كەشە كەشكە الماتىداعى «قازاقفيلم» ستۋدياسىنان ءورت شىقتى. رەسمي اقپاراتتارعا سۇيەنسەك، كەشە، 14 تامىز كەشكى ساعات 21:33-تە «قازاقفيلم» ستۋدياسىنىڭ كۇزەتشىسى ءورت سوندىرۋشىلەرگە حابارلاپ ايتقان ەكەن.

ال «قازاقفيلمدەگى» ءورتتىڭ بەينە جازبالارى سول كۇنى-اق الەۋمەتتىك جەلىگە تارادى.

قالالىق توتەنشە جاعدايلار دەپارتامەنتىنىڭ رەسمي مالىمەتىنشە، ءورت سوندىرۋشىلەر وقيعا ورنىنا جەدەل جەتكەن.

«قازاقفيلمنىڭ» تەرريتورياسىندا شىققان ءورتتىڭ ەكى وشاعى بار. ياعني، ءورت ەكى جەردەن شىققان. ءبىرى – بولەك تۇرعان قويما سەكىلدى ماتەريالدار ساقتالعان بوس تۇرعان شاتىردىڭ استىنان، ەكىنشىسى – ەكى قاباتتى اعاش عيماراتتان. زارداپ شەككەندەر تۋرالى اقپارات تۇسپەگەن. ءورتتى سوندىرۋگە 53 ادام مەن 16 تەحنيكا جۇمىلدىرىلعان»، - دەلىنگەن تجد اقپاراتىندا.

«قازاقفيلمدەگى» ءورت تۋرالى الماتى اكىمى باقىتجان ساعىنتاەۆ «تۆيتتەر» جەلىسىندە جازبا جاريالاپتى.

«قازاقفيلمدە» ءورت شىقتى. اۋماعى 400 ش. م وشاق 23:10-دا، ەكىنشى 200 ش. م وشاق 23:26-دا ءسوندىرىلدى. 53 قىزمەتكەر مەن 16 بىرلىك تەحنيكا جۇمىلدىرىلدى. ءورت سالدارى جويىلۋدا. زارداپ شەككەندەر جوق. تجد مەن پوليتسياعا ءورتتىڭ سەبەبى مەن شىعىنىن انىقتاۋدى تاپسىردىم»، - دەپ جازدى ساعىنتاەۆ.

ال بۇگىن «قازاقفيلم» اق پرەزيدەنتى اقان ساتاەۆ: «بۇل ادەيى جاسالدى», - دەپ مالىمدەدى.

«مەن وكىنىشكە وراي جانىپ كەتكەن  «قازاق حاندىعى» كينوكارتيناسىنىڭ دەكوراتسياسىنىڭ ورتاسىندا تۇرمىن. ورتەنگەن ەكىنشى نىسان وسى جەردەن 200 مەتر قاشىقتا ورنالاسقان. ءورتتىڭ ادەيى جاسالعانى انىق. باقىتىمىزعا وراي، ەشكىم زارداپ شەككەن جوق. قازىرگى جاعدايدىڭ شىعىنى اسا كوپ ەمەس. ءبىز وسىنى جاساعان قىلمىسكەرلەردى تابامىز دەگەن ۇمىتتەمىن»، - دەدى اقان ساتاەۆ «Instagram» جەلىسىندەگى پاراقشاسىندا.

Abai.kz