"قازىرگى كەزدە 131 ادام زارداپ شەكتى، ولاردىڭ 28-ءى اۋرۋحانادا جاتىر", - دەدى ول.

بەلارۋس استاناسى مينسك پەن وزگە قالالاردا التىنشى رەت جەڭىسكە جەتكەن قازىرگى پرەزيدەنت الەكساندر لۋكاشەنكوعا قارسى نارازىلىق اكتسيالارى جالعاسىپ جاتىر. نارازىلىقتىڭ العاشقى كۇندەرى دەمونسترانتتارعا اياۋسىز كۇش كورسەتىپ، رەزىڭكە وق پەن كوزدەن جاس اعىزاتىن گاز قولدانعان.

6 مىڭنان استام ادام ۇستالعان. ولاردى بىرتىندەپ بوساتقان كەزدە، تەرگەۋ اباقتىسىندا جاپپاي ازاپتالعانى بەلگىلى بولدى. قۇقىق قورعاۋشىلار 500 ادامنىڭ دەنەسى كوگەرىپ، قانتالاپ كەتكەنىن مالىمدەدى. تۇرمەدەن شىققان ادامدار اياۋسىز سوققىعا جىعىلعانىن باياندادى.

پرەزيدەنت كومەكشىسى نيكولاي لاتىشونوك "ازاماتتاردىڭ ازاپتالۋىنا بايلانىستى ميليتسيا قىزمەتكەرلەرىنە قارسى نەگە قىلمىستىق ءىس قوزعالمادى" دەگەن سۇراققا "حالىقتىڭ ىستەپ جاتقانىنىڭ ءبارى رەۆوليۋتسيالىق پروتسەسس، ال رەۆوليۋتسيالىق پروتسەستىڭ ءبارى جازالانادى" دەپ جاۋاپ بەرگەن.

بەلگىلى بولعانداي، مينسك مەملەكەتتىك بەلتەلەراديوكومپانياعا رەسەيدەن جۋرناليستەر شاقىرىلعان. ولار نارازىلىق بىلدىرگەن بەلارۋس جۋرناليستەرى مەن تەحنيكالىق قىزمەتكەرلەردىڭ ورنىن باسقان. مۇنى لۋكاشەنكونىڭ ءوزى راستادى. دەرەككوز مالىمەتىنشە، مينسكىگە RT (بۇرىنعى Russia Today) جۋرناليستەرى مەن فريلانسەرلەر بارعان. بىراق RT باس رەداكتورى مارگاريتا سيمونيان مينسكىدە تەلەكانال جۋرناليستەرى جوق دەپ مالىمدەدى.

Abai.kz