بيىل مەملەكەت باسشىسى قاسىم-جومارت كەمەلۇلىنىڭ باستاماسىمەن قازاقتىڭ ۇلى اقىنى اباي قۇنانبايۇلىنىڭ 175 جىلدىق مەرەيتويى اياسىندا قازاق رۋحانياتىندا بىرقاتار ىرگەلى ىستەر اتقارىلماق. سولاردىڭ ءبىرى قر اقپارات جانە قوعامدىق دامۋ ءمينيسترى ايدا بالاەۆانىڭ ۇيىتقى بولۋىمەن اشىلعان «اباي تۆ» جانە «ءال-فارابي» تەلەارنالارى.

كۇنى كەشە تۇڭلىگىن تۇرگەن «اباي تۆ» تەلەارناسى ۇلى اقىننىڭ مەرەيتويىنا ۇلكەن تارتۋ بولعانى ءسوزسىز. اقپارات كەڭىستىگىنە «اقىل ويدىڭ ايناسى» دەگەن ۇرانمەن جول تارتقان اتالمىش تەلەارنا قازاق مادەنيەتى مەن رۋحانياتىنىڭ جاۋھار تۋىندىلارىن، ۇلى اقىننىڭ وشپەس مۇرالارىن حالىققا كەڭىنەن ناسيحاتتاۋدى ماقسات ەتكەن.

سونداي اق، تەلەارنا الەمدىك ونەر مەن ۇلتتىق مادەنيەتتىڭ جاۋھار مارجاندارىن، ءتۇرلى ۇلتتاردىڭ تاريحي جانە ادەبي مۇرالارىن، تەاتر، بالەت سەكىلدى ونەر تۇرلەرىن قالىڭ كوپشىلىككە ۇسىنباق. ال، ارنانىڭ ەڭ باستى مىندەتى – قازاقتىڭ باس اقىنى اباي قۇنانبايۇلىنىڭ 175 جىلدىق مەرەيتويى اياسىندا ۇلى حاكىمنىڭ مۇراسىن جان-جاقتى ناسيحاتتاۋ مەن دامىتۋ ءىسىن ىلگەرى باستىرۋ.

«اباي تۆ» ارناسى 07:00-دەن 00:00-گە دەيىن تاۋلىگىنە 17 ساعات قازاق جانە ورىس تىلدەرىندە حابار تاراتادى. ارناداعى تەلەونىمدەردىڭ 80 پايىزى قازاق تىلىندە بولماق. «اباي تۆ» ارناسى «ID TV»،  «Alma TV»كابەلدىك جەلىلەرى ارقىلى جانە «Otau TV» ۇلتتىق سپۋتنيكتىڭ وپەراتورى ارقىلى تارالادى.

سونىمەن قاتار ارنانى www.abaitv.kz رەسمي سايتى ارقىلى ونلاين كورۋ مۇمكىندىگى دە جۇزەگە اسىرىلادى.

مينيستر بالاەۆانىڭ ايتۋىنشا، «اباي تۆ» تەلەارناسى «قازاقستان ترك» قۇرامىنا كىرەدى.

سونىمەن قاتار، بالاەۆا جاڭا وقۋ ماۋسىمىنان باستاپ «ءال-فارابي» وقۋ اعارتۋ ارناسى دا اشىلماق.

-«وقۋ اعارتۋ باعىتىنداعى «ءال-فارابي» تەلەارناسى «حابار» اگەنتتىگىنىڭ قۇرامىندا بولادى. جاڭا وقۋ جىلىنىڭ قارساڭىندا كورسەتىلە باستايتىن اتالمىش ارنا 6-18 جاسقا دەيىنگى بالالار مەن جاسوسپىرىمدەرگە ارنالادى. ال، تەلەارنا وقۋ-اعارتۋباعىتىنداعى تەلەۆيزيالىق پلاتفورما بولادى. سەبەبى، پاندەميا كەزىندە مۇنداي ارنانىڭ وزەكتىلىگى بايقالدى» ،- دەدى قر اقپارات جانە قوعامدىق دامۋ ءمينيسترى.

ءيا، ءبىزدىڭ ەلدە عىلىم مەن ءبىلىم، مادەنيەت سالاسىندا حابار تاراتاتىن تەلەارنانىڭ ورنى ويسىراپ تۇرعانى راس. وسى ولقىلىقتىڭ ورنىن تولتىرعان اباي تەلەارناسىنىڭ ماڭىزى جونىندە قر پرەزيدەنتىنىڭ باسشىسىنىڭ ءبىرىنشى ورىنباسارى داۋرەن اباەۆ تا ايتتى.

