رەسپۋبليكالىق بيۋدجەتتىڭ شىعىستارى 8 ترلن 136 ملرد تەڭگەنى قۇرادى. بۇل تۋرالى ۇكىمەت وتىرىسىندا بيىلعى جەتى ايدىڭ قورىتىندىسى بويىنشا بيۋدجەتتىڭ اتقارىلۋ جايىندا ەسەپ بەرگەن قر قارجى ءمينيسترى ەرۇلان جاماۋباەۆ ءمالىم ەتتى.

«مەملەكەتتىك بيۋدجەتتىڭ شىعىستارى 98,6 پايىزعا، رەسپۋبليكالىق بيۋدجەتتىڭ شىعىستارى - 99,1 پايىزعا، جەرگىلىكتى بيۋدجەتتەردىڭ شىعىستارى 98,5 پايىزعا اتقارىلدى. رەسپۋبليكالىق بيۋدجەتتىڭ شىعىستارى 8 ترلن 136 ملرد تەڭگەنى قۇرادى. 74 ملرد تەڭگەگە اتقارىلماعان. ونىڭ ىشىندە ۇنەمدەۋ – 13 ملرد تەڭگە، يگەرىلمەگەنى – 61 ملرد تەڭگە»، - دەدى مينيستر ۇكىمەت وتىرىسىندا.

يگەرىلمەۋدىڭ نەگىزگى سەبەپتەرى: كونكۋرستىق راسىمدەردى، شارتتاردى جاساۋ راسىمدەردى ۇزاق وتكىزۋ، ورىندالعان جۇمىستار اكتىلەرىن ۇسىنباۋ، كارانتيندىك شەكتەۋگە بايلانىستى تاۋارلاردى جەتكىزبەۋ.

قارجى ءمينيسترىنىڭ ايتۋىنشا، جەرگىلىكتى بيۋدجەتتەردىڭ شىعىستارى 4 ترلن 172 ملرد تەڭگەنى قۇرادى، 62 ملرد تەڭگەگە اتقارىلماعان.

«بيىل وڭىرلەرگە سوماسى 2,3 ترلن تەڭگەگە نىسانالى ترانسفەرتتەر كوزدەلگەن. الدىن الا دەرەكتەر بويىنشا 1 تامىزداعى كەزەڭدە ولارعا 1,1 ترلن تەڭگە ءبولىندى. ونىڭ ىشىندە 98,3 پايىزى يگەرىلگەن. اتقارىلماعانى – 19 ملرد تەڭگە. ونىڭ ىشىندە ۇنەمدەۋ – 4 ملرد تەڭگە، يگەرىلمەگەنى – 15 ملرد تەڭگە»، - دەپ ءتۇسىندىردى ە. جاماۋباەۆ.

Abai.kz