مەملەكەت باسشىسى قاسىم-جومارت توقاەۆ قر ساۋدا جانە ينتەگراتسيا ءمينيسترى باقىت سۇلتانوۆ پەن قر يندۋستريا جانە ينفراقۇرىلىمدىق دامۋ ءمينيسترى بەيبىت اتامقۇلوۆتى قابىلدادى. 

باقىت سۇلتانوۆ قاسىم-جومارت توقاەۆقا مينيسترلىك جۇمىسىنىڭ ناتيجەلەرى جايىندا، سونداي-اق، ساۋدا سالاسىنىڭ 2025 جىلعا دەيىنگى دامۋ مۇمكىندىكتەرى مەن پەرسپەكتيۆاسى تۋرالى باياندادى.

مەملەكەت باسشىسى مينيسترگە ساۋدا سالاسىنىڭ سىرتقى نارىقتارعا شىعۋىن قالپىنا كەلتىرۋ جانە ونى ودان ءارى دامىتۋ جونىندە بىرقاتار ناقتى تاپسىرما بەردى.

ال بەيبىت اتامقۇلوۆ ءوز كەزەگىندە يندۋستريا جانە ينفراقۇرىلىمدىق دامۋ مينيسترلىگىنىڭ بيىلعى 7 ايدا اتقارعان جۇمىسىنىڭ قورىتىندىسى، سونداي-اق، مەملەكەتتىك باعدارلامالاردىڭ جۇزەگە اسىرىلۋ بارىسى تۋرالى ەسەپ بەرىلدى.

بەيبىت اتامقۇلوۆتىڭ ايتۋىنشا، پاندەميا سالدارىنان تۋىنداعان داعدارىس جاعدايىنا قاراماستان مينيسترلىككە قاراستى سالالاردا وڭ ناتيجەلەرگە قول جەتكەن. مينيستر بۇگىندە «نۇرلى جەر» باعدارلاماسى اياسىندا 7 ميلليون شارشى مەتر تۇرعىن ءۇي سالىنىپ، 61,3 مىڭ وتباسىنىڭ تۇرمىستىق جاعدايى جاقسارعانىن جەتكىزدى. سونىمەن قاتار «نۇرلى جول» باعدارلاماسى بويىنشا رەسپۋبليكالىق جانە جەرگىلىكتى ماڭىزى بار 9,8 مىڭ شاقىرىم جولدىڭ قۇرىلىسى جانە قايتا جوندەۋ جۇمىستارى جۇرگىزىلىپ جاتىر.

بۇدان بولەك جىل سوڭىنا دەيىن يندۋستريالاندىرۋ كارتاسىن جۇزەگە اسىرۋ بويىنشا ەلىمىزدىڭ بارلىق وڭىرلەرىندە 160 جوبانى ىسكە قوسۋ جوسپارلانىپ وتىر.

كەزدەسۋ سوڭىندا پرەزيدەنت وڭدەۋ ونەركاسىبىن ودان ءارى ىنتالاندىرۋعا جانە ىشكى نارىقتى تولىق قامتۋ ماقساتىندا وڭدەلگەن ونىمدەردىڭ ۇلەسىن ارتتىرۋعا قاتىستى بىرقاتار تاپسىرما بەردى. قاسىم-جومارت توقاەۆ بيىل پايدالانۋعا بەرىلەدى دەپ جوسپارلانعان تۇرعىن ۇيلەردى ۋاقىتىندا تابىستاۋدىڭ ماڭىزدى الەۋمەتتىك مىندەت ەكەنىن ايتتى. سونداي-اق كولىك-ترانزيت ينفراقۇرىلىمىن جاڭعىرتۋ جۇمىستارىن جالعاستىرۋ قاجەتتىگىن اتاپ ءوتتى.

Abai.kz