مينيسترلىك سونداي-اق پتر تەستىمەن راستالعان كوروناۆيرۋستان (U07.1 كودى) قايتىس بولعانداردىڭ دەرەگىن دە جاريالادى. كەشە، 29 تامىز كۇنى كوروناۆيرۋس جۇقتىرعانى زەرتحانالىق تالداۋمەن راستالعان توعىز ادامنىڭ ءولىمى تىركەلگەن.

اۋرۋلاردىڭ حالىقارالىق جىكتەمەسىندە Covid اۋرۋىنا ەكى كود بەرىلگەن: زەرتحانالىق تالداۋمەن راستالعان اۋرۋعا U07.1 كودى، زەرتحانالىق تالداۋمەن راستالماعان، بىراق اۋرۋ بەلگىلەرى بويىنشا كوروناۆيرۋسقا ۇقسايتىن اۋرۋعا U07.2 كودى تاعايىندالادى.

قازاقستان ۇكىمەتى ەپيدەميا باستالعالى تەك U07.1 كودىنا سۇيەنىپ، ناۋرىز ايىندا-اق بەكىتىلگەن U07.2 ەلەمەي كەلدى. ۇكىمەت تەك 1 تامىزدان كەيىن عانا اۋرۋ بەلگىلەرى بويىنشا كوروناۆيرۋسقا ۇقسايتىن پنەۆمونياعا U07.2 كودىن بەرە باستادى.

رەسمي ستاتيستيكا بويىنشا، U07.1 كودى 13 ناۋرىزدان بەرى 105 684 ادامعا تاعايىندالعان. ونىڭ ىشىندە 96 135 ادام جازىلعان، 1581 ادام قايتىس بولعان. دەنساۋلىق ساقتاۋ مينيسترلىگى كوروناۆيرۋس جۇقتىرعان، بىراق "ىلەسپە اۋرۋدان" قايتىس بولدى دەگەن جۇزدەگەن ادامنىڭ بارىن حابارلاعان.

تامىزدىڭ باسىنان بەرى U07.2 كودى 25 658 ادامعا تاعايىندالعان. بۇل ادامدار قوزدىرۋشىسى بەلگىسىز ۆيرۋستىق پنەۆمونياعا شالدىققان. اۋرۋ بەلگىلەرى ولاردىڭ كوروناۆيرۋس ينفەكتسياسىن جۇقتىرعانىن كورسەتكەن. U07.2 كودى بويىنشا، 1-29 تامىز ارالىعىندا 284 ءولىم تىركەلگەن.

قازاقستاندا 2020 جىلدىڭ العاشقى جەتى ايىندا 256 مىڭ ادام پنەۆمونياعا شالدىققان. بۇل – وتكەن جىلدىڭ العاشقى جەتى ايىنداعى پنەۆمونيا شالدىققاندار سانىنان 3,3 ەسە كوپ كورسەتكىش. پنەۆمونياعا شالدىققاندار كوروناۆيرۋس ستاتيستيكاسىنا قوسىلماعان. مينيسترلىك 256 مىڭنىڭ نەشەۋى باكتەريالىق، نەشەۋى زەڭ، نەشەۋى ۆيرۋستىق پنەۆمونيا ەكەنىن ايتپادى. كوروناۆيرۋس بولۋى مۇمكىن دەگەنى – قوزدىرۋشىسى بەلگىسىز ۆيرۋس پنەۆمونياسى. مينيسترلىكتىڭ بار ايتقانى، 1-8 شىلدە ارالىعىندا 56,8 مىڭ ادامنان پنەۆمونيا انىقتالعان، ونىڭ 39,7 مىڭىندا كوروناۆيرۋس بەلگىلەرى بايقالعان.

Abai.kz