سۋ قويماسى بيىل 1 مامىردا جارىلىپ، وزبەكستاندا التى ادام قايتىس بولىپ، 70 مىڭداي ادام ەۆاكۋاتسيالانعان. ساردوبا سۋى قازاقستانعا دەيىن ءوتىپ، تۇركىستان وبلىسى ماقتاارال اۋدانىنداعى بىرنەشە اۋىلدى سۋ العان ەدى.

كۇدىككە ىلىندەندەر اراسىندا "سىرداريا سۋۆ كۋريليش ينۆەست" مەكەمەسىنىڭ قۇرىلىسقا تاپسىرىس بەرۋشىسى، UzGip كومپانياسىنىڭ جوبالاۋشىسى، "ۋزتەميريۋلكۋريليشمونتاج" مەكەمەسىنىڭ باس مەردىگەرى، "رەزاكسوي سۋۆ كۋريليش" مەكەمەسىنىڭ مەردىگەرى، "تۋپالانگ شەروبود" مەكەمەسىنىڭ مەردىگەرى، سۋ شارۋاشىلىعى مينيسترلىگىنىڭ قىزمەتكەرى بار.

تەكسەرىس قورىتىندىسىندا سۋ قويماسىنداعى جارىلىسقا جوبالاۋ قۇجاتىنداعى، قۇرىلىس كەزىندەگى قاتەلىكتەر سەبەپ دەپ كورسەتىلگەن.

ساردوبا سۋ قويماسى 2017 جىلى سالىنعان. قۇرىلىستى سالۋعا ەلدىڭ قازىرگى پرەزيدەنتى شاۆكات ميرزياەۆ پرەمەر بولىپ تۇرعاندا پارمەن بەرگەن. سۋ قويماسىن سالۋعا 404,4 ملن دوللار بولىنگەن.

وزبەكستانداعى سۋ اپاتىنان قازاقستاننىڭ ماقتاارال اۋدانىنداعى التى اۋىل زارداپ شەكتى. كولدەنەڭ كەلگەن اپاتتان مىڭنان استام تۇرعىن ءۇي، ءۇش مەكتەپ، بەس بالاباقشا، بىرنەشە مەديتسينا مەكەمەسى مەن مادەنيەت ءۇيى ءبۇلىندى. سۋ العان ايماقتا تۇراتىن 31 مىڭنان استام ادام ءۇي-مۇلكىن تاستاپ كەتۋگە ءماجبۇر بولدى. قازاقستان بيلىگى اپاتتان زارداپ شەككەندەرگە 100 مىڭ تەڭگە (240 دوللار) تولەدى.

ساراپشىلار سۋ قويماسىنىڭ اپاتىنا جەمقورلىق، قۇرىلىس ماتەريالدارىنا بولىنگەن قارجىنى جەۋدەن بولدى دەپ ەسەپتەيدى.

Abai.kz