ەلدەگى ەپيدەميولوگيالىق جاعدايعا بايلانىستى بيىل جاڭا وقۋ جىلى قاشىقتىقتان وقىتۋ فورماتىندا باستالادى. الايدا، قاشىقتىقتان وقىتۋ جاس ۇرپاققا ءبىلىم بەرۋدە كەدەرگى بولماۋى ءتيىس.

بۇل رەتتە، الماتى وبلىسىندا جاڭا وقۋ جىلىنا قارقىندى دايىندىق ءجۇرىپ جاتىر. بۇل تۋرالى ءوڭىر باسشىسى اماندىق باتالوۆ جۋرناليستەرمەن وتكەن ءباسپاسوز ءماسليحاتىندا مالىمدەدى.

جاڭا وقۋ جىلىندا وقۋشى سانى وتكەن جىلمەن سالىستىرعاندا 16,6 مىڭ بالاعا ءوسىپ 426 مىڭنان اسىپ وتىر. ال، 1 سىنىپقا 48 مىڭ بالانى قابىلداۋ جوسپارلانىپ وتىر.

بيىل بالالاردى ءتورت باعىتتا وقىتۋ جوسپارلانۋدا. وقۋشىلاردىڭ 70 پايىزى ينتەرنەت جەلىسىمەن، 20 پايىزى رەسپۋبليكالىق تەلەارنالار ارقىلى وقىتىلادى. ءۇشىنشى، شالعايداعى ەلدى مەكەندەردەگى مەكتەپتەر 2 اۋىسىمدا شتاتتىق رەجيمدە وقيدى. ال، باستاۋىش سىنىپ وقۋشىلارى كەزەكشى سىنىپتاردا ءبىلىم الماق. شتاتتىق رەجيمدە ءبىلىم بەرەتىن مەكتەپتەردە قاتاڭ سانيتارلىق تالاپتار ساقتالادى. مەكتەپكە كىرە بەرىستە زالالسىزداندىرۋ توسەنىشتەرى،  تەپلوۆيزور، سانيتايزەر جانە جەكە قورعانۋ قۇرالدارىمەن قامتاماسىز ەتىلمەك.

وبلىستا  جىل سايىن ءبىلىم ساپاسى ارتىپ. ماسەلەن، وتكەن جىلى ءبىلىم دەڭگەيى 65 پايىزعا جەتكەن. ءبىلىم ساپاسىن ارتتىرۋ ماقساتىندا بيىلدىڭ وزىنە 314,2 ملرد تەڭگە ءبولىنىپ وتىر.

«جالپى وبلىس بويىنشا 91 743 وقۋشىعا كومپيۋتەرلىك قۇرالدارعا قاجەتتىلىك بار. وسىعان سايكەس، اتالعان ماسەلەنى شەشۋ ءۇشىن از قامتىلعان وتباسى بالالارى مەن جەتىم بالالاردى كومپيۋتەرلىك تەحنيكامەن قامتامسىز ەتۋ ماقساتىندا قوسىمشا 75,6 مىڭ كومپيۋتەر ساتىپ الىندى. مەملەكەتتىك - جەكەمەنشىك ارىپتەستىك اياسىندا 20 مىڭ كومپيۋتەر ساتىپ الىنادى. مەتسەناتتار تاراپىنان از قامتىلعان وتباسىلاردىڭ بالالارى ءۇشىن 150 كومپيۋتەر قۇرالدارىن تەگىن بەرۋى جوسپارلانۋدا. قابىلدانعان شارالار ناتيجەسىندە جاڭا وقۋ جىلىندا وبلىس وقۋشىلارىن كومپيۋتەرمەن قامتاماسىز ەتۋ ماسەلەسى تولىق شەشىلەتىن بولادى.»-, دەدى اماندىق باتالوۆ ءوز سوزىندە.

وڭىردە 732 ەلدى مەكەننىڭ، 19 اۋىلىندا  ينتەرنەت جەلىسى جوق. ونداعى مەكتەپ جاسىنداعى 886 بالانىڭ 730-ى تەلەارنا ارقىلى، قالعان 156 بالا شتاتتىق رەجيمدە وقىتىلاتىن بولادى. «قازاقتەلەكوم» اق ارقىلى 98 مەكتەپتە ينتەرنەت جىلدامدىعىن 4 مبيت-تەن، 8 مبيت-كە  دەيىن ۇلعايتۋ كۇتىلۋدە.سونداي-اق، ينتەرنەت جەلىسىنە قوسىلۋ ءۇشىن وقۋشىلارعا 43 مىڭ روۋتەرلار ساتىپ الۋ جوسپارلانىپ وتىر.

الماتى وبلىسىندا  جالپى 760 مەكتەپ بار. مەملەكەتتىڭ قولداۋىمەن الداعى ۋاقىتتا ءۇشاۋىسىمدى مەكتەپتەر سانى ازايماق. ويتكەنى بيىل 23 مەكتەپتىڭ قۇرىلىسى ءجۇرىپ جاتىر. جاڭا وقۋ جىلىندا الماتى وبلىسىندا 8 مەكتەپ اشىلادى.

ايمان اسىل

Abai.kz