مەملەكەت باسشىسى قاسىم-جومارت توقاەۆ تۇركىستان جانە قاراعاندى وبلىستارىنداعى جاعدايعا بايلانىستى كەڭەس وتكىزدى. بۇل تۋرالى پرەزيدەنتتىڭ ءباسپاسوز حاتشىسى بەرىك ءۋالي Facebook جەلىسىندەگى پاراقشاسىندا حابارلادى.

- مەملەكەت باسشىسى شورناق اۋىلى مەن ساتباەۆ قالاسىنداعى وقيعالارعا بايلانىستى پرەزيدەنت اكىمشىلىگىنىڭ باسشىلىعىمەن، تۇركىستان جانە قاراعاندى وبلىستارىنىڭ اكىمدەرىمەن، قۇقىق قورعاۋ ورگاندارىنىڭ باسشىلىعىمەن كەڭەس وتكىزدى.

دەر كەزىندە قابىلدانعان شەشىمدەردىڭ ارقاسىندا شورناق اۋىلى مەن ساتباەۆ قالاسىنداعى جاعداي تۇراقتالدى. تارتىپسىزدىكتىڭ قايتالانۋىنا ەشقانداي سەبەپ جوق. پرەزيدەنت جاعدايدى باقىلاۋدا ۇستاپ، جەرگىلىكتى تۇرعىندار اراسىندا ءتۇسىندىرۋ جۇمىستارىن جۇرگىزۋدى، ەل ىشىندەگى تۇراقتىلىقتى بۇزۋعا تالپىنعان ارانداتۋشىلاردىڭ الدىن الۋدى، قۇقىق بۇزۋشىلاردى زاڭ اياسىندا جاۋاپكەرشىلىككە تارتۋدى تاپسىردى.

سونىمەن قاتار ول اتالعان ايماقتارداعى حالىقتىڭ ەڭ باستى الەۋمەتتىك-ەكونوميكالىق قاجەتتىلىكتەرىنە نازار اۋدارۋ كەرەك ەكەنىن ايتتى. ال قۇقىق قورعاۋ ورگاندارىنا كامەلەت جاسىنا تولماعان قىزدى زورلاماق بولدى دەگەن كۇدىكپەن ۇستالعان ساتباەۆ قالاسىنىڭ تۇرعىنىنا قاتىستى تەرگەۋ جۇمىستارىن جان-جاقتى جۇرگىزىپ، ونىڭ قورىتىندىسى تۋرالى جۇرتشىلىققا ناقتى اقپارات بەرۋ تۋرالى تاپسىرما بەردى، - دەپ جازدى بەرىك ءۋالي.

ايتا كەتەيىك، 23 شىلدە كۇنى تۇركىستان وبلىسى كەنتاۋ قالاسى ماڭىنداعى شورناق اۋىلىندا تۇرعىندار اراسىندا جانجال تۋىنداپ, ءۇش ادام جاراقاتتانعانى حابارلانعان ەدى. جاراقات العان ءبىر ادامنىڭ جاعدايى اۋىر ەكەنى بەلگىلى بولعان. وقيعا ورنىنا بارعان ۋچاسكەلىك پوليتسەي دە لاقتىرىلعان تاستان جاراقاتتانعان.

ال قاراعاندى وبلىسى ساتباەۆ قالاسىنداعى جاعداي 23 شىلدەدەن 24 شىلدەگە اۋعان ءتۇنى بولدى.

23 شىلدە كەشكە قالادا بەس جاسار قىز جوعالىپ كەتكەن. ونى قالا تۇرعىندارى جينالىپ ىزدەگەن. تۇرعىندار ونى كوپقاباتتى ۇيلەردىڭ بىرىندەگى پاتەردەن تاپقان. پوليتسيا قىزمەتكەرلەرى وسى پاتەرگە باسىپ كىرىپ، بالانى الىپ شىققان. پاتەردە ەر ادام بولعان. ونىڭ كىشكەنتاي بالانى نەگە ۇيىندە ۇستاعانىن تەرگەۋ جۇمىستارى انىقتايدى.

تۇرعىندار بالانى ۇرلادى دەگەن كۇدىككە ىلىنگەن ادامدى وزدەرى جازالاعىسى كەلگەن. نارازى توپ ءتۇن ورتاسىندا پوليتسيا عيماراتى ماڭىنداعى بىرنەشە كولىكتى ورتەگەن كورىنەدى.

- بالا قازىر اۋرۋحانادا. كۇدىكتى ۇستالدى. الايدا، بىرنەشە ونداعان ادام كۇدىكتىنى ۇستاپ بەرۋدى تالاپ ەتىپ جاتىر. تارتىپسىزدىكتەردىڭ جولىن كەسۋ ءۇشىن قۇقىق قورعاۋ ورگاندارى ءتارتىپتى كۇشەيتكەن. قاراعاندى وبلىسىنىڭ پوليتسيا دەپارتامەنتى قوعامدىق ءتارتىپ پەن قالا تۇرعىندارىنىڭ قاۋىپسىزدىگىن قامتاماسىز ەتۋ ءۇشىن بارلىق قاجەتتى شارانى قابىلدادى، - دەپ حابارلادى قاراعاندى وبلىسىنىڭ جپ ءباسپاسوز قىزمەتى.

Abai.kz