرىنشى، پرەزيدەنتتىڭ ەستيتىن مەملەكەت ساياساتىن جۇزەگە اسىرۋ ءۇشىن، ەلىمىزدەگى بارشا باق پەن الەۋمەتتىك جەلىلەردەگى تىلگە قاتىستى ايتىلعان ماسەلەلەر مەن جاريالانىمدارعا مونيتورينگ جاساپ، جەدەل نازار اۋدارۋدى، قاجەتتى شارالار قابىلداۋدى قولعا الدىق.

ەكىنشى، ەلىمىزدەگى تەرمينولوگ عالىمدار مەن مامانداردى جيناپ، ونلاين كونفەرەنتسيا وتكىزىپ، وندا ەلىمىزدە وسى ۋاقىتقا دەيىن ماقۇلدانعان 27 مىڭ تەرمينگە قايتا مونيتورينگ جاساپ، ءساتسىز تەرميندەردەن ارىلۋ مىندەتىن قويدىق. سونداي اق تەرميندەردى ۇكىمەتتىك كوميسسيامەن بەكىتۋگە ۇسىنۋ تۋرالى قارار قابىلدادىق.

ءۇشىنشى، لاتىن ءالىپبيىن جەتىلدىرۋ ماسەلەسى بويىنشا تۇركى ءتىلدى ەلدەر اراسىندا عىلىمي كونفەرەنتسيا وتكىزىپ، ءالىپبيىمىزدى حالىقارالىق دەڭگەيدە تالقىلادىق. وعان تۇركيا، رەسەي، ازەربايجان، وزبەكستان، قىرعىزستان، مولدوۆيا، قاراقالپاقستان، تاتارستان، تاعى باسقا ەلدەردەن عالىمدار قاتىسىپ، ءالىپبي جاساۋداعى جانە لاتىن گرافيكاسىنا كوشۋدەگى ماسەلەلەر تۋرالى عىلىمي بايانداما جاسادى. تۇركى تىلدەس مەملەكەتتەر اراسىندا ءتىل سالاسى عالىمدارى اراسىنداعى اسسوتسياتسيا قۇرۋ ماسەلەسى كوتەرىلدى.

ءتورتىنشى، ءتىل كوميتەتىنىڭ اشىقتىعىن قامتاماسىز ەتۋ ماقساتىندا جانە ءتىل ماسەلەلەرىن الەۋمەتپەن بىرلەسە تالقىلاپ وتىرۋ ءۇشىن فەيسبۋك، ينستاگرام الەۋمەتتىك جەلىلەرىندە ءتىل كوميتەتىنىڭ اكاۋنتتارىن اشتىق. ەندى سىزدەردى تولعانتاتىن ماسەلەلەردى، تىلگە قاتىستى زاڭسىزدىقتاردى وسى جەردە جازا الاسىزدار. مۇمكىندىگىنشە تەز نازارعا الىپ، شەشىمىن ۇسىنۋعا تىرىساتىن بولامىز.

بەسىنشى، ءۇش ءتىلدى ەركىن مەڭگەرگەن، قازاق ءتىلدى جاستار اراسىندا بايقاۋ وتكىزدىك. ولاردىڭ ءتىل ۇيرەنۋ تاجىريبەسى ءتىل وقىتۋ ورتالىقتارىنا ۇسىنىلاتىن بولادى.

التىنشى، رەسپۋبليكا بويىنشا مەملەكەتتىك ءتىلدى وقىتاتىن ءتىل ورتالىقتارى وقىتۋشىلارى اراسىندا سىناق وتكىزىپ، ەڭ وزىق وقىتۋشىنى انىقتادىق. ەندىگى جەردە وزىپ شىققان وقىتۋشىنىڭ ۇتىمدى وقىتۋ ادىستەمەسى ەلىمىزدەگى 99 ءتىل وقىتۋ ورتالىقتارىنا، باسقا دا ءتىل ۇيرەتۋشى مامانداعا ۇسىنىلاتىن بولادى.

جەتىنشى، ەلىمىزدەگى مەملەكەتتىك ءتىلدىڭ ماسەلەلەرىن ۇزدىكسىز كوتەرىپ جۇرگەن ۇلتجاندى ازاماتتاردىڭ باسىن قوساتىن «ءتىل جاناشىرى» ونلاين توبىن قۇردىق. ماقسات - پرەزيدەنتتىڭ مەملەكەتتىك ءتىلدى ۇلتارالىق قاتىناس تىلىنە اينالدىرۋ يدەياسىن جۇزەگە اسىرۋ تۇرعىسىندا تىلگە بىرلەسە قىزمەت ەتۋ. ونلاين توپقا تىلىنە، ۇلتىنا قاراماستان ءوزىن ءتىل جاناشىرى سانايتىن كەز كەلگەن ازامات قاتىسىپ، پىكىرىن بىلدىرە الادى. (ەگەر ءوزىڭىزدى ءتىل جاناشىرى ساناساڭىز، ايتارىڭىز، قوسار ۇلەسىڭىز بار بولسا، قوسىلامىن، قولدايمىن دەپ اتى- ءجونىڭىزدى جازىپ، تەلەفونىڭىزدى قالدىرۋىڭىزعا بولادى.)

سونىمەن ءتىل كوميتەتى جاڭاشا جۇمىس ىستەي باستادى. بۇل باعىتتا سىزدەرگە ارقا سۇيەيتىنىمىز انىق.

ىسكە ءسات! ءتىلىمىز ماڭگى بولسىن!

ادىلبەك قابا،

ءتىل كوميتەتىنىڭ توراعاسى

Abai.kz