بۇگىن ءماجىلىس سپيكەرى نۇرلان نىعماتۋليننىڭ توراعالىعىمەن ءماجىلىستىڭ جالپى وتىرىسى ءوتتى. وندا  دەپۋتاتتار مادەنيەت ماسەلەلەرى بويىنشا زاڭنامالىق تۇزەتۋلەردى ماقۇلدادى.

زاڭ جوباسىنداعى جاڭاشىلدىقتىڭ ءبىرى مادەني ءىس-شارالاردى ۇيىمداستىرۋشىلاردىڭ مۋزىكالىق شىعارمالاردى ورىنداۋشىلاردىڭ فونوگراممانى قولدانۋى تۋرالى كورەرمەندەرگە حابارلاۋ تالابىنا قاتىستى. قۇجات جوباسى بويىنشا كونتسەرت ۇيىمداستىرۋشىلار فونوگرامما تۋرالى الدىن-الا حابارلاۋى مىندەتتى بولادى.

وسى رەتتە، فونوگرامما ماسەلەسىنە قاتىستى حالىقارالىق تاجىريبەنى العا تارتقان ءماجىلىس توراعاسى دەپۋتاتتار ۇسىنعان فونوگراممانى قولدانۋ تۋرالى ۇيىمداستىرۋشىلاردىڭ كورەرمەنگە حابارلاۋ مىندەتتەمەسىن بەلگىلەيتىن نورمانى قولدادى.

- ەگەر زاڭ جوباسىنىڭ ۇكىمەتتىك نۇسقاسىندا فونوگراممانى پايدالانۋ تۋرالى اقپاراتتاندىرۋ مىندەتتەمەسى ۇيىمداستىرۋشى مەن ورىنداۋشىلار اراسىندا ايقىن بولماسا، وندا دەپۋتاتتار ناقتىلاۋدى ۇسىنىپ وتىر. بىرىنشىدەن، بۇل ۇيىمداستىرۋشىنىڭ مىندەتى. ەكىنشىدەن، ۇيىمداستىرۋشى الدىن-الا كونتسەرتتە فونوگراممانىڭ بولاتىنى-بولمايتىنى تۋرالى كورەرمەنگە حابارلاۋعا مىندەتتى، - دەدى نۇرلان نىعماتۋلين.

فونوگرامماعا قاتىستى ءسوزىن قورىتىندىلاي كەلە:

- «قيسىق اربا جول بۇزادى»، - دەپ قازاق حالقىمىز ايتقانداي، ونەر ارقاشاندا تازا  بولۋ  كەرەك. ءاندى جاندى داۋىستا ايتقانى دۇرىس. ال، فونوگرامما بولسا ونى الدىن-الا ەسكەرتۋ قاجەت. جانە بيلەتتىڭ باعاسى دا سوعان سايكەس بولۋ كەرەك. ودان كەيىن، حالىق ءوزى شەشەدى، ول كونتسەرتكە بارا ما، بارماي ما؟ ارينە، كونتسەرت جاندى داۋىستا بولسا انشىگە حالىقتىڭ باعاسى دا، قۇرمەتى دە جوعارى بولادى، - دەدى نۇرلان نىعماتۋلين.

Abai.kz