انە-مىنە دەگەنشە، 1 قىركۇيەك - ءبىلىم كۇنى كەلە جاتىر. قر ءبىلىم جانە عىلىم مينيسترلىگىنىڭ دەرەكتەرىنە سۇيەنسەك، بيىل 2020-2021 جاڭا وقۋ جىلىندا 3,3 ميلليونعا جۋىق وقۋشى مەكتەپكە بارادى ەكەن.

سونىڭ ىشىندە 352 091 وقۋشى ءبىرىنشى سىنىپقا قابىلدانعان ەكەن. باستاۋىش سىنىپتاردا 1 ميلليوننان اسا بالا وقىسا، ولاردىڭ 60 پايىزدان استامى كەزەكشى سىنىپتارعا بارادى دەپ جوسپارلانعان. جانە 2,6 ميلليونعا جۋىق وقۋشى جاڭا وقۋ جىلىن قاشىقتان وقۋ فورماتىندا باستايدى ەكەن. بيىلدىڭ وزىندە جاڭا وقۋ جىلىنا دەپ 32 مەكتەپ جاڭادان اشىلعان. قازاقستانداعى ورتا ءبىلىم بەرەتىن مەكتەپتەردىڭ ۇزىن-سانى 7 مىڭعا جۋىقتايدى ەكەن.

وسى ورايدا ەلدەگى كەڭقولتىق، اتىمتاي جومارت ازاماتتاردىڭ قولداۋىمەن وتكىزىلىپ كەلە جاتقان، بۇگىندە يگى ءداستۇر، قالىپتى قاعيداعا اينالعان رەسپۋبليكالىق «مەكتەپكە جول» قايىرىمدىلىق اكتسياسى بار ەدى. اتالعان قايىرىمدىلىق اكتسياسى بيىل دا وتكىزىلەتىنىن وتكەندە ءبىلىم جانە عىلىم مينيسترلىگىنىڭ بالالاردىڭ قۇقىعىن قورعاۋ كوميتەتىنىڭ توراعاسى نۇربەك ورشۋبەكوۆ مالىمدەگەن.

«بۇگىن جىل سايىن ۇيىمداستىرىلىپ كەلە جاتقان «مەك­تەپكە جول» قايىرىمدىلىق اك­تسياسى باستالدى. بۇل اكتسيانىڭ ءتۇپ ماقساتى – الەۋمەتتىك از قامتىلعان جانە كوپبالالى وتباسىلاردىڭ بالالارىنا كومەك كورسەتىپ، بالالاردى مەكتەپكە قاجەتتى كەرەك-جاراقپەن قامتاماسىز ەتۋ ەدى.

اتالمىش اكتسيا وسىمەن 11-ءشى رەت ۇيىمداستىرىلىپ وتىر. وسى جىلدار ىشىندە 2,5 ميلليوننان استام وقۋشىعا ۇزىن-ىرعاسى 17,8 ميلليارد تەڭگەنىڭ ماتەريالدىق كومەگى كورسەتىلىپتى. بۇل يگى شارا جىل سايىن جالعاسىپ كەلەدى. جىل سايىن دەمەۋشىلىك جاساۋشىلاردىڭ دا سانى ارتىپ كەلەدى»، - دەگەن ەدى.

اكتسيا تامىز-قىركۇيەك ارالىعىندا جالعاسادى. رەسپۋبليكا بويىنشا جەرگىلىكتى اتقارۋشى بيلىك ورگاندارى وسى ساناتقا كىرەتىن بالالاردىڭ ءتىزىمىنى جاساپتى. بۇل تۋرالى دا مينيسترلىك وكىلى مالىمدەگەن ەدى.

«قازىرگى ۋاقتا جەرگىلىكتى بيلىك وكىلدەرى جوعارىداعى ساناتقا كىرەتىن، كومەككە مۇقتاج وقۋشىلاردىڭ ءتىزىمىن ازىرلەدى. شامامەن 323 مىڭ بالا. بۇل اكتسيا اتا-انالاردىڭ وتىنىشتەرى ارقىلى عانا قاتىسۋعا بولادى. اكتسيا 30 قىركۇيەككە دەيىن جالعاساتىن بولادى. سوندىقتان، بۇل ءتىزىم الداعى ۋاقتا ءالى دە تولىقتىرىلۋى مۇمكىن. جەرگىلىكتى جاۋاپتى ورگاندار الەۋمەتتىك از قامتىلعان وتباسىلاردىڭ بالالارىن مەكتەپكە دايارلاپ، ولاردىڭ مەكتەپكە قاۋىپسىز بارىپ-كەلۋى مەن تاماقتانۋ جايىن ءجىتى باقىلاۋدا ۇستاۋى كەرەك»، - دەدى كوميتەت توراعاسى.

اتالعان قايىرىمدىلىق اكتسياسىنا قاتىسۋدان ەلدەگى ميلليونداعان ەڭبەككەرلەر قاۋىمىنىڭ باسىن بىرىكتىرىپ وتىرعان قازاقستان كاسىپوداقتارى فەدەراتسياسى دا قالىس قالعان جوق.