-«2020 جىل الەمدەگى كۇردەلى جاعدايلارعا قاراماستان ەلىمىزدە ەرەكشە وقيعالارمەن قالارى ءسوزسىز. سول ماڭىزدى دۇنيەلەردىڭ ءبىرى – اباي قۇنانبايۇلىنىڭ 175 جىلدىق مەرەيتويى. بۇگىنگى تاڭدا اقىننىڭ مۇرالارىن ناسيحاتتاۋعا ارنالعان ءىرى شارالار باستالدى. ول اۋقىمدى جۇمىستار ءالى دە جالعاسۋدا. بۇل ءبىزدىڭ بارىمىزدى باعالاپ، بولاشاعىمىزدى باعدارلايتىن ناقتى قادام بولماق. مەملەكەت باسشىسى قاسىم-جومارت توقاەۆ «اباي جانە XXI عاسىرداعى قازاقستان» اتتى ماقالاسىندا «اباي مۇراسى – بۇكىل ادامزات بالاسىنىڭ رۋحاني ازىعى» دەپ لايىقتى باعاسىن بەردى»،- دەدى اباەۆ.

سونىمەن قاتار داۋرەن اباەۆ بۇل ارنانىڭ مادەني-اعارتۋ باعىتىنداعى جالعىز تەلەارنا ەكەنىنە توقتالدى.

-«جاڭا تەلەارناعا ابايدىڭ ەسىمى بەرىۋلى بەكەر ەمەس. بۇل مادەني-اعارتۋ باعىتىنداعى جالعىز تەلەارنا. ال، وعان ابايدىڭ اتىن بەرۋ وتە ماڭىزدى. سەبەبى، ۇلى اقىننىڭ ونەگەلى جولى ءالى تالاي عاسىرعا جالعاسادى.

ەكىنشىدەن، اباي.TV ارناسى – ءتول مادەنيەتىمىز بەن ءداستۇرىمىزدى ناسيحاتتاۋدى ماقسات ەتەدى. بۇل تۋرالى ۇلى ويشىل «اسەمپاز بولما ارنەگە، ونەرپاز بولساڭ ارقالان»، «پايدا ويلاما ار ويلا، تالاپ قىل ارتىق بىلۋگە» دەگەن وسيەتتەر قالدىرعان. ءبىز سونى ەستە ۇستاۋعا ءتيىسپىز.

سونىمەن قاتار ۇلى اقىن تاعى ءبىر سوزىندە ادام بالاسىن زامان وسىرەدى دەيدى. دەمەك، ءبىزدىڭ جاڭا تەلەارنا جۇمىسى دا وسى قازىرگى كەزەڭنىڭ تالابىنا ساي بولماق»،- دەدى ول.

جاڭا تەلەارنا مەملەكەت باسشىسى قاسىم-جومارت كەمەلۇلىنىڭ تاپسىرماسىمەن ىسكە قوسىلعان. كوپشىلىككە اباي مۇراسىن، حالقىمىزدىڭ مادەنيەتى مەن ونەرىن جانە بۇكىل الەمنىڭ مادەني جەتىستىكتەرىن تانىستىرادى. قازىردىڭ وزىندە وسى باعىتتا «ءساراسوز»، «اباي جولىن بىرگە وقيىق» سەكىلدى بعدارلامالار جارىققا شىقتى. سونىمەن قاتار، قازاق قالامگەرلەرىنىڭ درامالىق شىعارمالارىن تالداۋعا ارنالعان «ۇركەر» اتتى حابار دا جارىق كورگەن. ودان بولەك، قازاق تاريحى مەن مۋزىكا مادەنيەتى جايىندا «مۋزىكا ۆەليكوي ستەپي»،جاستارعا ارنالعان «جىر مايدانى» حابارلارى كوپشىلىككە جول تارتقان. ودان بولەك، بالەت پەن سپەكتاكلدەرگە ارنالعان «پرەمەرى» باعدارلاماسى دا جارىق كوردى.

اتالعان ارنا تۋرالى قازاقستاننىڭ ەڭبەك سىڭىرگەن قايراتكەرى، جازۋشى سۇلتان ورازالى جىلى لەبىزىن ءبىلدىرىپ، الداعى جۇمىستارىنا ساتتىلىك تىلەدى.

«ابايدىڭ اتى – وتە ارداقتى. سوندىقتان وسى ارنادا جۇمىس ىستەيتىن قىز-جىگىتتەردىڭ موينىنا اۋىر جۇك ارتىلادى. ابايدىڭ اتىن يەلەنگەننەن كەيىن ونىڭ ويشىلدىعىن، ادىلدىگىن، سوزگە دەگەن ەرەكشە ىقىلاسىن، اندەرى مەن عاجايىپ جىرلارىنداعى سۇلۋلىقتى ساقتاپ، سول بيىككە ۇمتىلىڭىزدار.

وسىنداي قيىن كەزدىڭ وزىندە قيىنشىلىققا مويىماي جاڭا تەلەارنانىڭ اشىلۋى، وعان بارلىق مۇمكىندىكتىڭ جاسالۋى – يگى قادام»،- دەدى سۇلتان ورازالى.

Abai.kz