ءيا، بيىل كوكتەمدە باستالعان كوروناۆيرۋس پەن كوروناۆيرۋس پنەۆمونياسىنا بايلانىستى ەلدە جاريالانعان كارانتيندىك شارالارعا بايلانىستى بيىلعى وقۋ جىلى بۇرىنعىدان وزگەشە باستالىپ وتىر. وقۋشىلاردىڭ باسىم-بولىگى قاشىقتان وقيدى. دەسە دە، شەكتەۋ شارالارىن ەسكەرە وتىرىپ، الماتى وبلىسى پەداگوگتەرىنىڭ كاسىپوداعى «مەكتەپكە جول» اكتسياسى اياسىندا از قامتىلعان وتباسىلاردى جاڭا وقۋ جىلىنا دايىنداۋ جۇمىستارىن قىزۋ باستاپ كەتىپتى.

27 مىڭعا جۋىق مۇشەسى بار الماتى وبلىستىق كاسىپوداقتار ۇيىمى كومەككە مۇقتاج 20 وقۋشىنىڭ ءتىزىمىن ازىرلەپ، ولاردىڭ جاڭا وقۋ جىلىنا قاجەتتى كەرەك-جاراقتارىن الىپ بەرگەن.

«ءبىز بۇل اكتسياسى وبلىستىق كاسىپوداق مۇشەلەرىنە قولداۋ ءبىلدىرۋ ماقساتىندا وتكىزىپ وتىرمىز. وڭىردەگى اۋداندىق، قالالىق فيليالدار م ەن وبلىستىق ۇيىم بيۋدجەتى ەسەبىنەن ۇزىن-سانى 1,5 ميلليون تەڭگە كولەمىندە قارجى بولدىك»، - دەدى كاسىپوداق ۇيىمىنىڭ باس مامانى ءلايلا ساعىنعاليقىزى.

بۇل قاراجاتقا وقۋشىلاردىڭ تاڭداۋىنا قاراي، سمارتفوندار مەن ينتەرنەت روۋتەرلەر، كەڭسە تاۋارلارى ت.ب. وقۋعا كەرەكتى زاتتار الىنعان.

ايتا كەتەيىك، وسىعان دەيىن الماتى قالاسىنداعى دەنساۋلىق ساقتاۋ جۇيەسى جۇمىسكەرلەرىنىڭ «SENIM» اتتى سالالىق كاسىپوداعى دا «مەكتەپكە جول» قايىرىمدىلىق اكتسياسىن ۇيىمداستىرعان ەدى. اتالمىش سالالىق كاسىپوداقتىڭ الماتى قالالىق فيليالى كوروناۆيرۋس پەن كوروناۆيرۋس پنەۆمونياسى كەزىندە ىندەتپەن كۇرەستىڭ الدىڭعى شەبىندە كۇنى-ءتۇنى تىنباي ەڭبەك ەتىپ جۇرگەن مەديتسينا قىزمەتكەرلەرىنىڭ مەكتەپكە ەندى بالعارعالى جاتقان بالالارىنا قاجەتتى كەڭسە تاۋارلارى تابىس ەتىلگەن. ۇزىن-ىرعاسى 150 مەدقىزمەتكەردىڭ بالالارىنا جاردەم بەرىلگەن.

ءبىلىم كۇنى قارساڭىنداعى قايىرىمدىلىق ىستەن شىمكەنتتىك ەڭبەككەرلەر قاۋىمى دا شەت قالماعان.

شىمكەنتتەگى ءبىلىم جانە عىلىم قىزمەتكەرلەرىنىڭ سالالىق كاسىپوداعى 2020-2021 جاڭا وقۋ جىلىندا قاشىقتان جۇمىس ىستەيتىن 40 مۇعالىمگە ارنايى نوۋتبۋكتەر ساتىپ الۋ ءۇشىن 2,5 ميلليون تەڭگە كولەمىندە قارجىلاي كومەك بەرگەن.

سونداي-اق، دەمەۋشىلەرمەن بىرلەسە وتىرىپ، از قامتىلعان مەكتەپ وقۋشىلارىنىڭ وتباسىلارى مەن ارداگەرلەردىڭ وتباسىلارىنا دا قايىرىمدىلىق كومەك كورسەتكەن. ازىق-تۇلىك سەبەتتەرى مەن كەڭسە تاۋارلارى، مەديتسينالىق جابدىقتار ۇلەستىرگەن.

ايتا كەتەيىك، شىمكەنتتەگى ءبىلىم قىزمەتكەرلەرىنىڭ سالالىق كاسىپوداعى توتەنشە جاعداي جاريالانىپ، كارانتين رەجيمى ەنگىزىلگەن ۋاقىتتا ۇزىن-ىرعاسى 5,5 ميلليون تەڭگەنىڭ قايىرىمدىلىق كومەگىن كورسەتىپتى. سونىڭ ىشىندە، 250-دەن استام كاسىپوداق مۇشەلەرىنە جاردەم بەرىلگەن.

Abai.kz